សេដ្ឋកិច្ច វៀតណាម នឹងមានកំណើន ៤.៧ ភាគរយក្នុងឆ្នាំនេះ និង ៥ ភាគរយនៅឆ្នាំក្រោយ

សេដ្ឋកិច្ចរបស់ប្រទេសវៀតណាមនឹងកើនឡើង ៤.៧ ភាគរយនៅឆ្នាំ ២០២៣ និង ៥ ភាគរយសម្រាប់នៅឆ្នាំ ២០២៤ ។ នេះបើយោងតាមរបាយការណ៍ស្ថិតិសេដ្ឋកិច្ចចុងក្រោយបំផុតសម្រាប់ប្រទេសអាស៊ីអាគ្នេយ៍ ដែលចាត់តាំងដោយវិទ្យាស្ថាន Chartered Accountants នៅប្រទេសអង់គ្លេស និងក្រុមអ្នកវិភាគ Oxford Economics ។

ដោយឡែកតាមរយៈកាសែតអនឡាញ VietnamNet វិញបានចុះផ្សាយ ទស្សនវិស័យសេដ្ឋកិច្ចវៀតណាម នឹងមានភាពភ្លឺស្វាង​ ប៉ុន្តែកំណើនទាំងមូលនៅមិនទាន់អាចងើបឡើងដល់កម្រិត​មុនកូវីដដែលមាន​ចំនួន ៧ ភាគរយ វិញបានឡើយ ។

ទន្ទឹមនឹងនេះ ធនាគារអភិវឌ្ឍន៍អាស៊ី (ADB) ​បានព្យាករណ៍កំណើនសេដ្ឋកិច្ចវៀតណាមនៅក្នុងឆ្នាំនេះ មានដល់ ៥.២ ភាគរយ និងកំណើន ៦ភាគរយនៅឆ្នាំក្រោយ ខណៈរដ្ឋាភិបាលវៀតណាម បានកំណត់គោលដៅកំណើនរបស់ខ្លួនចន្លោះពី ៦ ទៅ ៦.៥ ភាគរយ នៅឆ្នាំក្រោយ ។

គួរបញ្ជាក់ថា ទោះបីជាមានកំណើនទាបជាងនិន្នាការក៏ដោយ ប៉ុន្តែរបាយការណ៍បង្ហាញថា អភូតហេតុ​នៃកំណើនសេដ្ឋកិច្ចវៀតណាម នៅតែអាចកើតមានឡើងគ្រប់ពេល ៕

ប្រែសម្រួល៖ នាង រតនៈ

ប្រភព៖ Xinhua