សេដ្ឋកិច្ច

ឥណ្ឌូណេស៊ីសម្លឹងបង្កើនទីផ្សារនាំចេញទៅអឺរ៉ុប តាមរយៈកំពង់ផែនៅអ៊ីតាលី

បានផុស

១ year មុន

នៅ

ថ្ងៃសុក្រ ២៤ ឧសភា ២០២៤

ដោយ

រដ្ឋមន្ត្រីពាណិជ្ជកម្មឥណ្ឌូណេស៊ី លោក ហ្ស៊ូលគីហ្លី ហាហ្សាន (Zulkifli Hasan) និងឯកអគ្គរដ្ឋទូតអ៊ីតាលីប្រចាំឥណ្ឌូណេស៊ី លោក បេនេដេតូ ឡាតទែរី (Benedetto Latteri) បានពិភាក្សាអំពីឱកាសសម្រាប់ឥណ្ឌូណេស៊ី ក្នុងការពង្រីកការនាំចេញទៅកាន់អឺរ៉ុប ដោយប្រើប្រាស់កំពង់ផែចំនួន២របស់អ៊ីតាលី។ នេះបើតាមការចុះផ្សាយរបស់ទីភ្នាក់ងារសារព័ត៌មាន Antara។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោមផ្លែផ្កានៃជំនួបរវាងភាគីទាំង២នៅរដ្ឋធានីហ្សាកាតា កាលពីថ្ងៃពុធ លោក ហាហ្សាន បាននិយាយក្នុងសេចក្តីថ្លែងការណ៍របស់ក្រសួងចេញផ្សាយកាលពីថ្ងៃព្រហស្បតិ៍ថា៖ «យើងបានស្វែងរកឱកាសនាំចេញទៅកាន់សហភាពអឺរ៉ុប (EU) តាមរយៈកំពង់ផែ Genoa និង Trieste ក្នុងប្រទេសអ៊ីតាលី ដែលត្រូវបានផ្តល់ជូនដោយលោកឯកអគ្គរដ្ឋទូត ឡាតទែរី»។

លោកបន្តថា អត្ថប្រយោជន៍នៃការនាំចេញរបស់ឥណ្ឌូណេស៊ីតាមច្រកទាំង២ គឺថា ទីតាំងទាំង២ជាចំណុចចូលទៅកាន់អឺរ៉ុបកណ្តាល និងខាងកើត។

គួរគូសបញ្ជាក់ថា ពាណិជ្ជកម្មឥណ្ឌូណេស៊ីជាមួយអឺរ៉ុប បានត្រឹមតែ ១/៣ នៃពាណិជ្ជកម្មវៀតណាមជាមួយអឺរ៉ុបប៉ុណ្ណោះ។ មន្រ្តីទាំង២សង្ឈឹមថា ការប្រើប្រាស់ផ្លូវនាំចេញតាមរយៈកំពង់ផែអ៊ីតាលី នឹងបង្កើនពាណិជ្ជកម្មរបស់ឥណ្ឌូណេស៊ីជាមួយ EU ជាពិសេសជាមួយអ៊ីតាលីផ្ទាល់។

ក្នុងអំឡុងកិច្ចប្រជុំកាលពីថ្ងៃពុធ លោក Latteri បាននិយាយថា រដ្ឋាភិបាលអ៊ីតាលី និងភាគីឯកជននៅក្នុងប្រទេសអ៊ីតាលី កំពុងផ្តល់ដំណោះស្រាយបច្ចេកទេសសម្រាប់ផលិតផលនាំចេញចម្បងរបស់ឥណ្ឌូណេស៊ី ដូចជាប្រេងដូងឆៅ និងកាហ្វេ ដែលផលិតផលទាំងនេះសុទ្ធតែរងផលប៉ះពាល់ដោយគោលនយោបាយទប់ស្កាត់ការកាប់បំផ្លាញព្រៃឈើរបស់សហភាពអឺរ៉ុប។

ដំណោះស្រាយដែលត្រូវផ្ដល់ជូន រួមមានគ្រោងការណ៍វិញ្ញាបនប័ត្រ ដើម្បីធានាបាននូវការអនុលោមតាមតម្រូវការរបស់គោលនយោបាយ។ ដើម្បីពិភាក្សាអំពីការផ្តល់ជូនរបស់អ៊ីតាលីបន្ថែមទៀត ឯកអគ្គរដ្ឋទូត បានអញ្ជើញតំណាងក្រសួងពាណិជ្ជកម្មឥណ្ឌូណេស៊ីទៅបំពេញទស្សនកិច្ចនៅអ៊ីតាលី និងជួបជាមួយរដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងអាជ្ញាធរកំពង់ផែ Genoa និង Trieste៕