ថៃ រកបានការវិនិយោគជិត ៨.៥ ពាន់លានដុល្លារពីក្រុមហ៊ុនបច្ចេកវិទ្យាធំៗ​របស់ អាមេរិក

ប្រទេសថៃ​​ទទួលបានការវិនិយោគជាង ៣០០ ពាន់លានបាត ឬប្រហែលជិត ៨.៥ ពាន់លានដុល្លារពីក្រុមហ៊ុនបច្ចេកវិទ្យាធំៗរបស់អាមេរិក​ដូចជា Amazon Web Service, Google និង​ Microsoft ។

ក្រុមហ៊ុន Amazon Web Service នឹងវិនិយោគចំនួន ១៩០ ពាន់លានបាតស្មើនឹងប្រហែល​ ៥ ពាន់លានដុល្លារក្នុងការបង្កើតមជ្ឈមណ្ឌលទិន្នន័យ AWS Asia Pacific ក្នុងទីក្រុងបាងកករយៈពេល ១៥ ឆ្នាំ ដែលនឹងក្លាយជាមជ្ឈមណ្ឌលទិន្នន័យខ្នាតយក្សដំបូងបង្អស់របស់ថៃ ។ មិនតែប៉ុណ្ណោះ ក្រុមហ៊ុនក៏ចាប់អារម្មណ៍លើបច្ចេកវិទ្យា AI, ការវិភាគទិន្នន័យ និងសេវាអ៊ីនធឺណិតជាដើម ។

ចំណែក ក្រុមហ៊ុន Microsoft ដែលបានចុះហត្ថលេខាលើអនុស្សរណៈនៃការយោគយល់គ្នា (MOU) ជាមួយថៃ នឹងលើកកម្ពស់ការប្រកួតប្រជែងក្នុងវិស័យបច្ចេកវិទ្យាឌីជីថល និងអនុញ្ញាតឲ្យថៃផ្តល់សេវាអេឡិចត្រូនិចបន្ថែមទៀតកាន់តែមានប្រសិទ្ធភាព ។

ចំពោះ Google វិញ បានវិនិយោគ​លើមជ្ឈមណ្ឌលទិន្នន័យ​ធំៗក្នុងប្រទេសថៃ ដែលនឹងជំរុញការប្រកួតប្រជែងក្នុងឧស្សាហកម្មឌីជីថល និងជួយជំរុញកំណើនសេដ្ឋកិច្ចជាតិ ខណៈការវិនិយោគនេះធ្វើឡើង នៅពេលដែលលោកនាយករដ្ឋមន្ត្រីថៃ សេដ្ឋា ថាវីស៊ីន បានជួបជាមួយមេដឹកនាំកំពូលរបស់ក្រុមហ៊ុនទាំង ៣ លើទឹកដីនៃសហរដ្ឋអាមរិក ៕​

ប្រែសម្រួល៖ នាង រតនៈ

ប្រភព៖ Bangkok Post