អាល្លឺម៉ង់ នឹងទាញចំណូលបានជាង ១ពាន់លានដុល្លារ ពីវិស័យទេសចរណ៍ក្នុងព្រឹត្តិការណ៍ Euro

តាមការព្យាកររបស់វិទ្យាស្ថាន Ifo, ប្រទេសអាល្លឺម៉ង់ ដែលជាម្ចាស់ផ្ទះ Euro 2024 នឹងអាចទាញចំណូលបាន ១.០៧ពាន់លានដុល្លារ ជួយដល់សេដ្ឋកិច្ច ដោយសារតែកំណើនភ្ញៀវទេសចរបរទេសដែលធ្វើដំណើរទៅមើលការប្រកួតបាល់ទាត់អំឡុងព្រឹត្តិការណ៍នេះ ខណៈវិស័យបដិសណ្ឋារកិច្ចនិងផ្នែកលក់អាហារតាមហាង នឹងទទួលបានអត្ថប្រយោជន៍ច្រើនជាងគេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមនោះ វិទ្យាស្ថានស្រាវជ្រាវសេដ្ឋកិច្ចកំពូលរបស់អាល្លឺម៉ង់មួយនេះ គូសបញ្ជាក់ថា ចំណូលនេះគឺស្មើនឹងប្រហែល ០.១%នៃទិន្នផលសេដ្ឋកិច្ចនៅក្នុងត្រីមាសទី២នៃឆ្នាំ២០២៤នេះ។

លោក Gerome Wolf អ្នកជំនាញនៅ Ifo និយាយថា “ត្បិតតែវាមានកំណើនរយៈពេលខ្លី ​ហើយវានឹងថយចុះវិញក្រោយចប់ព្រឹត្តិការណ៍ Euro ក៏ដោយ តែយ៉ាងហោចណាស់ វាក៏បានជួយខ្លះដែរ”។

យោងតាមការគណនារបស់វិទ្យាស្ថានដោយផ្អែកលើតួលេខពី FIFA World Cup ដែលក៏រៀបចំដោយប្រទេសអាល្លឺម៉ង់ផងដែរក្នុងឆ្នាំ២០០៦ បានឲ្យដឹងថា ក្នុងអំឡុងព្រឹត្តិការណ៍ Euro ឆ្នាំ២០២៤នេះ នឹងមានភ្ញៀវទេសចរបរទេសមកចូលរួមជាង ៦០០ ០០០នាក់។

សូមបញ្ជាក់ថា ព្រឹត្តិការណ៍បាល់ទាត់ Euro 2024 ដែលមានប្រទេសអាល្លឺម៉ង់ ធ្វើជាម្ចាស់ គឺប្រព្រឹត្តិទៅចាប់ពីថ្ងៃទី១៤ខែមិថុនា ដល់ថ្ងៃទី១៤ខែកក្កដា។ នៅថ្ងៃប្រកួតបើកឆាក ម្ចាស់ផ្ទះឥន្ទ្រីដែកអាល្លឺម៉ង់ បានលត់ក្រុមភ្ញៀវស្កុតឡែន យ៉ាងចាស់ដៃក្នុងលទ្ធផល ៥-១៕

អត្ថបទ៖ សុខ សុវណ្ណ

ចុចអាន៖ ថៃ ថា ពិបាកបង្ក្រាបការភ្នាល់បាល់ Euro ណាស់ បើមន្ត្រីលេងល្បែងដែរ