កម្ពុជា នាំចេញគ្រាប់ស្វាយចន្ទី​ទៅកាន់ទីផ្សារ​អន្តរជាតិ​ប្រមាណ ៦៦ម៉ឺនតោន

រយៈពេល ៧ខែ ឆ្នាំ ២០២២នេះ កម្ពុជា បាននាំចេញគ្រាប់ស្វាយចន្ទីប្រមាណជាង ៦៦ម៉ឺនតោន ទៅកាន់ទីផ្សារ​អន្តរជាតិ ដោយគិតជាទឹកប្រាក់ប្រមាណ ១,០៧៧លានដុល្លារ។ នេះបើតាមទិន្នន័យរបស់សមាគមស្វាយចន្ទីកម្ពុជា។

បើតាមទិន្នន័យនេះ បានបង្ហាញថា ការនាំចេញគ្រាប់ស្វាយចន្ទីទៅកាន់ទីផ្សារអន្តរជាតិ គឺមានការថយចុះ ប្រមាណ ៣៧ភាគរយ ដែលស្មើនឹង ៣៥ម៉ឺនតោន បើធៀបទៅនឹងរយៈពេលដូចគ្នាកាលពីឆ្នាំ២០២១ នាំចេញបាន ១លានតោន។

លោក អួន ស៊ីឡុត ប្រធានសមាគមស្វាយចន្ទីកម្ពុជា បានប្រាប់ “កម្ពុជាថ្មី” ឱ្យដឹងថា  ទីផ្សារដែលមានការនាំចេញគ្រាប់​ស្វាយចន្ទីពីកម្ពុជាច្រើនជាងគេ គឺប្រទេសវៀតណាម មានចំនួន  ៦៤ម៉ឺនតោន។ ចំណែកឯ ២ម៉ឺនតោនផ្សេងទៀត គឺនាំចេញទៅកាន់ ប្រទេសឥណ្ឌា ថៃ និងឡាវ។

ប្រធានសមាគមស្វាយចន្ទី បានបន្ថែមថា គ្រាប់ស្វាយចន្ទីដែលបានកែឆ្នៃរួចហើយ ត្រូវបាននាំចេញទៅកាន់ទីផ្សារជប៉ុន ចិន អារ៉ាប់ និងបណ្ដាប្រទេសក្នុងតំបន់អាស៊ាន។ បើតាមលោក អួន ស៊ីឡុត នៅឆ្នាំនេះ គ្រាប់ស្វាយចន្ទីអាចលក់បាន​ចន្លោះតម្លៃពី ៥.៥០០រៀល ទៅ ៧.២០០រៀល ក្នុងមួយគីឡូក្រាម៕ អត្ថបទ៖ នាង រតនៈ