២ ឆ្នាំនេះ កម្ពុជាទទួលបានក្រុមហ៊ុនចុះបញ្ជីមានទុនវិនិយោគជាង ៤.៦ ប៊ីលាន​ដុល្លារ

ក្នុងរយៈពេល ២ ឆ្នាំនេះពោលគឺចាប់ពីថ្ងៃទី១៥ ខែមិថុនាឆ្នាំ២០២០ រហូតមកដល់ថ្ងៃទី១៤ ខែមិថុនាឆ្នាំ២០២២ ​កម្ពុជាទទួលបានក្រុមហ៊ុនចុះបញ្ជីតាមប្រព័ន្ធចុះបញ្ជី​អាជីវកម្ម តាមថ្នាលបច្ចេកវិទ្យាព័ត៌មានសរុបចំនួន ១៤ ៦៧៦ ក្រុមហ៊ុន ដែលមានទុនវិនិយោគសរុបចំនួន ៤៦៧០ ៩៨១ ៧៦៣ ដុល្លារអាមេរិក។

យោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុស្តីពីខួបគម្រប់ ២ ឆ្នាំ នៃការដាក់ឱ្យ​ប្រើប្រាស់​ជាផ្លូវការប្រព័ន្ធចុះបញ្ជីអាជីវកម្ម ​តាមថ្នាលបច្ចេកវិទ្យាព័ត៌មានចុះកាលពីថ្ងៃទី ១៥ ខែ​មិថុនាបានឱ្យដឹងថា ក្រុមហ៊ុនចំនួន ១៤ ៦៧៦ បាន​ចុះបញ្ជី​តាម​វិស័យ ​អាហរ័ណនីហរ័ណ​ ទិញលក់ ជួសជុលយានយន្ត និងទោចចក្រយានយន្តគ្រប់​ប្រភេទ​មាន​ជាង ៣៩%, សកម្មភាពសេវាកម្ម​ស្នាក់នៅ និងអាហារជាង ១០%, ​សកម្មភាពអចលនទ្រព្យជិត ៩%, កម្មន្តសាលជាង​ ៨%, ព័ត៌មានវិទ្យា និងទូរគមនាគមន៍ជាង ៦%, និងវិស័យផ្សេងៗទៀតជិត ២៧%។

ចំពោះទំហំវិនិយោគនៅតាមវិស័យវិញ ការសាងសង់មានជាង ២១%, កម្មន្តសាលជាង ១៨%, អាហរ័ណនីហរ័ណ ទិញលក់​ ជួសជុលយានយន្ត​ និងទោចចក្រយានយន្តគ្រប់ប្រភេទជាង ១៥%, សកម្មភាព​អចលនទ្រព្យជាង ១៤%, សកម្មភាព​​ហិរញ្ញវត្ថុ ​និងធានារ៉ាប់រងជាង ៧% និង​វិស័យផ្សេងៗទៀតជិត ២៣% ផងដែរ។

ការរៀបចំប្រព័ន្ធចុះបញ្ជីអាជីវកម្ម​ តាមថ្នាលបច្ចេកវិទ្យាព័ត៌មាន គឺមាន ២ ដំណាក់កាល​ ក្នុងនោះសម្រាប់ដំណាក់កាលទី ១ បានដាក់ឱ្យដំណើរការជាផ្លូវការ ​អស់រយៈពេល ២ ឆ្នាំកន្លង​មកហើយ ​គឺជាការចុះបញ្ជីជាខ្សែច្រវ៉ាក់ជាមួយ ​ក្រសួងពាណិជ្ជកម្ម, អគ្គនាយកដ្ឋានពន្ធដារ និងក្រសួងការងារ ​និងបណ្តុះបណ្តាលវិជ្ជាជីវៈ។ ចំណែកដំណាក់កាលទី ២ បានដាក់ឱ្យដំណើរ​ការនៅ​ថ្ងៃទី ១៥ ខែ កញ្ញា ឆ្នាំ២០២១ ​ផ្តោតលើការ​ផ្តល់​អាជ្ញាប័ណ្ណ​ជំនាញ​ពីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង នវានុវត្តន៍, ក្រសួងទេសចរណ៍, ក្រសួងប្រៃសណីយ៍ ​និងទូរគមនាគមន៍ និង​និយ័តករ​អាជីវកម្មអចលនទ្រព្យ ​និង បញ្ចាំ​នៃអាជ្ញាធរសេវាហិរញ្ញវត្ថុមិនមែនធនាគារ។

ក្រសួងសេដ្ឋកិច្ច និងហិរញ្ញវត្ថុ ​គ្រោងនឹងដាក់ដំណើរការប្រព័ន្ធចុះបញ្ជីអាជីវកម្ម តាមថ្នាល​បច្ចេក​វិទ្យាព័ត៌មាន​ ដំណាក់កាលទីបី​ នៅពេលខាងមុខ ​ដែលមានក្រសួង ​និងស្ថាប័នជាច្រើនផ្សេង៕

អត្ថបទ៖ សំអឿន