​ក្រុមហ៊ុនវិនិយោគអន្តរជាតិ​ NextBold Capital ត្រៀមទុនវិនិយោគប្រមាណ១០០លានដុល្លារសម្រាប់វិស័យ SMEs នៅ​ប្រទេស កម្ពុជា វៀតណាម និងឡាវ

NextBold Capital ដែលជាក្រុមហ៊ុនដែលវិនិយោគរួមមានមូលដ្ឋាននៅប្រទេសវៀតណាមកំពុងប្រមូលប្រភពទុនចំនួន ១០០ លានដុល្លារដើម្បីគាំទ្រដល់សហគ្រាសធុនតូច និងមធ្យម (SMEs) នៅក្នុងប្រទេស កម្ពុជា វៀតណាម និងឡាវ។

NextBold Capital បាននិយាយនៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ថាក្រុមហ៊ុនកំពុងបង្កើនមូលនិធិដំបូងរបស់ខ្លួនដើម្បីវិនិយោគក្នុងសហគ្រាសធុនតូច និងមធ្យមនៅប្រទេស កម្ពុជា វៀតណាម និងឡាវ ដែលជាទីផ្សារកំពុងរីកលូតលាស់យ៉ាងឆាប់រហ័ស​នៃសេដ្ឋកិច្ច។

យោងតាមសេចក្តីថ្លែងការណ៍៖« យុទ្ធសាស្ត្ររបស់មូលនិធិនេះគ្របដណ្តប់លើការកំណត់គោលដៅសហគ្រាសធុនតូច និងមធ្យមនៅតាមទីក្រុងសំខាន់ៗនៅទូទាំងប្រទេសកម្ពុជា វៀតណាម និងឡាវ ដែលជាទីផ្សារដែលមានការរីកចម្រើនយ៉ាងឆាប់រហ័សដោយសារតែការកើនឡើងនៃប្រជាជនវណ្ណៈកណ្តាល វប្បធម៌សហគ្រិនដ៏រឹងមាំ និងការកើនឡើងនៃការវិនិយោគបរទេស»។

សម្រាប់មូលនិធិចំនួន១០០ លានដុល្លាររបស់ក្រុមហ៊ុននឹងវិនិយោគលើវិស័យ​ ការអប់រំ ការថែទាំសុខភាព ទំនិញប្រើប្រាស់ និងសេវាកម្ម ដែលពួកគេមើលឃើញឱកាសសម្រាប់ការផ្លាស់ប្តូរអភិបាលកិច្ច និងការបង្កើនតម្លៃបន្ថែម។

លោក Sjoerd Zwinkels សហនាយកគ្រប់គ្រងនៃ NextBold Capital បានថ្លែងថា​៖ «​ទីផ្សារ​នៃប្រទេសទាំង​នេះ​នៅ​តែ​ត្រូវ​បាន​វិនិយោគិន​ពិភពលោក​មិន​ទាន់មាន​ការចាប់អារម្មណ៍ខ្លាំងក្លានោះទេ ជាពិសេស​ទៅលើ​ទំហំ​នៃសហគ្រាស​ធុន​តូច និង​មធ្យម​។ យើងមើលឃើញសក្ដានុពលដ៏ធំសម្បើមសម្រាប់ការបង្កើនតម្លៃបន្ថែម ដោយការនាំយកនូវប្រភពទុន និងការគាំទ្រផ្នែកប្រតិបត្តិការ»។ ​

សម្រាប់មូលនិធិ ១០០​លានដុល្លារដំបូងរបស់ NextBold Capital ដែលត្រូវបានរៀបចំឡើងដើម្បីជំរុញកំណើនសម្រាប់សហគ្រាសធុនតូច និងមធ្យមនៅទូទាំងអាស៊ីអាគ្នេយ៍។

​ជាមួយគ្នានេះដែរ លោក Pedro Baliza ក៏សហដៃគូគ្រប់គ្រងបាននិយាយថា៖«ការវិនិយោគដំបូងរបស់យើងគឺផ្តោតលើក្រុមហ៊ុនដែលមានមូលដ្ឋានគ្រឹះអាជីវកម្មរឹងមាំនៅក្នុងទីផ្សារដែលរីកចម្រើនយ៉ាងឆាប់រហ័ស ដែលយើងមើលឃើញពីសក្តានុពលច្បាស់លាស់សម្រាប់ការគ្រប់គ្រងវិស័យជាមួយនឹងការគាំទ្រប្រតិបត្តិការដ៏ត្រឹមត្រូវ» ។

​លោកបានបន្ថែមថា៖«យើងកំពុងមើលឃើញពីសន្ទុះដ៏អស្ចារ្យពីកំណើននៃអាជីវកម្​មលក្ខណៈគ្រួសារ និងសហវិនិយោគិនផ្សេងទៀត ហើយត្រៀមខ្លួនរួចជាស្រេចក្នុងការទាញយកប្រយោជន៍ពីឱកាសរីកចម្រើនដ៏ធំធេងនាពេលខាងមុខ»។

NextBold Capital គឺជាក្រុមហ៊ុនវិនិយោគឯកជនដែលមានមូលដ្ឋាននៅទីក្រុងហូជីមិញ ប្រទេសវៀតណាម ដោយផ្តោតលើការរីកលូតលាស់ SMEs នៅទូទាំងអាស៊ីអាគ្នេយ៍ តាមរយៈការវិនិយោគទុន និងការគាំទ្រប្រតិបត្តិការ។

មូលនិធិនេះត្រូវបានសហការបង្កើតឡើងដោយលោក Sjoerd Zwinkels អតីតនាយកវិនិយោគនៅ Mekong Capital រួមជាមួយនឹងអតីតនាយកប្រតិបត្តិក្រុមហ៊ុន Fitness & Lifestyle Group ដែលគាំទ្រដោយ Quadrant លោក Pedro Baliza និង Jonas Wilbert ដែលនាំមកនូវបទពិសោធន៍ប្រតិបត្តិការ និងការវិនិយោគនានា។ ក្រុមហ៊ុននេះមានបំណងផ្តល់មិនត្រឹមតែដើមទុនប៉ុណ្ណោះទេ ប៉ុន្តែថែមទាំងផ្តល់ជំនាញប្រតិបត្តិការដើម្បីជួយអាជីវកម្មនៅក្នុងទីផ្សារទាំងនេះឲ្យមានមាត្រដ្ឋានប្រកបដោយនិរន្តរភាព៕

​