Elon Musk ថា អាមេរិក លេងលើសហើយក្នុងការប្រើប្រាក់ដុល្លារជាអាវុធ

មហាសេដ្ឋី Elon Mask បានព្រមានថា សហរដ្ឋអាមេរិកបានលេងលើសពេកហើយក្នុងការប្រើប្រាស់ប្រាក់ដុល្លារជាអាវុធតតាំងជាមួយនឹងទណ្ឌកម្ម ដោយជំរុញឲ្យប្រទេសជាច្រើនទៀតនៅជុំវិញពិភពលោកកាត់បន្ថយប្រតិបត្តិការដោយប្រើរូបិយប័ណ្ណក្នុងស្រុកជំនួសវិញ ជាពិសេសប្លុកប្រទេស BRICE ។

មហាសេដ្ឋីរូបនេះបានលើកឡើង​ក្នុង​កម្មវិធី​ Twitter Spaces ដែលរៀបចំដោយសហគ្រិនអាមេរិកលោក David Sachs កាលពីថ្ងៃចន្ទថា ប្រទេសជាច្រើនកំពុងតែដកប្រាក់ដុល្លារចេញពីប្រតិបត្តិការរបស់ពួកគេ ដោយសារតែការបង្ខំពីអាមេរិក ។

Elon Musk បន្ថែមថា វាមិនមែនជាជម្រើសឡើយក្នុងការផ្លាស់ប្តូរ​ ប៉ុន្តែជាភាពចាំបាច់តែម្តងដែលបង្ខំដោយការដាក់ទណ្ឌកម្ម​ពីសំណាក់លោកខាងលិចលើរុស្ស៊ី ។ ជាពិសេស ប្រទេសក្នុងប្លុក BRICE ដែលរួមមានទាំង ប្រេស៊ីល និងឥណ្ឌាផងដែរនោះ នៅតែចង់ធ្វើប្រតិបត្តិការជាមួយរុស្ស៊ី ។ ពួកគេមិនអាចធ្វើប្រតិបត្តិការដោយប្រើប្រាក់ដុល្លារបានទេ ដូច្នេះ អាមេរិកបានបង្ខំពួកគេឲ្យដកប្រាក់ដុល្លារពីប្រតិបត្តិការដែលធ្វើឲ្យកម្លាំងប្រាក់ដុល្លារនៅលើពិភពលោកចុះខ្សោយ ។

ការប្រើប្រាស់ប្រាក់ដុល្លារជាអាវុធ បានជំរុញឲ្យប្រទេសជាច្រើនស្វែងរកជម្រើសជំនួស បន្ទាប់ពីទណ្ឌកម្មបានកាត់ផ្តាច់រុស្ស៊ីយ៉ាងមានប្រសិទ្ធភាពចេញពីប្រព័ន្ធហិរញ្ញវត្ថុលោកខាងលិច។

គួរឲ្យដឹងថា អ្នកសេដ្ឋកិច្ចល្បីៗមួយចំនួនព្រមានម្តងហើយម្តងទៀតថា ឥទ្ធិពលនៃស្ថាប័នហិរញ្ញវត្ថុដែលមានមូលដ្ឋានលើប្រាក់ដុល្លារ និងគោលនយោបាយសេដ្ឋកិច្ចរបស់សហរដ្ឋអាមេរិកដ៏គឃ្លើន នឹងជំរុញឲ្យប្រទេសជាច្រើនទៀតនៅជុំវិញពិភពលោកបោះបង់ចោលប្រតិបត្តិការប្រាក់ដុល្លារ និងផ្លាស់ទៅប្រើរូបិយប័ណ្ណក្នុងស្រុកវិញសម្រាប់ពាណិជ្ជកម្ម ៕

ប្រែសម្រួល៖ នាង រតនៈ

ប្រភព៖ RT