ព្រះរាជាណាចក្រកម្ពុជាមានក្ដីរំពឹងខ្ពស់ពីកំណើនទេសចរចិន បន្ទាប់ពីរដ្ឋាភិបាលចិនបានប្រកាសថា​នឹងបិទបញ្ចប់ការតម្រូវ​ឱ្យធ្វើចត្តាឡីស័កសម្រាប់អ្នកដំណើរចូលមកក្នុងប្រទេសចាប់ពីថ្ងៃទី៨ ខែមករា ឆ្នាំ២០២៣ តទៅ ដែលជាសញ្ញាវិជ្ជមាន​មួយ​ទៅ​រកការបើកប្រទេសឡើងវិញ​ បន្ទាប់ពីបិទច្រកទ្វារអន្តរជាតិតាំងពី​ដើម​ឆ្នាំ ២០២០។

លោកស្រី ឆាយ ស៊ីវលីន ប្រធាន​សមាគម​ទីភ្នាក់ងារ​ទេសចរណ៍​កម្ពុជាបានថ្លែងបញ្ជាក់ថា កម្ពុជា​រំពឹងថា នឹងមានការកើនឡើង​ច្រើននូវអ្នកទេសចរចិន បន្ទាប់ពីបម្រាមនៅប្រទេសចិន​ត្រូវបាន​បន្ធូរបន្ថយ ហើយអ្នកទេសចរចិន​ពិតជាចង់ធ្វើដំណើរ​មកម្ពុជា។

ជុំវិញបញ្ហានេះ ប្រមុខដឹកនាំរាជរដ្ឋាភិបាលកម្ពុជា សម្ដេចតេជោ ហ៊ុន សែន នៅថ្ងៃទី ០២ ខែមករា ម្សិលមិញ​បានថ្លែងបញ្ជាក់ថា កម្ពុជាគោលដៅទេសចរណ៍ដ៏ទាក់ទាញសម្រាប់ទេសចរចិន ខណៈដែលចិនត្រៀមបើក​ប្រទេស​ឡើងវិញដោយរំហូរប្រជាជនខ្ទង់លាននាក់នឹងធ្វើដំណើរកម្សាន្តនៅលើពិភពលោក។

មុនពេលផ្ទុះជំងឺកូវីដ១៩ កម្ពុជាទទួលទេសចរចិនជាង២លានក្នុងមួយឆ្នាំ។ សម្ដេចតេជោ ហ៊ុន សែន រំពឹងទទួលបានទេសចរចិន២លាននាក់នៅឆ្នាំ២០២៣ ក្នុងចំណោមទេសចរ​សរុបប្រមាណ​៥លាននាក់ ដែលនឹងធ្វើឲ្យកំណើន​សេដ្ឋកម្ពុជាផ្ដើមរើបឡើងវិញ៕