ឡាវ កំពុងពិចារណាដំឡើងអាករលើតម្លៃបន្ថែម

ក្រសួងហិរញ្ញវត្ថុឡាវកំពុងពិចារណាដំឡើងអត្រាលើអាករតម្លៃបន្ថែម (VAT) ពី ៧ ទៅ ១០ ភាគរយវិញ ដើម្បីបង្កើនប្រាក់ចំណូលរបស់រដ្ឋាភិបាល និងគាំទ្រសេដ្ឋកិច្ចក្នុងប្រទេសផងដែរ ។

ការដំឡើងអាករលើតម្លៃបន្ថែម​ទៅ ១០ ភាគរយ​វិញ គឺ​ជាអត្រាពន្ធដើមដែលឡាវបានកំណត់ ចាប់តាំងពីឆ្នាំ​​ ២០១០ ដល់ ២០២១ ខណៈកាលពីឆ្នាំ ២០២២ ឡាវបានអនុម័តអត្រាអាករលើតម្លៃបន្ថែមមកនៅត្រឹមតែ ៧ ភាគរយប៉ុណ្ណោះ ។

ទន្ទឹមនោះ ការដំឡើងដល់អត្រា ១០ ភាគរយវិញនេះ ដោយសារ​តែតម្លៃបច្ចុប្បន្ន មិនអាចជំរុញកំណើនសេដ្ឋកិច្ច​បានដូចទៅនឹងការព្យារករណ៍ទុកមុននោះឡើយ ។​ ចំនួនអាជីវកម្មដែលបានចុះបញ្ជីនៅក្រោមច្បាប់អាករលើតម្លៃបន្ថែមបច្ចុប្បន្នមានកម្រិតទាបជាងការរំពឹងទុក ហើយរដ្ឋាភិបាលត្រូវការបង្កើនប្រាក់ចំណូល ដើម្បីកាត់បន្ថយឱនភាពថវិកា និងរក្សាស្ថិរភាពរូបិយប័ណ្ណគីប ។

បើយោងតាមនាយកដ្ឋានហិរញ្ញវត្ថុឡាវបានឲ្យដឹងថា សម្រាប់សេចក្តីព្រាងច្បាប់ថ្មីដើម្បីបង្កើនអត្រាអត្រាអាករលើតម្លៃបន្ថែមនេះរំពឹងនឹងបញ្ចប់នៅឆ្នាំនេះ ហើយនិងចូលជាធរមាននៅដើមឆ្នាំ ២០២៤ ៕

ប្រែសម្រួល៖ នាង​ រតនៈ

ប្រភព៖​ Laotian Times