ក្រុមហ៊ុន Sunwah Group សិក្សាដំឡើងរថយន្តអគ្គិសនីនៅកម្ពុជា​ ខណៈវិស័យនេះកំពុងរីកដុះដាល

ក្រុមហ៊ុន Sunwah Group ដែលមានមូលដ្ឋាននៅទីក្រុងហុងកុង កំពុងសិក្សាលើការ​ផ្គុំ និង​ដំ​ឡើង​​រថយន្ត​អគ្គិសនី ខណៈវិស័យមួយនេះ កំពុងរីកដុះដាលនៅកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក នុត អ៊ុនវ័ណរ៉ា អគ្គលេខាធិការរងគណៈកម្មាធិការវិនិយោគកម្ពុជានៅរសៀលថ្ងៃទី ១០ ខែកក្កដា ឆ្នាំ ២០២៤ បានដឹកនាំក្រុមការងារជួបពិភាក្សាការងារជា មួយលោកស្រី Sofia Fang តំណាងឱ្យក្រុមហ៊ុន SUN WAH PROPERTIES (CAMBODIA) CO., LTD. និងសហការី ដែលមានបំណងស្វែងយល់ និងប្រមូលព័ត៌មានបន្ថែមពីសក្ដានុពល និងកាលានុវត្តភាពវិនិយោគ​លើការដំឡើងរថយន្តអគ្គិសនីនៅកម្ពុជា ពិសេសគោលនយោ​បាយគាំទ្ររបស់​រាជ​រដ្ឋា​​​​ភិបាល និងការផ្តល់ការលើកទឹកចិត្តក្នុងវិស័យនេះ។

សូមជំរាបផងដែរថា ការផ្ដួចផ្ដើមនេះ កើតមានឡើង បន្ទាប់ពីជំនួបសម្តែងការគួរសម និងពិភាក្សាការងាររវាងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា និងលោក Jonathan K.S. Choi ប្រធានក្រុមហ៊ុន Sunwah Group កាលពីថ្ងៃទី០៨ ខែមេសា ឆ្នាំ២០២៤ ដោយក្រុមហ៊ុនបានបង្ហាញពីចំណាប់​អារម្មណ៍​ក្នុងការវិនិយោគលើវិស័យមួយចំនួននៅកម្ពុជា ក្នុងនោះការផ្គុំ និងដំឡើង​រថយន្តអគ្គិសនី ជារបៀបវារៈដែលក្រុមហ៊ុនមានបំណងដាក់ទុនវិនិយោគ។

បច្ចុប្បន្ន កម្ពុជាមានរថយន្តអគ្គិសនីចំនួន ១.៦១៤គ្រឿងបានចុះបញ្ជី ផ្លូវការនៅក្រសួងសាធារណរដ្ឋការ និងដឹកជញ្ជូន ខណៈ​រាជរដ្ឋាភិបាលបានខិតខំប្រឹងប្រែងធ្វើឱ្យប្រសើរឡើងចំនួនស្ថានីយសាកអាគុយកាន់តែច្រើន និង​លក្ខណ្ឌអំណោយ​ផលផ្សេងៗ​ទៀតកាន់តែប្រសើរ។

យោងតាមតួលេខ នៃការចុះបញ្ជីយានយន្តអគ្គិសនី គិតត្រឹមរយៈពេល៦ខែ ឆ្នាំ២០២៤ ចំនួនយានយន្តរបស់ក្រុមហ៊ុន​BYD ឈរលើកំពូលតារាដែលមានចំនួន ៦៥៨គ្រឿង ដេញ​តាមពីក្រោយដោយយានយន្តម៉ាក TOYOTA ចំនួន ២៦១​គ្រឿង និងម៉ាកTESLAចំនួន ១៨៦គ្រឿង ព្រមទាំងម៉ាកផ្សេងៗទៀត៕

អត្ថបទ៖ ឡេង ដេត