ក្រសួងពាណិជ្ជកម្មនឹងលុបម៉ាក បើម្ចាស់ម៉ាកមិនធ្វើសេចក្ដីប្រកាសប្រើប្រាស់ឡើងវិញ

ក្រសួងពាណិជ្ជកម្មនឹងលុបម៉ាកចេញពីបញ្ជី ប្រសិនបើម្ចាស់ម៉ាកខកខានមិនបានធ្វើសេចក្តីប្រកាសអំពីការប្រើប្រាស់ឡើងវិញទេនោះ។

យោងតាមសេចក្តីជូនដំណឹងស្ដីពី ម៉ាក ពាណិជ្ជនាម និងអំពើ នៃការប្រកួតប្រជែងមិនស្មោះត្រង់ ដែលទើបទទួលបាននៅរសៀលថ្ងៃទី១៣ សីហានេះ បានឱ្យដឹងថា យោងតាមមាត្រា២១ នៃអនុក្រឹត្យស្តីពីការអនុវត្តច្បាប់ ស្តីពី ម៉ាក ពាណិជ្ជនាម និងអំពើ នៃការប្រកួតប្រជែងមិនស្មោះត្រង់ ត្រូវធ្វើសេចក្តីប្រកាសអំពីការប្រើប្រាស់ ឬមិនបានប្រើប្រាស់ម៉ាក ក្នុងរយៈពេល ១ (មួយ) ឆ្នាំ បន្ទាប់ពីខួបលើកទី៥ (ប្រាំ) នៃកាលបរិច្ឆេទចុះបញ្ជីម៉ាក។ នៅពេលម៉ាក​ត្រូវបានចុះបញ្ជីសារឡើង​វិញ ម្ចាស់ម៉ាកត្រូវប្រកាសអំពីការប្រើប្រាស់ម៉ាក ឬមិនបានប្រើប្រាស់ម៉ាករបស់ខ្លួន ក្នុងរយៈពេល ១ (មួយ) ឆ្នាំ បន្ទាប់ពីខួបលើកទី៥ (ប្រាំ) នៃកាលបរិច្ឆេទចុះបញ្ជីម៉ាកសាឡើងវិញ។

ក្រសួងបានបន្តថា ក្នុងករណី អ្នកឧកញ៉ា លោកឧកញ៉ា លោក-លោកស្រី អ្នកនាងកញ្ញា ដែលជាម្ចាស់ម៉ាកខកខានមិនបានធ្វើសេចក្តីប្រកាសអំពីការប្រើប្រាស់ ឬមិនបានប្រើប្រាស់ម៉ាក ដូចកាលកំណត់ខាងលើ ម៉ាកដែលបានចុះបញ្ជីរួច នឹងត្រូវលុបចេញពីបញ្ជីម៉ាក។

ចំពោះព័ត៌មានលម្អិត សូមទំនាក់ទំនង នាយកដ្ឋានកម្មសិទ្ធិបញ្ញា នៃក្រសួងពាណិជ្ជកម្ម តាមរយៈលេខទូរស័ព្ទ ០២៣ ៨៦៦ ១១៤ សារអេឡិចត្រូនិក៖ [email protected] ៕

អត្ថបទ៖ សំអឿន