ធនាគារ BIDC សាខាក្រុងតាខ្មៅ ខេត្តកណ្ដាល បានបើកដំណើរការជាផ្លូវការហើយ

នៅថ្ងៃទី២២ ខែធ្នូ ឆ្នាំ២០២២ ធនាគារវិនិយោគ និងអភិវឌ្ឍន៍កម្ពុជា (BIDC Bank) បានបើកដំណើរការសាខាថ្មីបន្ថែមមួយទៀតជាផ្លូវការហើយ គឺធនាគារ BIDC សាខាតាខ្មៅ ដែលមានទីតាំងនៅអគារលេខ២១៨ ផ្លូវជាតិលេខ២ ភូមិតាខ្មៅ សង្កាត់តាខ្មៅ ក្រុងតាខ្មៅ ខេត្តកណ្តាល។

លោក ឡាំ វ៉ាន់ហៃ នាយកប្រតិបត្តិធនាគារ BIDC បានថ្លែងថា ចាប់តាំងពីបើកដំណើរការក្នុងឆ្នាំ២០០៩មក ធនាគារ BIDC បានប្រតិបត្តិការជាង ១៣ឆ្នាំហើយ និងបានក្លាយទៅជាធនាគារ​ពាណិជ្ជ​ឈាន​មុខ​គេ​នៅ​ប្រទេស​កម្ពុជា​ ដែល​ធនាគារមាន​ទ្រព្យ​សកម្ម​សរុបជាង ៨៦០លាន​ដុល្លារ។

លោក ឡាំ វ៉ាន់ហៃ គូសបញ្ជាក់ថា ទីតាំងនៃការបើកដំណើរការធនាគារ BIDC សាខាតាខ្មៅនេះ គឺស្ថិតនៅចំកណ្តាលទីក្រុងតាខ្មៅ ដែលជាទីក្រុងដែលមានការអភិវឌ្ឍខ្លាំង ហើយការពង្រីកខ្លួននេះបានបញ្ជាក់អំពីជំហររបស់ធនាគារ BIDC នៅក្នុងទីផ្សារប្រកួតប្រជែងនៃប្រទេសកម្ពុជា។

លោក បានបន្ថែមថា ជាមួយនឹងបណ្តាញសាខាទាំង៩ នៅក្នុងប្រទេសកម្ពុជា និងប្រទេសវៀតណាម ធនាគារ BIDC បានផ្តល់ជូនសេវាកម្មនានាជាច្រើន ជាពិសេសមុខងារ eKYC (ការបង្កើតគណនីអនឡាញ) មុខងារ QR code (ការទូទាត់តាមប្រព័ន្ធQR) និងមុខងារ Mobile Banking (កម្មវិធីធនាគារចល័ត)​ រវាងកម្ពុជា និងប្រទេសវៀតណាម។ លើសពីនេះ ធនាគារ BIDC នឹងបន្តពង្រឹងគុណភាពសេវាកម្ម ព្រមទាំងផ្តល់ជូននូវបទពិសោធន៍ធនាគារដ៏ល្អបន្ថែមទៀតដល់អតិថិជននៃធនាគារ BIDC។

លោក រ័ត្ន សុវណ្ណនរៈ ឧបការីទេសាភិបាល និងជាអគ្គនាយកត្រួតពិនិត្យ នៃធនាគារជាតិនៃកម្ពុជា បានបង្ហាញការចូលរួមអបអរសាទរ​ជាមួយភាគទុនិក ក្រុមប្រឹក្សាភិបាល គណៈគ្រប់គ្រង និងបុគ្គលិកទាំងអស់​រ​ប​ស់​ធនាគារ​ BIDC ចំពោះសមិទ្ធផលសម្រេចបានជាច្រើនរបស់ធនាគារ រួម​ទាំ​ង​ការពង្រីកបណ្តាញប្រតិបត្តិការ និងទំនើបកម្មសាខាជាបន្តបន្ទាប់។

ត្រង់ន័យនេះ លោក រ័ត្ន សុវណ្ណនរៈ បានបញ្ជាក់ថា ការណ៍នេះបង្ហាញពីសក្ខីភាពនៃការជឿទុកចិត្តរបស់ភាគទុនិក និងវិនិយោគិនចំពោះ​ធនាគារ BIDC ក៏ដូចជាការរួមចំណែកលើកកម្ពស់បរិយាបន្នហិរញ្ញវត្ថុនៅកម្ពុជា តាមរយៈការសម្រួល និង​ផ្តល់លទ្ធភាពដល់ប្រជាពលរដ្ឋ និងពាណិជ្ជករឲ្យទទួលបាន​សេវាហិរញ្ញវត្ថុផ្លូវការស្របតាមតម្រូវការ មាន​តម្លៃសមរម្យ និងមានកិច្ចការពារតាមផ្លូវច្បាប់ជាដើម៕