ត្រឹមដើមខែ ១១ ថៃ មានទេសចរចូលលេងកម្សាន្តជាង ២៣ លាននាក់ និង​កើបលុយ ២៧ ពាន់លានដុល្លារ

ចាប់ពីថ្ងៃទី១ ខែមករាដល់ថ្ងៃទី១២ ខែវិច្ឆិកា ឆ្នាំ២០២៣ នេះ ប្រទេសថៃទទួលបានទេសចរបរទេស​ជាង ២៣ លាននាក់ និងសរុបជាទឹកប្រាក់បានចំនួន ២៧ ពាន់លានដុល្លារ ខណៈគោលដៅទេសចរថៃនៅឆ្នាំនេះមានដល់ទៅ ២៨ លាននាក់ឯណោះ ។

យោងតាមក្រសួងទេសចរណ៍ និងកីឡាបានឲ្យដឹងថា ម៉ាឡេស៊ីឈរនៅលំដាប់កំពូលក្នុងបញ្ជីភ្ញៀវបរទេសដែលមកកាន់ប្រទេសថៃ ដែលមានចំនួនជាង ៣.៨២ លាននាក់ បន្ទាប់មកគឺចិន មានជាង ២.៩ លាននាក់​, កូរ៉េខាងត្បូងមានចំនួន ១.៣៧ លាននាក់, ឥណ្ឌាមាន ១.៣៥ លាននាក់ និងរុស្ស៊ីចំនួន ១.១៧ លាននាក់ ។

តាមការបញ្ជាក់របស់លោកស្រីរដ្ឋមន្ត្រី Sudawan Wangsuphakijkosol បានឲ្យដឹងថា មានជនបរទេសជាង ៦១ ម៉ឺននាក់ចូលមកប្រទែសថៃ ក្នុងអំឡុងថ្ងៃទី៦ ដល់ថ្ងៃទី ១២ ខែវិច្ឆិកា ឬប្រហែល ៨៧,៣០០ នាក់ជារៀងរាល់ថ្ងៃ ដែលខ្ពស់ជាងមធ្យមភាគក្នុងសប្តាហ៍មុន ៩.៦១ ភាគរយដែលមានប្រមាណ ៥៣,៥៦៧ នាក់ប្រចាំថ្ងៃ ។

ទន្ទឹមនោះ លំហូរនៃចំនួនទេសចរដ៏ច្រើនកាលពីសប្តាហ៍មុននេះ ក៏ដោយសារតែថ្ងៃឈប់សម្រាក Diwali នៅក្នុងប្រទេសម៉ាឡេស៊ី និងសិង្ហបុរី ស្របពេលអ្នកទេសចរម៉ាឡេស៊ីដែលបានមកកម្សាន្តនៅថៃកើនឡើងជិត​ ៥ ម៉ឺននាក់ ឬ ២៨.៦៥ ភាគរយខ្ពស់ជាងសប្តាហ៍មុន ។

គួរបញ្ជាក់ថា ថៃរំពឹងនឹងមានជនបរទេសកាន់តែច្រើនឡើងមកម្សាន្តនៅសប្តាហ៍ក្រោយ ដោយសារចំនួនជើងហោះហើរកាន់តែខ្ពស់ និងការមកដល់នៃរដូវរងាផង ស្របពេលក៏មានការលើកលែងតម្លៃទិដ្ឋាការសម្រាប់ភ្ញៀវទេសចរមកពីចិន កាហ្សាក់ស្ថាន និងឥណ្ឌា ក៏ដូចជាទិដ្ឋាការរយៈពេលវែងសម្រាប់ជនជាតិរុស្ស៊ី ដែលជាការរួមចំណែកដល់ចំនួនភ្ញៀវទេសចរកាន់តែច្រើននៅមុនដំណាច់ឆ្នាំនេះ ៕

ប្រែសម្រួល៖ នាង រតនៈ

ប្រភព៖ The Nation

ចុចអាន៖ ថៃ រកបានការវិនិយោគជិត ៨.៥ ពាន់លានដុល្លារពីក្រុមហ៊ុនបច្ចេកវិទ្យាធំៗ របស់ អាមេរិក