៣ខែ ដើមឆ្នាំ២០២៤ ថៃ ទាញទេសចរបរទេសបាន៩.៤លាននាក់ កើបលុយ ១២.៤ពាន់លានដុល្លារ

តាមការចុះផ្សាយរបស់ Bangkok Post, នៅថ្ងៃអង្គារទី២ខែមេសា ក្រសួងទេសចរណ៍និងកីឡាថៃ បានចេញរបាយការណ៍មកហើយថា ត្រឹម៣ខែដំបូងនៃឆ្នាំ២០២៤ ប្រទេសនេះ ទទួលបានភ្ញៀវទេសចរបរទេសចំនួន ៩.៤លាននាក់ កើបចំណូលបាន៤៥៤.៦ពាន់លានបាត (១២.៤ពាន់លានដុល្លារអាមេរិក)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណាក៏ដោយ ឆ្នាំនេះ ប្រទេសថៃ បានកំណត់គោលដៅទេសចរចំនួន៤០លាននាក់ឯណោះ ដែលជាតួលេខជិតស្មើនឹងកម្រិតមុនការរីករាលដាលនៃជំងឺរាតត្បាតកូវីដ១៩ ក្នុងឆ្នាំ២០១៩។

មិនត្រឹមប៉ុណ្ណឹង បើយោងតាមអាជ្ញាធរទេសចរណ៍ថៃ, ពិធីបុណ្យសង្ក្រាន្តរយៈពេល២១ថ្ងៃនៅឆ្នាំនេះ ត្រូវបានព្យាករថា នឹងប្រមូលប្រាក់ចំណូលពីទេសចរក្នុងស្រុកបានចំនួន ៥២.៥ពាន់លានបាតខណៈខេត្តភាគខាងកើត នឹងទាញចំណូលបានច្រើនជាងគេ។

យ៉ាងណាមិញ បើងាកទៅមើលឆ្នាំ២០២៣វិញ ថៃ បានបង់បាត់តំណែងជាប្រទេសមានអ្នកទេសចរមកលេងកម្សាន្តច្រើនជាងគេប្រចាំតំបន់អាស៊ានហើយ ដោយលេខមួយធ្លាក់ទៅលើម៉ាឡេស៊ីវិញ។

យោងតាមគេហទំព័រ Focus Malaysia, ម៉ាឡេស៊ី មានទេសចរបរទេសមកលេងកម្សាន្តជិត ២៩ លាននាក់កាលពីឆ្នាំមុន ហើយបានក្លាយជាប្រទេសគោលដៅទេសចរណ៍ពេញនិយមបំផុតនៅក្នុងតំបន់អាស៊ាន។

​ចំណែកថៃ គឺជាប្រទេសដែលមានទេសចរបរទេសមកលេងច្រើនជាងគេលំដាប់ទី២ ពោលកាលពីឆ្នាំ២០២៣ ប្រទេសនេះទទួល​ភ្ញៀវ​ទេសចរ​បរទេស​ចំនួន​២៨ ​លាន​នាក់​ បន្ទាប់មកគឺ ​សិង្ហបុរី ​មាន​ ១៣.៦ ​លាន​នាក់ ខណៈវៀតណាម​ជាប់​លេខ ​៤ ​មាន​ទទួលទេសចរ ១២.៦ លាន​នាក់។

សូមបញ្ជាក់ ចាប់ពីថ្ងៃទី១ខែធ្នូឆ្នាំ២០២៣មក ប្រទេសម៉ាឡេស៊ី បានអនុញ្ញាតឲ្យទេសចរមកពីចិនដីគោក និងឥណ្ឌាចូលមកលេងកម្សាន្តក្នុងប្រទេសដោយមិនគិតទិដ្ឋាការរយៈពេល៣០ថ្ងៃ ស្រដៀងគ្នានឹងប្រទេសថៃដែរ៕

អត្ថបទ៖ សុខ សុវណ្ណ

ចុចអាន៖ ថៃ អស់តំណែងជាអធិរាជមានអ្នកទេសចរមកលេងកម្សាន្តច្រើនជាងគេនៅ អាស៊ាន