អត្រា​អតិផរណា​ ឡាវ​ ​ធ្លាក់​ចុះ​តែ ១ ភាគរយប៉ុណ្ណោះ​ក្នុង​ខែ​ឧសភា

បើយោងតាមព័ត៌មានពីការិយាល័យស្ថិតិឡាវ (LSB) បានឲ្យដឹងថា អត្រាអតិផរណានៅឡាវក្នុងខែឧសភានេះ បានធ្លាក់ចុះ​មកនៅត្រឹម​ ៣៨.៨៦ ភាគរយ ពោលចុះ​តែ ១ ភាគរយប៉ុណ្ណោះ បើគិតចាប់ពីខែមេសាមក ។

នៅក្នុងខែមេសា អត្រាអតិផរណាឡាវ មានប្រមាណ ៣៩.៨៩ ភាគរយ ហើយនៅក្នុងខែមីនាគឺមានរហូតដល់ ៤០.៩៧ ភាគរយ ខណៈរយៈពេលដូចគ្នាក្នុងខែឧសភា ឆ្នាំ​២០២២ អតិផរណាឡាវ មានត្រឹមតែ ១២.៨ ភាគរយប៉ុណ្ណោះ ដែលពេលនោះជាអតិផរណាមួយ​ដ៏ខ្ពស់បំផុត​ក្នុងរយៈពេល ១៥ ឆ្នាំកន្លងមក ។

ជាមួយគ្នានេះ ការបន្តទម្លាក់តម្លៃនៃប្រាក់គីបឡាវ (LAK) រួមចំណែកយ៉ាងសំខាន់ដល់អតិផរណានេះ ព្រោះប្រហែលមួយភាគបីនៃទំនិញដែលរួមបញ្ចូលក្នុងការគណនាតម្លៃ​នេះ គឺជាការនាំចូល ។

បើតាមកាសែត Vientiane Times ចុះផ្សាយថា តម្លៃអាហារ និងភេសជ្ជៈគ្មានជាតិអាល់កុល បានកើនឡើង ៥២.៦៩ ភាគរយនៅក្នុងខែឧសភា ខណៈដែលតម្លៃថ្នាំពេទ្យ និងការថែទាំវេជ្ជសាស្រ្តកើនឡើងដល់ ៤០.៧៨ ភាគរយ ។

ដោយឡែក សេវាកម្មសណ្ឋាគារ និងភោជនីយដ្ឋានកើនឡើង ៣៧.៤ ភាគរយ រួមជាមួយតម្លៃផ្ទះ ទឹក អគ្គិសនី និងហ្គាសចម្អិនអាហារក៏កើនឡើងផងដែរ ។

ដោយ​សារការបន្តធ្លាក់ថ្លៃ​រូបិយប័ណ្ណ​ក្នុងស្រុក ធនាគារនៃប្រទេសឡាវ បានដាក់នាយកដ្ឋានគ្រប់គ្រងរូបិយប័ណ្ណបរទេសរបស់ខ្លួនឡើងវិញ ដើម្បីព្យាយាមធ្វើឲ្យស្ថានការណ៍ស្ថិតក្រោមការគ្រប់គ្រងបាន ហើយទោះបីមានបញ្ហាអតិផរណាក៏ដោយ ក៏អ្នកសេដ្ឋកិច្ចយល់ឃើញថា កំណើនសេដ្ឋកិច្ចឡាវនឹងកើនឡើង​ ៤.៥ ភាគរយឆ្នាំនេះ ។

ទោះយ៉ាងណាក៏ដោយ មូលនិធិរូបិយវត្ថុអន្តរជាតិ (IMF) និងធនាគារពិភពលោក ក៏បានព្រមានដែរថា ទំហំនៃបំណុលសាធារណៈឡាវ និងបំណុលក្រៅប្រទេស ក៏អាចបង្កហានិភ័យយ៉ាងខ្លាំងចំពោះប្រទេសនេះផងដែរ ៕

ប្រែសម្រួល៖ នាង រតនៈ

ប្រភព៖ Laotian times

ចុចអាន ៖ CEO ធនាគារ Bank of America ព្យាករណ៍ថា វិបត្តិសេដ្ឋកិច្ច អាមេរិក នឹង​កើតមានឡើងនៅឆមាសទី ២