ព័ត៌មានអន្ដរជាតិ

សិង្ហបុរីឃើញពីកំណើនចំណូលពន្ធដល់ជាង ៦០ ប៊ីលានដុល្លារ ក្នុងឆ្នាំ ២០២៣-២៤

បានផុស

១០ ខែ មុន

នៅ

ថ្ងៃព្រហស្បតិ៍ ៥ កញ្ញា ២០២៤

ដោយ

ប្រាក់ចំណូលពន្ធរបស់សិង្ហបុរីសម្រាប់ឆ្នាំសារពើពន្ធ ២០២៣-២០២៤ បានកើនឡើងដល់ ៨០,៣ ប៊ីលានដុល្លារសិង្ហបុរី (៦១,៦ ប៊ីលានដុល្លារអាមេរិក) ដោយកើនឡើង ១៧ ភាគរយ ធៀបនឹងឆ្នាំសារពើពន្ធមុន។ នេះបើតាមការចុះផ្សាយរបស់កាសែត Malay Mail។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាជ្ញាធរចំណូលក្នុងស្រុករបស់សិង្ហបុរី (IRAS) បានឱ្យដឹងកាលពីថ្ងៃពុធថា កំណើននេះឆ្លុះបញ្ចាំងពី «កំណើនសេដ្ឋកិច្ចដ៏រឹងមាំ និងកំណើនប្រាក់ឈ្នួលក្នុងប្រទេសសិង្ហបុរីនៅឆ្នាំ ២០២២»។

ប្រាក់ចំណូលពន្ធសរុបដែលប្រមូលបាន ស្មើនឹង ៧៧,៦ ភាគរយ នៃប្រាក់ចំណូលប្រតិបត្តិការរបស់រដ្ឋាភិបាល និង ១១,៩ ភាគរយ នៃផលិតផលក្នុងស្រុកសរុប (GDP) របស់ប្រទេសសិង្ហបុរី។

IRAS បាននិយាយថា៖ «ពន្ធដែលប្រមូលបាន ត្រូវបានប្រើដើម្បីផ្តល់មូលនិធិដល់សេវាកម្មសំខាន់ៗសម្រាប់សហគមន៍របស់យើង ធ្វើឱ្យសេដ្ឋកិច្ចរបស់យើងប្រសើរឡើង លើកកម្ពស់បរិយាកាសរស់នៅរបស់យើង ក៏ដូចជាគាំទ្រកម្មវិធីអភិវឌ្ឍន៍សង្គមដើម្បីកែលម្អជីវភាពរស់នៅរបស់ប្រជាជនសិង្ហបុរី»។

បើតាមអាជ្ញាធរដដែល ពន្ធលើប្រាក់ចំណូលសាជីវកម្ម រួមចំណែកច្រើនជាងគេ (២៩ ប៊ីលានដុល្លារសិង្ហបុរី ឬ ៣៦,១ ភាគរយ) ដោយសារតែតែប្រាក់ចំណូលសាជីវកម្មរឹងមាំ។ ពន្ធលើប្រាក់ចំណូលបុគ្គល បានកើនឡើងចំនួន ២ ប៊ីលានដុល្លារសិង្ហបុរី ដល់ ១៧,៥ ប៊ីលានដុល្លារសិង្ហបុរី។

បន្ទាប់មក ពន្ធលើទំនិញ និងសេវាកម្ម (GST) មានចំនួនប្រមាណ ១៦,៦ ប៊ីលានដុល្លារសិង្ហបុរី ជំរុញដោយការចំណាយរបស់អ្នកប្រើប្រាស់កាន់តែខ្ពស់ និងការដំឡើងអត្រា GST ។ ពន្ធលើអចលនទ្រព្យវិញ មានចំនួន ៥,៩ ប៊ីលានដុល្លារសិង្ហបុរី ឬ៧,៤ ភាគរយ នៃពន្ធប្រមូលបានសរុប។ ជាមួយគ្នានេះ ពន្ធប្រថាប់ត្រាបានថយចុះពី ០,១ ប៊ីលានដុល្លារសិង្ហបុរី មកត្រឹម ៥,៨ ប៊ីលានដុល្លារសិង្ហបុរី ដែលវាឆ្លុះបញ្ចាំងពីបរិមាណទាបនៃប្រតិបត្តិការអចលនទ្រព្យ។