ព័ត៌មានអន្ដរជាតិ

វៀតណាមកំណត់គោលដៅកំណើនសេដ្ឋកិច្ច ៧,៦-៨ ភាគរយ នៅត្រីមាសចុងក្រោយ

បានផុស

២ ខែ មុន

នៅ

ថ្ងៃអង្គារ ៨ តុលា ២០២៤

ដោយ

រដ្ឋមន្ត្រីក្រសួងផែនការ និងវិនិយោគវៀតណាម លោក Nguyễn Chí Dũng បានស្នើនូវគោលដៅកំណើនសេដ្ឋកិច្ចចន្លោះពី ៧,៦-៨ ភាគរយ សម្រាប់ត្រីមាសចុងក្រោយឆ្នាំ ២០២៤ ដោយសារតែភាពរឹងមាំនៃកំណើនក្នុងត្រីមាសទី៣។ នេះបើតាមការចុះផ្សាយរបស់កាសែត Viet Nam News។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសំណើរដែលធ្វើឡើងកាលពីថ្ងៃចន្ទក្នុងកិច្ចប្រជុំគណៈរដ្ឋមន្រ្តីប្រចាំខែ កិច្ចការបន្ទាន់ចំនួន ១០ សម្រាប់ត្រីមាសទី៤ ត្រូវបានដាក់ចេញដើម្បីសម្រេចគោលដៅសេដ្ឋកិច្ច។ ក្នុងនោះរួមមានការជួយជនរងគ្រោះដោយគ្រោះធម្មជាតិ ជាពិសេសក្នុងវិស័យកសិកម្ម នេសាទ និងទេសចរណ៍ និងការជំរុញបរិយាកាសអំណោយផលសម្រាប់ការវិនិយោគទ្រង់ទ្រាយធំ និងបច្ចេកវិទ្យាខ្ពស់។

លោក Chí Dũng ក៏បានគូសបញ្ជាក់ផងដែរអំពីតម្រូវការធ្វើឱ្យមានភាពរស់រវើកឡើងវិញនូវកត្តាជំរុញកំណើនសេដ្ឋកិច្ចជាមូលដ្ឋាន ជាពិសេសការវិនិយោគ ការប្រើប្រាស់ និងការនាំចេញ ដោយការបង្កើនការលក់នៅចុងឆ្នាំ ២០២៤ នេះ និងចូលឆ្នាំវៀតណាម ២០២៥ បន្ទាប់។ លោកបានបន្តថា វាក៏នឹងជាការចាំបាច់ក្នុងការដោះស្រាយបញ្ហាស្ទះក្នុងគម្រោងអចលនទ្រព្យដើម្បីពន្លឿនកំណើនផងដែរ។

កិច្ចការផ្សេងៗទៀត រួមមាន ការការពារស្ថិរភាពម៉ាក្រូសេដ្ឋកិច្ច ការបន្តគោលនយោបាយរូបិយវត្ថុដែលអាចបត់បែនបាន ការកាត់បន្ថយអត្រាការប្រាក់ ការជំរុញកំណើនឥណទាន និងការពន្លឿនការផ្លាស់ប្តូរឌីជីថលជាដើម។

បើតាម Viet Nam News ការកំណត់គោលដៅកំណើនដដែល ធ្វើឡើងក្រោយសេដ្ឋកិច្ចវៀតណាមនៅត្រីមាសទី៣ បានបង្ហាញពីភាពរឹងមាំក្នុងរង្វង់ប្រមាណ ៧,៤ ភាគរយ ដែលលើសពីការរំពឹងទុក និងកើនពីអត្រា ៧,០៤ ភាគរយ ក្នុងត្រីមាសទី២។

ទន្ទឹមនឹងនេះ ការស្ទង់មតិមួយបានរកឃើញថា ៨២,៦ ភាគរយ នៃក្រុមហ៊ុនផលិតកម្មនៅវៀតណាម បានរំពឹងថា លក្ខខណ្ឌអាជីវកម្មនឹងប្រសើរឡើង ឬនៅតែមានស្ថិរភាពនៅក្នុងត្រីមាសទី៤ ដែលជាសញ្ញាបង្ហាញពីទំនុកចិត្តអាជីវកម្មខ្លាំងក្នុងការងើបឡើងវិញនៃសេដ្ឋកិច្ច៕