កសិករទម្លាយរឿងដំឡូងមីធ្លាក់តម្លៃខ្លាំង ស្ទើរតែថៃឈប់ទទួល ដោយសារ​ឈ្មួញកណ្តាល

កសិករមួយរូបទៀត នៅស្រុកសំពៅលូន ខេត្តបាត់ដំបង សុំមិនបញ្ចេញឈ្មោះ បានឱ្យដឹងថា នៅពេលថ្មីៗនេះលោក និងកសិករផ្សេងទៀត បានទទួលព័ត៌មានពីខាង សាយឡូ ថា ដំឡូងមីធ្លាក់តម្លៃស្ទើរមិនគួរឱ្យជឿ គឺមើមស្រស់ ១ គីឡូក្រាមបានថ្លៃចន្លោះពី ១០០ រៀល ដល់ ១២០ រៀលប៉ុណ្ណោះ ធ្វើឱ្យលោកបាក់ទឹកចិត្តស្ទើរភ្ជួរចោលទាំងអស់។

កសិករស្រុកភ្នំព្រឹក លោក រិដា បន្ថែមថា ឆ្នាំនេះដំឡូងមី ១ គីឡូក្រាម បានថ្លៃចន្លោះពី ១២០ ទៅ ១៣០ រៀល ខណៈឆ្នាំមុនលក់បាន ១ គីឡូក្រាមចន្លោះពី ៤៥០ ទៅ ៥០០ រៀល។

លោកបន្តថា៖ “តាមខ្ញុំសង្កេតមើលឃើញថា បញ្ហាដំឡូងធ្លាក់ថ្ងៃដល់កម្រិតនេះ គឺដោយសារតែទង្វើក្រុមឈ្មួញកណ្តាល ខ្ញុំបានដឹងពីអ្នកសាយឡូ ទទួលទិញគេប្រាប់ខ្ញុំថា មានឈ្មួញមួយចំនួនដឹកទៅលក់ឱ្យថៃ បានលាយដីខ្សាច់ ទើបឱ្យខាងថៃអស់ជំនឿ។ ឈ្មួញបែបនេះគួរចាប់ដាក់គុក ដោយសារតែផលប្រយោជន៍ខ្លួន បំផ្លាញផលប្រយោជន៍សាធារណៈ ហើយខ្ញុំនៅចាំថា កាលប៉ុន្មានឆ្នាំមុន នៅស្រុកកំរៀង សមត្ថកិច្ចបានបង្ក្រាបម្តង ករណីដូចគ្នានេះ”។

ចុងក្រោយ កសិកររូបនេះសំណូមពរដល់ម្ចាស់ សាយឡូ ដែលជាឈ្មួញកណ្តាលមួយចំនួន គួរបញ្ឈប់នូវទង្វើថោកទាបនេះ ដែលបានបំផ្លាញសេដ្ឋកិច្ចគ្រួសាររបស់កសិករយ៉ាងធ្ងន់ធ្ងរ ហើយលោកក៏សុំឱ្យអាជ្ញាធរសមត្ថកិច្ច ពិនិត្យលើករណីនេះផង ចៀសវាងបិទទីផ្សាររបស់កសិករ ដោយសារតែទង្វើឈ្មួយមួយក្តាប់តូចរកសុីបែបនេះបន្តទៀត។ កសិកររូបនេះបន្តថា ក្នុងឆ្នាំ២០២៤ នេះ អាកាសធាតុបានប្រែប្រួលកម្តៅដែលមិនធ្លាប់កើតមានសម្រាប់កម្ពុជា បានបង្កឱ្យដំណាំកសិកម្មមានផលប៉ះពាល់លើសពីឆ្នាំមុនៗ បានច្រានសេដ្ឋកិច្ចគ្រួសាររបស់ប្រជាកសិករ ឱ្យដើរថយក្រោយ គួរឱ្យព្រួយបារម្ភ ជាពិសេសលើផលដំណាំដំឡូងមី និងផលដំណាំពោត ដែលកសិករក្នុងខេត្តបាត់ដំបង និយមដាំភាគច្រើន គួរតែមានតម្លៃទីផ្សារល្អ ឱ្យសមស្របតាមការខិតខំថែទាំរបស់កសិករ។

មន្ត្រី​នៃ​កសិកម្ម​ខេត្ត លោក​ ហេង សសិទ្ទ ធ្លាប់បានប្រាប់ កម្ពុជាថ្មី ថា ការ​លក់​មើម​ដំឡូង​ស្រស់​របស់កសិករ ជាការចំណេញ ថវិកាជួលកម្មករជញ្ច្រាំហាល និងចំណេញពេលវេលាផង ហើយបើ​គិតត្រឹមថ្ងៃ​ទី៣១ ខែមីនា ឆ្នាំ២០២៤ មិនមានការនាំចេញ​មើម​ដំ​ឡូងមីស្ងួត​ទៅលក់​ឱ្យ​ប្រទេស​ថៃទេ។ ​ការ​ប្រមូល​ទិន្នផល​ដំឡូង​មី​ទៅ​លក់​ឱ្យ​ភាគីថៃ មាន​តែ​ច្រក​អន្តរជាតិភ្នំដី (គីឡូ១៣) មួយ​ប៉ុណ្ណោះ ក្នុង​ចំណោម​ច្រកនាំ​ផលិផល​កសិកម្ម​ចំនួន៤។ ខណៈការនាំចេញ មើមដំឡូស្រស់ពេលនោះ បាននាំចេញ​ក្នុង ១ ថ្ងៃ​ចំនួន ៦០០ តោន។ បើគិត​ត្រឹមថ្ងៃទី៣១ ខែមីនា ការ​នាំចេញ​មើម​ដំឡូង​មីស្រស់ មាន​បរិមាណ​កសិផល​​សរុប ចំនួន ១២៩,៧៥ តោន ក្នុងតម្លៃដែលកសិករទទួលយកបាន។

ច្រកទ្វារព្រំដែន​អន្តរជាតិ ភ្នំដី (គីឡូ១៣) មាន​ទីតាំង​នៅភូមិ គីឡូលេខ១៣ ឃុំ​សន្តិភាព ស្រុកសំពៅលួន ខេត្តបាត់ដំបង នៅ​ទល់មុខ​ច្រកទ្វារព្រំដែន​អន្តរជាតិ​ “បានខៅឌិន” ស្ថិតក្នុងភូមិ ខៅឌិន ស្រុក​ខ្លង​ហាត ខេត្ត​ស្រះកែវ នៃ​ព្រះរាជាណាចក្រថៃ៕

អត្ថបទ៖ សៅ សារិទ្ធ