រោងចក្រក្នុងវិស័យកម្មន្តសាលកើនឡើង ១៧៨ រោងចក្រនៅឆមាសទី១ ឆ្នាំនេះ

នៅក្នុងឆមាសទី១ ឆ្នាំ ២០២៤ រោងចក្រនៅក្នុងវិស័យកម្មន្តសាលមានចំនួន ២.១៧៥ រោង​ចក្រ បានកើនឡើងចំនួន ១៧៨ រោងចក្រ បើធៀបទៅនឹងដំណាច់ឆ្នាំមុនដែលមានចំនួន ១.៩៩៧ រោងចក្រ។ នេះបើយោងតាម​របាយ​ការណ៍របស់ធនាគារជាតិនៃកម្ពុជា។

ប្រភពដដែលបានបង្ហាញថា វិស័យកម្មន្តសាលមានកំណើន ៧,៣ ភាគរយ ដែលគាំទ្រជាចម្បងដោយផលិតកម្មកម្មន្តសាលសម្រាប់ការនាំចេញ(៧,៧%) ក្នុងនោះផលិតផលកាត់ដេរ​សម្រាប់​នាំ​​​ចេញកើន ១៧ ភាគរយ ខណៈដែលផលិតផលមិនមែនកាត់ដេរថយចុះ ៨ ភាគរយ។ ចំណែកឯផលិតផលកម្មន្តសាល សម្រាប់បម្រើទីផ្សារក្នុងស្រុក មានកំណើន ៦ ភាគរយ។

លោក មាស សុខសេនសាន រដ្ឋលេខាធិការ ​និងជាអ្នកនាំពាក្យក្រសួងសេដ្ឋកិច្ច និងហិរញ្ញវត្ថុ ​មាន​ប្រសាសន៍ថា ពាណិជ្ជកម្មនាំចេញទៅទីផ្សារអន្តរ​ជាតិរបស់កម្ពុជា​មានកំណើន ក្នុងនោះ​ការ​នាំ​ចេញ​ផលិតផលវិស័យមិនមែនកាត់ដេរ ដែលមានដូចជា កង់ សូឡា និងគ្រឿង​អេឡិកត្រូនិក មានការកើនឡើងគួរឱ្យកត់សម្គាល់។

អ្នកនាំពាក្យរូបនេះបាន បញ្ជាក់ថា កំណើននៃការនាំចេញវិស័យមិនមែនកាត់ដេរ គឺជារចនាសម្ព័ន្ធ​សេដ្ឋកិច្ច​​ថ្មីមួយ ដែលបង្កើតតម្លៃ​បន្ថែមសម្រាប់ប្រជាជនកម្ពុជា។

លោក ហ្វា សាលី ប្រធានសម្ព័ន្ធសហជីពជាតិ ប្រាប់កម្ពុជាថ្មីថា យន្តការរបស់រាជរដ្ឋាភិ​បាល​អាណត្តិថ្មី មានភាពល្អប្រសើរទាក់ទងនិងការដោះស្រាយវិវាទ ព្រមទាំងការវិនិយោគថ្មីៗ ពី​បណ្ដារ​​ប្រទេសមួយចំនួនជំរុញឱ្យសង្វាក់ផលិតកម្មកើនឡើង។

លោកបណ្ឌិត ហុង វណ្ណៈ អ្នក​ជំនាញ​ផ្នែក​សេដ្ឋកិច្ច​នៅ​រាជ្យ​បណ្ឌិត្យសភា​កម្ពុជា លើក​ឡើងថា វិស័យមិនមែនកាត់ដេរ និងវិស័យកមន្តសាល ជាវិស័យដែលមានផលិតកម្មរឹង​មាំ​រយៈពេល​វែង។

លោកថា ប្រសិនបើកម្ពុជាជំរុញលើកកម្ពស់វិស័យមិនមែនកាត់ដេរ ឱ្យកាន់តែប្រសើរ ដែលហៅ​ថា ឧស្សាហកម្មធុនមធ្យម ឬក៏ឈានដល់កម្រិតខ្ពស់ថែមទៀត ដូចជាវិស័យ​បច្ចេកវិទ្យា វិស័យ​គ្រឿង​យន្ត និង​រោងចក្រសហគ្រាស ដែលគាំទ្រ​ដោយវិស័យ​កសិកម្មបន្ថែមទៀត រឹតតែប្រសើរ ដែល​នឹងជួយ​ជំរុញឱ្យ​វិស័យឧស្សា​ហកម្ម​ទាំងអស់នេះ ឱ្យមានភាពរឹងមាំ ចាក់ជ្រៅ​នៅក្នុង​ការ​អភិវឌ្ឍ សេដ្ឋកិច្ចកម្ពុជា៕

អត្ថបទ៖ ឡេង ដេត