ព័ត៌មានអន្ដរជាតិ

ផលិតកម្មឈីបវៀតណាម រំពឹងទទួលប្រយោជន៍ពីគោលនយោបាយ ត្រាំ

បានផុស

១ year មុន

នៅ

ថ្ងៃអង្គារ ១៨ កុម្ភៈ ២០២៥

ដោយ

នាយករងនៃមជ្ឈមណ្ឌលនវានុវត្តន៍ជាតិវៀតណាម លោក Võ Xuan Hoài បានអះអាងថា កិច្ចសហប្រតិបត្តិការផលិតកម្មបន្ទះឈីបរបស់វៀតណាមជាមួយសហរដ្ឋអាមេរិក នឹងមិនរងផលប៉ះពាល់ដោយគោលនយោបាយរឹតបន្ដឹងលើការនាំចេញបន្ទះឈីប និងបច្ចេកវិទ្យាអាមេរិក របស់លោកប្រធានាធិបតី ដូណាល់ ត្រាំ នោះទេ។ នេះបើតាមការចុះផ្សាយរបស់កាសែត Viet Nam News។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងបែបនេះរបស់អ្នកជំនាញវៀតណាម ធ្វើឡើងក្រោយមានសេចក្ដីរាយការណ៍ថា រដ្ឋបាលរបស់ ត្រាំ កំពុងពិចារណាដាក់ការរឹតត្បឹតលើការលក់បន្ទះឈីបបញ្ញាសិប្បនិម្មិត (AI) ដល់ប្រទេសចិន ដែលអាចបង្កើនកម្ដៅកាន់តែខ្លាំងសម្រាប់ទំនាក់ទំនងពាណិជ្ជកម្ម និងបច្ចេកវិទ្យារវាងប្រទេសទាំង២។ ការណ៍នេះកើតឡើងក្រោយលោក ត្រាំ ប្រកាសពន្ធ ២៥ ភាគរយ លើទំនិញម៉ិកស៊ិក និងកាណាដា និង ១០ ភាគរយ លើទំនិញចិន ហើយគ្រោងនឹងប្រកាសពន្ធលើប្រទេសផ្សេងៗទៀត។

ខណៈអ្វីទាំងអស់នេះបង្កើនក្តីបារម្ភដល់ខ្សែចង្វាក់ផ្គត់ផ្គង់សកល លោក Hoài បាននិយាយយ៉ាងដូច្នេះថា៖ «សហរដ្ឋអាមេរិកចង់បង្កើនការផលិតបន្ទះឈីបទំនើប និងបច្ចេកវិទ្យាកម្រិតខ្ពស់ក្នុងស្រុក ប៉ុន្តែនឹងនៅតែត្រូវការការផ្គត់ផ្គង់ពីដៃគូរបស់ខ្លួន រួមទាំងវៀតណាមផងដែរ»។ លោកបន្តថា៖ «កិច្ចសហប្រតិបត្តិការរវាងវៀតណាម និងអាមេរិក រួមទាំងការផលិតបន្ទះឈីប និងគម្រោងនវានុវត្តន៍ផ្សេងទៀត នឹងមិនរងផលប៉ះពាល់ ឬយ៉ាងហោចណាស់ក៏មិនទាន់រងផលប៉ះពាល់ដែរ»។

ផ្ទុយទៅវិញ លោក Hoài បានបន្ថែមថា ការរៀបចំរចនាសម្ព័ន្ធឡើងវិញនៃខ្សែចង្វាក់ផ្គត់ផ្គង់បន្ទះឈីបរបស់អាមេរិក អាចជួយវៀតណាមទាក់ទាញអ្នកវិនិយោគបរទេសកាន់តែច្រើន និងលើកទឹកចិត្តដល់អាជីវកម្មក្នុងស្រុកឱ្យចូលរួមកាន់តែច្រើនក្នុងផលិតកម្មបន្ទះឈីប។ លោកថា វានឹងបង្កើនសមត្ថភាពរបស់វៀតណាមក្នុងការវេចខ្ចប់បន្ទះ ការដំឡើងនិងការសាកល្បង ដែលជាដំណាក់កាលផលិតកម្ម ដែលមិនស្ថិតក្រោមការគ្រប់គ្រងដ៏តឹងរ៉ឹងរបស់អាមេរិក។

អ្នកជំនាញដដែលបន្តថា៖ «នាយករដ្ឋមន្ត្រីរបស់យើងបានព្រមានអំពីសង្គ្រាមពាណិជ្ជកម្មសកលដែលអាចកើតឡើងនៅឆ្នាំនេះ។ វាគឺជាបញ្ហាប្រឈមមួយ ប៉ុន្តែក៏បង្កើតឱកាសជាច្រើនផងដែរ»។ ផលប្រយោជន៍មួយដែលកើតចេញនោះ គឺការផ្លាស់ប្ដូរទីតាំងផលិតកម្មរបស់រោងចក្រចេញពីចិន ទៅប្រទេសផ្សេងៗរួមទាំងវៀតណាម៕