កម្ពុជានឹងបន្តប្រ​ឈមកត្តា​ខាងក្រៅ ខណៈកំពុងរៀបចំខ្លួនចាកចេញពី LDC ​នៅឆ្នាំ២០២៩​

លោក អូន ព័ន្ធមុនីរ័ត្ន ឧបនាយករដ្ឋមន្រ្តី និងជារដ្ឋមន្រ្តីក្រសួងសេដ្ឋកិច្ច​ និងហិរញ្ញវត្ថុការចាកចេញពី ចំណាត់ថ្នាក់នៃក្រុមប្រទេសអភិវឌ្ឍតិចតួច (LDC) របស់កម្ពុជានៅចុងឆ្នាំ២០២៩ខាងមុខ​នេះឆ្លុះបញ្ចាំងអំពីសមិទ្ធផលប្រកបដោយបុរេសកម្មរបស់រាជរដ្ឋាភិបាលក្នុងការ​ជំរុញ​កំណើន​សេដ្ឋកិច្ច​ និងលើកកម្ពស់កម្រិតជីវភាពរបស់ប្រជាពលរដ្ឋ ប៉ុន្តែ​កម្ពុជាក៏បន្តហ៊ុមព័ទ្ធដោយកត្តាហានិភ័យចម្បងៗខាងក្រៅផងដែរ។

ការលើកឡើងរបស់លោក​ឧបនាយករដ្ឋមន្រ្តីធ្វើឡើងក្នុងពិធីបិទសន្និបាតរបស់ក្រសួង​ផែនការ​កាលពីសប្តាហ៍មុន ថាជាមួយនិងសមិទ្ធផលដែលកម្ពុជាសម្រេចបាននាប៉ុន្មានទសវត្ស​មកនេះ បានរុញច្រានឲ្យកម្ពុជា ចេញផុតពីឋានៈជាប្រទេសមានចំណូលទាប និង បានប្រែក្លាយទៅជា «ប្រទេសមានចំណូលមធ្យមកម្រិតទាប» ចាប់ពីឆ្នាំ ២០១៥ ​, ហើយបច្ចុប្បន្ន កម្ពុជាក៏កំពុងត្រៀមខ្លួនចាកចេញពី «ចំណាត់ថ្នាក់នៃក្រុមប្រទេសអភិវឌ្ឍ តិចតួច» នៅឆ្នាំ ២០២៩ ខាងមុខផងដែរ ស្របតាមសន្ទុះនៃការអភិវឌ្ឍរបស់ខ្លួន និង អនុលោមតាមការអនុម័តរបស់អង្គការសហប្រជាជាតិ កាលពីថ្ងៃទី ១៩ ខែ ធ្នូ ឆ្នាំ ២០២៤ កន្លងទៅ ។

លោកបានថ្លែងថា៖«ការចាកចេញពី ចំណាត់ថ្នាក់នៃក្រុមប្រទេសអភិវឌ្ឍតិចតួច របស់កម្ពុជា គឺជាសមិទ្ធផល គួរជាទីមោទនៈ ដែលកើតចេញពីកិច្ចប្រឹងប្រែងរបស់រាជរដ្ឋាភិបាល​។​ ប៉ុន្តែ, ទន្ទឹមនេះ, ការណ៍នេះក៏នឹងអាចនាំ មកនូវបច្ច័យមួយចំនួន ដែល​ត្រូវរួមគ្នាគិតគូរ និង យកចិត្តទុកដាក់ផងដែរ ក្នុងនោះរួមមាន  ​ ការរិចរិលនៃប្រព័ន្ធអនុគ្រោះ និង ទីផ្សារពាណិជ្ជកម្ម; ​ ការថមថយនូវជំនួយអភិវឌ្ឍន៍ផ្លូវការពីដៃគូ, ទាំងក្នុង ទម្រង់ជាជំនួយឥតសំណង និង ជាហិរញ្ញប្បទានដែលមានកម្រិតសម្បទានខ្ពស់; ​ ភាពងាយរងគ្រោះទៅនឹងហានិភ័យពីកត្តាខាងក្រៅ; ​ ភាពមានកម្រិតនៃលំហថវិកា, ក្នុងករណីមានភាពចាំបាច់ នៃតម្រូវការចំណាយអន្តរាគមន៍ ក្នុងទ្រង់ទ្រាយធំ ដោយប្រើប្រាស់ថវិការដ្ឋ; និង ភាពមានកម្រិតនៃសមត្ថភាពស្ថាប័ន, ទាំង ក្នុងវិស័យសាធារណៈ និង វិស័យឯកជន, ក្នុងការឆ្លើយតបទៅនឹងតម្រូវការ និង និន្នាការ ថ្មី ។

លោក​បានថ្លែងបន្តទៀតថា៖« ​កម្ពុជា ក៏ត្រូវបានបន្តហ៊ុមព័ទ្ធដោយកត្តាហានិភ័យចម្បងៗខាងក្រៅ ដែលពុំ ចំណុះនឹងការគ្រប់គ្រងរបស់ខ្លួនឡើយ, ក្នុងនោះ រួមមាន​ការបន្តប្រឈមមុខខាង ភូមិសាស្ត្រនយោបាយ កាន់តែស្រួចស្រាល់; ការបែកខ្ញែកនៃសេដ្ឋកិច្ចសកល ដែលប៉ះពាល់ ដល់កិច្ចសហប្រតិបត្តិការ និង ពាណិជ្ជកម្មអន្តរជាតិ; ការប្រកួតប្រជែងផ្នែកបច្ចេកវិទ្យា ព័ត៌មាន និង បញ្ញាសប្បនិម្មិតកាន់តែខ្លាំងក្លា; ការងើបមកវិញនៃនិន្នាការឯកតោភាគីនិយម; ភាពមិនច្បាស់លាស់នៃទស្សនវិស័យនៃកំណើនសេដ្ឋកិច្ច នៃបណ្តាប្រទេស និង តំបន់ ជាដៃគូ ពាណិជ្ជកម្មសំខាន់ៗរបស់កម្ពុជា; ព្រមទាំង ផលវិបាកពីការប្រែប្រួលអាកាសធាតុ និង គ្រោះ ធម្មជាតិ ​។ការណ៍នេះ តម្រូវឲ្យកម្ពុជា រៀបចំគោលនយោបាយ, យុទ្ធសាស្ត្រ និង ផែនការសម្រាប់ ការអភិវឌ្ឍឲ្យបានច្បាស់លាស់, ត្រឹមត្រូវ និង គ្រប់ជ្រុងជ្រោយ »។​ នេះបើយោងតាមលោកឧបនាយករដ្ឋមន្រ្តី លោក អូន ព័ន្ធមុនីរ័ត្ន។

រាជរដ្ឋាភិបាល  បានវាយតម្លៃថា សេដ្ឋកិច្ចកម្ពុជា អាចសម្រេចបានកំណើន ក្នុងរង្វង់ប្រមាណ ៦% នៅ ឆ្នាំ ២០២៤ និង ត្រូវបានព្យាករថា នឹងបន្តកើនឡើង ក្នុងរង្វង់ប្រមាណ ៦,៣% នៅឆ្នាំ ២០២៥ នេះ៕

​