កម្ពុជារកចំណូលបានជាង៤៣លានដុល្លារពីពាណិជ្ជកម្មតាមប្រព័ន្ធអេឡិចត្រូនិក

ក្នុងរយៈពេល ៧ខែ ឆ្នាំ២០២៤ អគ្គនាយកដ្ឋានពន្ធដារ (GDT) ប្រមូលអាករលើតម្លៃបន្ថែមពីប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក បានចំនួន ១៧៦,៦៩ ប៊ីលានរៀល ស្មើនឹង ៤៣,៦៣ លានដុល្លារ។​ នេះបើយោងតាមរបាយការណ៍របស់ស្ថាប័នមួយនេះដែលចេញ​ផ្សាយនៅព្រឹកថ្ងៃទី១៥ខែសីហា។

យោងតាម GDT សម្រាប់ចំណូលពន្ធ​ពីវិស័យនេះ ក្នុងនោះ ចំណូលដែលប្រមូលបានពី            អនិវាសនជនដែលបានចុះបញ្ជីអាករ លើតម្លៃបន្ថែមសាមញ្ញ (Simplified VAT Registration) មានចំនួន ៥៥,១០ ប៊ីលានរៀល ស្មើនឹង ១៣,៦១ លានដុល្លារ និងចំណូលប្រមូល បានពីនិវាសនជនតាមវិធីសាស្ត្រគិតអាករជំនួស (VAT Reverse Charge) មានចំនួន ១២១,៥៩ ប៊ីលានរៀល ស្មើនឹង ៣០,០២ លានដុល្លារ។

ដោយឡែកចំណូលដែលប្រមូលបានពីវិស័យនេះក្នុងខែកក្កដា មានចំនួន ២៤,៤៥ ប៊ីលានរៀល ស្មើនឹង ៦,០៤ លានដុល្លារ។

អគ្គនាយកដ្ឋានពន្ធដារ បានចាប់ផ្តើមប្រមូលអាករលើតម្លៃបន្ថែមពីប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក (e-Commerce) ចាប់ពីខែមេសា ឆ្នាំ២០២២ ហើយគិតមកដល់បច្ចុប្បន្ននេះមានក្រុមហ៊ុនធំៗបានមកចុះបញ្ជីអាករលើតម្លៃបន្ថែមសាមញ្ញ នៅអគ្គនាយកដ្ឋានពន្ធដារ ដែលមានជាអាទិ៍ META, GOOGLE, YOUTUBE, TIK TOK, NETFLIX… ជាដើម៕