ទូតចិន៖ កម្ពុជា ជាគោលដៅនៃការ​ធ្វើដំណើរចេញក្រៅប្រទេសរបស់ចិន​ទាំងធុរកិច្ច និងទេសចរ

លោក វ៉ាង វិនធៀន ឯកអគ្គរដ្ឋទូតចិនប្រចាំកម្ពុជា បានបញ្ជាក់ថា ចិនបានចាប់ផ្តើមបើកប្រទេសឡើងវិញ ហើយកម្ពុជា ជាគោលដៅ នៃការធ្វើដំណើរចេញក្រៅប្រទេសរបស់ចិន ទាំងផ្នែកធុរកិច្ច និងទេសចរណ៍។ លោកថ្លែងបែបនេះ នៅក្នុងពិធីបើកការដ្ឋានសាងសង់ ស្ពានឆ្លងកាត់ទន្លេមេគង្គខេត្តក្រចេះ និងផ្លូវតភ្ជាប់ នាព្រឹកថ្ងៃទី ០២ ខែមករា ឆ្នាំ ​២០២៣។

ឆ្លើយតបនឹងឯកអគ្គរដ្ឋទូតចិនប្រចាំកម្ពុជា សម្តេចតេជោ ហ៊ុន សែន នាយករដ្ឋមន្រ្តី មានប្រសាសន៍ថា កំណើន​សេដ្ឋកិច្ចកម្ពុជា នឹងស្ទុះឡើងតាមរយៈទេសចរចិន ក្រោយពីរដ្ឋាភិបាលចិន បានបើកប្រទេសឡើងវិញ។ សម្តេចតេជោ បានថ្លែងដោយយោងតាមរបាយការណ៍របស់រដ្ឋមន្រ្តីក្រសួងទេសចរណ៍ថា នៅឆ្នាំ ២០២២ កម្ពុជាទទួល​បានភ្ញៀវ​ទេសចរអន្តរជាតិប្រមាណជាង ២លាននាក់។ ភ្ជាប់ជាមួយចំណុចនេះ សម្តេចរំពឹងថា ក្រោយចិនបើកប្រទេសវិញ តែទេសចរចិនមួយនឹងទទួលបានជាង ២លាននាក់ ដោយមិនគិតទេសចរប្រទេសដទៃទៀត។

សម្ដេចតេជោ សង្កត់ធ្ងន់ថា «អ្នក(ប្រទេស) ដែលតឹងតែងជាមួយចិន ក៏តឹងតែងទៅចុះ កម្ពុជាមិនតម្រូវលក្ខខណ្ឌអ្វីឡើយ ចិនអាចមកទស្សនាកម្ពុជាធម្មតា»។ ក្នុងន័យនេះ សម្ដេចតេជោ មានប្រសាសន៍ថា ប្រទេសដទៃ តម្រូវឲ្យអ្នកទេសចរចិន ធ្វើនេះ ធ្វើនោះ គឺជារឿងរបស់ពួកគេ តែសម្រាប់ប្រទេសកម្ពុជា អញ្ជើញប្រជាជនចិន អ្នកទេសចរចិន មកកាន់ប្រទេស​កម្ពុជា។

ការបើកប្រទេសឡើងវិញរបស់ចិន នឹងក្លាយជាឱកាសល្អសម្រាប់វិនិយោគិនកម្ពុជា និងចិនបានជួបគ្នាដោយផ្ទាល់ ដើម្បីពិភាក្សាការធ្វើធុរកិច្ច។ ការភ្ជាប់ទំនាក់ទំនងរវាងអ្នកធុរកិច្ចនៃប្រទេសទាំងពីរនេះ នឹងជំរុញកិច្ចព្រមព្រៀងទ្វេភាគី ឱ្យមានប្រសិទ្ធភាព លើការនាំចេញពីកម្ពុជា ទៅកាន់ប្រទេសចិន ពិសេស​ផលិតផលកសិកម្ម ដែលចិន ជាទីផ្សារធំ​របស់កម្ពុជា។

រំហូរនៃវិនិយោគបរទេសមកកម្ពុជា ភាគច្រើនចេញមកពីតំបន់អាស៊ី ជាពិសេសប្រទេសចិន ដែលមានចំនួនជិត៥០ភាគ​រយនៃការវិនិយោគផ្ទាល់ពីបរទេសសរុប ធ្វើឱ្យប្រទេសនេះឈរនៅលំដាប់ទី១។ ការវិនិយោគរបស់ចិន ផ្តោតជាចម្បងទៅ​លើ​វិស័យផលិតកម្ម, ហិរញ្ញវត្ថុ, សំណង់, អចលនទ្រព្យ និងលំនៅដ្ឋាន។ នេះបើតាមរបាយការណ៍ស្ថិរភាពហិរញ្ញវត្ថុឆ្នាំ ២០២១ ផ្សព្វផ្សាយដោយធនាគារជាតិនៃកម្ពុជា។

លោកបណ្ឌិត ហុង វណ្ណៈ អ្នក​ជំនាញ​សេដ្ឋកិច្ច​​វិទ្យាស្ថាន​ទំនាក់ទំនង​អន្តរជាតិ​នៃ​រាជ​បណ្ឌិត​សភា​កម្ពុជា បានលើក​ឡើងថា កម្ពុជា មានទំនាក់ទំនងល្អ និងមានកិច្ចព្រមព្រៀងភាពជាដៃគូយុទ្ធសាស្រ្តគ្រប់ជ្រុងជ្រោយជា​មួយចិនតាំងពីឆ្នាំ ២០១០មក ដោយកម្ពុជា ចិន មានរំហូរវិនិយោគជាមួយគ្នាជាច្រើន។ លោក បន្តថា តាមរយៈកិច្ចព្រមព្រៀងផ្សេងៗ ជាបន្តបន្ទាប់មក ធ្វើឱ្យរំហូរវិនិយោគចិនច្រើនណាស់មកកម្ពុជា ជាមួយនឹងទេសចរចិនលំដាប់ឈានមុខ។ ចំពោះការ​ប្រកាសបើកប្រទេសទូលាយឡើងវិញរបស់ចិននេះ ជាឱកាសល្អសម្រាប់កម្ពុជា ក្នុងការវិនិយោគ ពិសេសអភិវឌ្ឍ​អគារដែលជាប់គាំមួយចំនួន ដូចជា នៅខេត្តព្រះសីហនុ និងការវិនិយោគផ្សេងទៀត ស្របពេលដែលកម្ពុជា មាន​កិច្ចព្រមព្រៀង FTA ជាមួយប្រទេសចិនទៀតផង។ លោកបន្ថែមដូច្នេះ« នេះជាការសាទរមួយយ៉ាងខ្លាំង ដែល​សម្តេចតេជោ បានប្រកាសស្វាគមន៍ វិនិយោគ និងទេសចរចិន ដែលសមស្រប​នឹងគោលនយោបាយ​បើកចំហរ​របស់ប្រទេសចិន»។

លោកបណ្ឌិត មើលឃើញថា វិនិយោគិនចិន នឹងចូលមកបន្តវិនិយោគទាំងគម្រោងចាស់ និងគម្រោងថ្មីៗបន្តទៀត ដែលនេះជាការផ្តល់អត្ថប្រយោជន៍យ៉ាងច្រើន ជំរុញឱ្យមានសកម្មភាពគ្រប់ផ្នែក រួមចំណែកដល់វិស័យសេដ្ឋកិច្ចកម្ពុជា កាន់តែរីកចម្រើននៅឆ្នាំ ២០២៣៕