ទោះមានសង្គ្រាម តែ មីយ៉ាន់ម៉ា រកចំណូលបានជាង ២.២ ពាន់លានដុល្លារពីការនាំចេញផលកសិកម្ម

ក្រសួងពាណិជ្ជកម្មមីយ៉ាន់ម៉ាបានឲ្យដឹងថា ប្រទេសមីយ៉ាន់ម៉ារកចំណូលបានជាង ២.២៨ ពាន់លានដុល្លារអាមេរិកពីការនាំចេញផលិតផលកសិកម្មក្នុងរយៈពេលជិត ៨ ខែនៃឆ្នាំ ២០២២ ដែលគិតចាប់ផ្តើមនៅក្នុងខែមេសា ទោះបីជាប្រទេសកំពុងស្ថិតក្នុងភាពស្មុគស្មាញនៃសង្គ្រាមក៏ដោយ ។

ការនាំចេញកសិផលទាំងអស់ ចាប់ពីថ្ងៃទី ១ ខែមេសា ដល់ថ្ងៃទី ២៥ ខែវិច្ឆិកា ឆ្នាំ ២០២២នេះ គឺធ្វើឡើងដោយវិស័យឯកជនតែម្នាក់ឯងប៉ុណ្ណោះ និងរកបាន ២.២៨ ពាន់លានដុល្លារអាមេរិក ។

តួលេខរបស់ក្រសួងពាណិជ្ជកម្មបានបង្ហាញថា ប្រាក់ចំណូលបានកើនឡើងជាង ៤៦ លានដុល្លារអាមេរិក ធៀបនឹងរយៈពេលដូចគ្នាកាលពីឆ្នាំមុន ។

ទិន្នន័យផ្លូវការបានបង្ហាញថា តម្លៃនៃការនាំចេញសរុបរបស់ប្រទេសមីយ៉ាន់ម៉ា ក្នុងអំឡុងពេលដែលបានរៀបរាប់ខាងលើក៏បានកើនឡើងជាង ១.៧ ពាន់លានដុល្លារអាមេរិកផងដែរ ។

ទន្ទឹមនោះ ការនាំចេញសរុបរបស់មីយ៉ាន់ម៉ារួមមាន ផលិតផលកសិកម្ម ផលិតផលសត្វ ផលិតផលសមុទ្រ រ៉ែ ផលិតផលព្រៃឈើ ទំនិញផលិត និងផ្សេងៗទៀតជាដើម ។ ការនាំចេញភាគច្រើនរបស់ប្រទេសគឺផលិតផលកសិកម្ម និងទំនិញផលិតពីរោងចក្រ ដោយនាំចេញទៅកាន់ចិន ថៃ បង់ក្លាដេស និងឥណ្ឌា ។

ប្រែសម្រួលដោយ ៖ រតនៈ

ប្រភព ៖ Xinhua

ចុចអាន ៖ FBI បើកការស៊ើបអង្កេតក្រុមហ៊ុនដាក់បន្ទះឈីបក្នុងខួរក្បាលរបស់លោក Elon Musk