កម្ពុជា ទទួលបានភ្ញៀវទេសចរអន្តរជាតិ​មួយថ្ងៃជាង ៥ពាន់នាក់

កម្ពុជា ទទួលបានភ្ញៀវទេសចអន្តរជាតិប្រមាណជាង ៥៦០០នាក់ ក្នុងមួយថ្ងៃ។ តាមការប៉ាន់ស្មាន ពេញមួយឆ្នាំ ២០២២នេះ កម្ពុជា អាចទទួលបានភ្ញៀវទេសចរអន្តរជាតិជាង ១លាននាក់ ឬអាចច្រើនជាងនេះ និងប្រមាណ ២លាននាក់ នៅឆ្នាំ ២០២៣ ដែលជាឆ្នាំ កម្ពុជាធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេម។ នេះជាការបញ្ជាក់របស់លោក ថោង ខុន រដ្ឋមន្រ្តីក្រសួងទេសចរណ៍ ក្នុងពិធីបទសន្និបាតបូកសរុបការងារទេសចរណ៍ ការបូកសរុបផែនការស្តារ និងលើកស្ទួយវិស័យទេសចរណ៍កម្ពុជា ក្នុង និងក្រោយវិបត្តិជំងឺកូវីដ-១៩ ដំណាក់កាលទី១ (២០២០-២០២១) និងឆមាសទី១ ឆ្នាំ២០២២ ព្រឹកថ្ងៃទី ១៤ ខែ កក្កដានេះ។

បើតាមលោក ថោង ខុន ភ្ញៀវទេសចរបរទេស ដែលធ្វើដំណើរចូលមកកម្ពុជានាពេលនេះ មានមកពីប្រទេសថៃ វៀតណាម ចិន អាមេរិក ឥណ្ឌូនេស៊ី បារាំង កូរ៉េ ម៉ាឡេស៊ី អង់គ្លេស និងអូស្រ្តាលី ជាដើម។

លោករដ្ឋមន្រ្តីបានបញ្ជាក់ថា កម្ពុជា គឺជាប្រទេសដំបូងគេដែលបានបើកទទួលទេសចរអន្តរជាតិឡើងវិញ នៅក្នុងតំបន់អាស៊ាន។

នៅក្នុងឆមាសទី១ឆ្នាំ ២០២២នេះ ភ្ញៀវទេសចរអន្តរជាតិចូលមកកម្ពុជា មានចំនួន ៥០ម៉ឺននាក់ កើនឡើងក្នុងអត្រា ៣៩៤ភាគរយ បើប្រៀបធៀបរយៈពេលដូចគ្នា ឆ្នាំ ២០២១ ទោះបីជាមានការថយចុះ ៨៤.០៨ភាគរយ ធៀបនឹងឆ្នាំ ២០១៩៕ ទួន សុផល

​​