បរិវិត្តកម្មបច្ចេកវិទ្យារបស់ខេត្តគ្វីចូវ ជំរុញកិច្ចសហ​ការ​ធុរកិច្ចរវាងសហគ្រាសធុនតូច និងមធ្យមចិន និងកម្ពុជា

លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍នៅថ្ងៃទី ១៦ ខែមករា ឆ្នាំ២០២៥ បានទទួលជួបគណៈប្រតិភូធុរកិច្ចមកពីសមាគមអ៊ីនធឺ​ណិតខេត្តគ្វីចូវ (Guizhou) នៅក្រសួងឧស្សាហកម្ម ដើម្បីពិភា​ក្សាអំពីការអភិវឌ្ឍនវានុវត្តន៍បច្ចេកវិទ្យា សម្រាប់តម្រូវការរបស់សហគ្រាសធុនតូច និងមធ្យមនៅកម្ពុជា។

លោក Yu Junfang ប្រធាន​សមាគមអ៊ីនធឺណិតខេត្តគ្វីចូវ បាន​លើកឡើងពីបទពិសោធន៍នៃបរិវត្តកម្មបច្ចេកវិទ្យារបស់ខេត្តគ្វីចូវ ​ដោយបានប្រែក្លាយពីខេត្តដែលមានការអភិវឌ្ឍតិចតួចនៅក្នុងប្រទេស ទៅជាមជ្ឈមណ្ឌលនវានុវត្តន៍ឈានមុខមួយ ក្នុងរយៈពេលត្រឹមតែមួយទសវត្សរ៍ តាមរយៈការអភិវឌ្ឍបច្ចេកវិទ្យា AI និង 5G ដើម្បីធ្វើទំនើបកម្មឧស្សាហកម្ម និងសេដ្ឋកិច្ចរបស់ខេត្ត។

គណៈប្រតិភូដែលមានតំណាងមកពីក្រុមហ៊ុនបច្ចេកវិទ្យាចម្រុះ បានស្នើកិច្ចសហប្រតិបត្តិការ ដោយប្រើប្រាស់ជំនាញបច្ចេកវិទ្យារបស់ខ្លួន ដើម្បីបង្កើតដំណោះស្រាយជាក់លាក់របស់កម្ពុជា។

គណៈប្រតិភូបានបង្ហាញពីគម្រោងជោគជ័យមួយចំនួនក្នុងវិស័យទេសចរណ៍ បច្ចេកវិទ្យាវេជ្ជសាស្ត្រ និងថ្នាលបច្ចេកវិទ្យាសម្រាប់ជំរុញសេដ្ឋកិច្ចឌីជីថល។

លោក Yu Junfang បានលើកឡើងថា៖ “យើងចង់រៀបចំកម្មវិធីផ្គូផ្គងអាជីវកម្ម ដើម្បីផ្សារភ្ជាប់ក្រុមហ៊ុន
បច្ចេក​​វិទ្យា​​​ចិនជាមួយសហគ្រាសធុនតូច និងមធ្យមនៅកម្ពុជា ក្នុងគោលដៅជំរុញការផ្ទេរចំណេះដឹង និងបង្កើតភាពជាដៃគូដ៏រឹងមាំ។”

លោកក៏បានបង្ហាញចំណាប់អារម្មណ៍របស់សមាគមក្នុងការអនុវត្តគំនិតផ្តួចផ្តើមបច្ចេកវិទ្យារួមគ្នាជាមួយកម្ពុជា ដែលអាចនឹងដាក់ឱ្យដំណើរការដំណោះស្រាបបច្ចេកវិទ្យាមួយចំនួន នៅក្នុងទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍ លើក ទី៣ នៅថ្ងៃទី២៦ ខែមីនា ឆ្នាំ២០២៥។

លោករដ្ឋមន្ត្រីបានកោតសរសើរជោគជ័យរបស់ខេត្តគ្វីចូវថា ជាគំរូដ៏ល្អមួយ ដោយផ្សារភ្ជាប់នឹងកិច្ចខិតខំប្រឹងប្រែងអភិវឌ្ឍសង្គម-សេដ្ឋកិច្ចរបស់កម្ពុជា ខណៈដែលកម្ពុជាកំពុងត្រៀមចាកចេញពីឋានៈជាប្រទេសអភិវឌ្ឍន៍តិចតួចនៅឆ្នាំ២០២៩។

លោករដ្ឋមន្ត្រីបានលើកឡើងថា កម្ពុជាកំពុងធ្វើពិពិធកម្មសេដ្ឋកិច្ច និងលើកកម្ពស់ផលិតភាពរបស់ខ្លួន ដោយជំរុញឱ្យឧស្សាហកម្មក្នុងស្រុកចាប់យកបច្ចេកវិទ្យាទំនើបៗ និងប្រើប្រាស់ភាគលាភប្រជាសាស្រ្ត ស្របតាមអាទិភាពជាយុទ្ធសាស្ត្ររបស់រាជរដ្ឋាភិបាលក្នុងការជំរុញនវានុវត្តន៍បច្ចេកវិទ្យា។

លោករដ្ឋមន្ត្រីបានបង្ហាញការគាំទ្រចំពោះគោលដៅរបស់សមាគម ក្នុងការកៀរគរក្រុមហ៊ុនបច្ចេកវិទ្យាខ្នាតតូច និងមធ្យមរបស់ចិន ដើម្បីធ្វើជាដៃគូបង្កើតដំណោះស្រាយសម្រាប់បរិបទកម្ពុជា៕