ព័ត៌មានអន្ដរជាតិ

IEA៖ អាស៊ីអាគ្នេយ៍ត្រូវបង្កើនការវិនិយោគ៥ដងនៅឆ្នាំ ២០៣៥ ដើម្បីសម្រេចគោលដៅអាកាសធាតុ

បានផុស

២ years មុន

នៅ

ថ្ងៃអង្គារ ២២ តុលា ២០២៤

ដោយ

ទីភ្នាក់ងារថាមពលអន្តរជាតិ (IEA) បាននិយាយនាថ្ងៃអង្គារនេះថា ប្រទេសនៅអាស៊ីអាគ្នេយ៍ត្រូវការបង្កើនការវិនិយោគលើថាមពលស្អាតដល់ ១៩០ ប៊ីលានដុល្លារ ឬប្រហែល ៥ ដងនៃកម្រិតវិនិយោគបច្ចុប្បន្ននៅឆ្នាំ ២០៣៥ ដើម្បីសម្រេចបាននូវគោលដៅអាកាសធាតុរបស់ខ្លួន។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

IEA បាននិយាយក្នុងរបាយការណ៍ថា ការបង្កើនការវិនិយោគថាមពលចាំបាច់ត្រូវតែមានយុទ្ធសាស្រ្តដើម្បីកាត់បន្ថយការបំភាយឧស្ម័នពីបណ្ដុំរោងចក្រថាមពលធ្យូងថ្មក្នុងតំបន់ ខណៈការពង្រីកសេដ្ឋកិច្ចយ៉ាងឆាប់រហ័សរំពឹងថានឹងបង្កឱ្យមានបញ្ហាប្រឈមសម្រាប់សន្តិសុខថាមពល និងគោលដៅអាកាសធាតុ។

តម្រូវការអគ្គិសនីនៅអាស៊ីអាគ្នេយ៍ កំណត់ថានឹងកើនឡើងក្នុងអត្រាប្រចាំឆ្នាំ ៤ ភាគរយ ក្នុងរយៈពេលប៉ុន្មានឆ្នាំខាងមុខនេះ ដោយប្រភពថាមពលស្អាតដូចជាខ្យល់ ពន្លឺព្រះអាទិត្យ ថាមពលជីវសាស្ត្រទំនើប និងថាមពលចេញពីកំដៅក្នុងផែនដី រំពឹងថានឹងបំពេញបានច្រើនជាង ១/៣ នៃកំណើនតម្រូវការថាមពលក្នុងតំបន់នៅឆ្នាំ ២០៣៥។ នេះបើតាមរបាយការណ៍ដដែករបស់ IEA។

ទោះយ៉ាងណាក៏ដោយ IEA និយាយថា កំណើននៃថាមពលស្អាននេះនឹងមិនគ្រប់គ្រាន់ ដើម្បីទូទាត់គ្នានឹងការបញ្ចេញកាបូនឌីអុកស៊ីត (CO2) ចេញពីថាមពល ក្នុងតំបន់នោះទេ។ ការបំភាយ CO2 ចេញពីថាមពល រំពឹងថានឹងកើនឡើង ៣៥ ភាគរយ ចាប់ពីពេលបច្ចុប្បន្ន ដល់ឆ្នាំ ២០៥០។

នាយកប្រតិបត្តិរបស់ IEA លោក Fatih Birol បាននិយាយថា៖ «បច្ចេកវិទ្យាថាមពលស្អាត មិនបានរីកចម្រើនគ្រប់គ្រាន់នោះទេ ហើយការបន្តពឹងផ្អែកខ្លាំងលើការនាំចូលឥន្ធនៈហ្វូស៊ីល កំពុងធ្វើឱ្យប្រទេសនានាប្រឈមមុខនឹងហានិភ័យនាពេលអនាគត»។

របាយការណ៍គូសបញ្ជាក់ថា តំបន់អាស៊ីអាគ្នេយ៍ទាំងមូល បានទាក់ទាញបានត្រឹមតែ ២ ភាគរយ នៃការវិនិយោគលើថាមពលស្អាតជាសកលប៉ុណ្ណោះ បើទោះបីជាតំបន់នេះ រួមចំណែក ៦ ភាគរយ នៃផលិតផលក្នុងស្រុកសរុបរបស់ពិភពលោក, ៥ ភាគរយ នៃតម្រូវការថាមពលសកល, និង ៩ ភាគរយ នៃចំនួនប្រជាជនសរុបរបស់ពិភពលោក ក៏ដោយ៕