ព័ត៌មានអន្ដរជាតិ

ក្រសួងហិរញ្ញវត្ថុវៀតណាម ស្នើបន្ថយពន្ធលើសហគ្រាសខ្នាតតូច និងមធ្យម

បានផុស

២ years មុន

នៅ

ថ្ងៃព្រហស្បតិ៍ ៨ សីហា ២០២៤

ដោយ

ដើម្បីជាវិធានការគាំទ្រសហគ្រាសខ្នាតតូច និងមធ្យមក្នុងការប្រមូលដើមទុន និងអភិវឌ្ឍអាជីវកម្ម ក្រសួងហិរញ្ញវត្ថុវៀតណាម (MoF) បានស្នើឱ្យបន្ថយអត្រាពន្ធលើប្រាក់ចំណូលសាជីវកម្មមកនៅត្រឹម ១៥-១៧ ភាគរយ សម្រាប់អជីវកម្មដែលរកចំណូលបានមិនលើសពី ៥០ ប៊ីលានដុង ដោយថយចុះពីអត្រា ២០ ភាគរយ នាពេលបច្ចុប្បន្ន។ នេះបើតាមការចុះផ្សាយរបស់កាសែត Viet Nam News។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការកាត់បន្ថយពន្ធ ដែលមានក្នុងសេចក្តីព្រាងវិសោធនកម្មច្បាប់ស្តីពីពន្ធលើប្រាក់ចំណូលសាជីវកម្ម រំពឹងថានឹងដាក់ជូនរដ្ឋសភា ដើម្បីឱ្យពិនិត្យមើលជាលើកដំបូងនៅខែតុលា ឆ្នាំ ២០២៤ និងទុកសម្រាប់ការអនុម័តក្នុងខែឧសភា ឆ្នាំក្រោយ។

ទន្ទឹមនឹងនេះ ក្រសួងហិរញ្ញវត្ថុបាននឹងកំពុងប្រមូលមតិយោបល់លើសេចក្តីព្រាងច្បាប់ដដែលពីស្ថាប័នរដ្ឋាភិបាលផ្សេងៗ និងសាធារណជន ហើយលើកឡើងថា គោលបំណងសំខាន់មួយរបស់គណៈកម្មាធិការរៀបចំសេចក្តីព្រាង គឺដើម្បីបង្កើតរបបពន្ធដែលកាន់តែអំណោយផលសម្រាប់សហគ្រាសខ្នាតតូច និងមធ្យម។

យោងតាមសេចក្តីព្រាងច្បាប់ អត្រាពន្ធ ១៥ ភាគរយ ត្រូវបានស្នើឡើងសម្រាប់អាជីវកម្មដែលមានប្រាក់ចំណូលសរុបមិនលើសពី ៣ ប៊ីលានដុង ហើយអត្រាពន្ធ ១៧ ភាគរយ ត្រូវបានស្នើឡើងសម្រាប់អាជីវកម្មដែលមានប្រាក់ចំណូលសរុបលើសពី ៣ ប៊ីលានដុង និងក្រោម ៥០ ប៊ីលានដុង។

ក្រសួងហិរញ្ញវត្ថុវៀតណាម បានឱ្យដឹងថា ក្នុងចំណោម ៩០០ ០០០ អាជីវកម្មដែលកំពុងដំណើរការនាពេលបច្ចុប្បន្ន អាជីវកម្មខ្នាតតូច និងមធ្យម រួមចំណែកជិត ៩៤ ភាគរយនៃចំនួនសរុប ហើយទទួលបានគោលនយោបាយអនុគ្រោះផ្សេងៗ ដើម្បីជួយពួកគេអភិវឌ្ឍផលិតកម្ម និងប្រាក់ចំណូលរយៈពេលវែង៕