ព័ត៌មានជាតិ

ផ្លូវកាត់ពីថ្មដាទៅសមុទ្រខេត្តកោះកុង សង់រួចតាំំងពីឆ្នាំ២០១៦ ចាក់បេតុងបាន ១ គីឡូម៉ែត្រ

បានផុស

៥ years មុន

នៅ

ថ្ងៃអង្គារ ១២ មករា ២០២១

ដោយ

ផ្លូវក្រវ៉ាត់ប្របតាមព្រំដែនកម្ពុជា-ថៃ ប្រវែង ៦២ គម តភ្ជាប់ពីផ្លូវជាតិលេខ ៤៨ ត្រង់ចំណុចភូមិថ្មី ឃុំបាក់ខ្លង ស្រុកមណ្ឌលសីមា ខេត្តកោះកុង ដល់ភូមអូររំដេង ឃុំថ្មដា ស្រុកវាលវែង ខេត្តពោធិសាត់ បានបើកឲ្យប្រើប្រាស់នៅឆ្នាំ២០១៦។

លោក គង់ ភឿន ប្រធាននាយកដ្ឋានផ្លូវលំជនបទនៃក្រសួងអភិវឌ្ឍន៍ជនបទបានប្រាប់កម្ពុជាថ្មីនៅព្រឹកនេះថា ផ្លូវមួយខ្សែនេះក្រាលដោយក្រួសក្រហម និងចាក់បេតុងបានជាង ១គម ស្ថាបនារួចរាល់តាំងពីឆ្នាំ២០១៦ ជាគម្រោងរបស់ក្រសួងអភិវឌ្ឍជនបទ។

ផ្លូវមានប្រវែងជាង ៦០ គីឡូម៉ែត្រនេះ មានសារសំខាន់សម្រាប់តភ្ជាប់ច្រកសេដ្ឋកិច្ចធំពីរគឺថ្មដា និងច្រកចាំយាមរបស់ខេត្តកោះកុង។ ស្ថានភាពបច្ចុប្បន្ន មិនទាន់មានចរាចរណ៍មមាញឹកនៅឡើយទេ តែរថយន្តធម្មតាអាចជិះធ្វើដំណើរទៅបាន តែក៏ត្រូវមានការប្រុងប្រយ័ត្នដែរ ដោយសារមានសភាពបត់បែនមានការឡើងចុះចំណោតខ្លះ។

បើតាមលោកប្រធាននាយកដ្ឋាន រដ្ឋាភិបាលអាចអភិវឌ្ឍផ្លូវមួយខ្សែនេះ នៅពេលច្រកថ្មដាក្លាយជាច្រកអន្តរជាតិ មានកំណើនប្រជាពលរដ្ឋរស់នៅ ការដឹកជញ្ជូនទំនិញ ហើយក៏ជាផ្លូវកាត់របៀងចេញពីថ្មដាទៅខេត្តកោះកុង ឬបន្តទៅខេត្តជាប់ឆ្នេរដទៃទៀត។

ព័ត៌មានមួយចំនួនពីផ្លូវកាត់ពីថ្មដាទៅកោះកុងមាន៖

-ប្រវែងផ្លូវ ៦២ គ.ម

-ផ្លូវបេតុង ១ គម

-ស្ពានបេតុង (ទទឹង ៧ ម) ចំនួន ១៧ កន្លែង

-លូប្រអប់ ២៧ កន្លែង

-លូដោះទឹកគ្រប់ប្រភេទ ១២៦ កន្លែង

-ទំនប់តម្កល់ទឹកទុក ១ កន្លែង

-សំណង់បង្ហូរតាមស្ពាន ៤ កន្លែង

-សំណង់ថ្នល់បង្ហៀរ ៤ កន្លែង ៩០ ម

-ស្រះទឹក (២០ ម x ១០ ម) ២៥ កន្លែង ។