ព័ត៌មានអន្ដរជាតិ

ចិនធានាក្រុមហ៊ុនបរទេស ចំពេលភាពតានតឹងពាណិជ្ជកម្មសកល

បានផុស

១ year មុន

នៅ

ថ្ងៃចន្ទ ២៤ មីនា ២០២៥

ដោយ

ឧបនាយករដ្ឋមន្ត្រីចិន លោក He Lifeng បានជួបជាមួយមេក្រុមហ៊ុនបរទេសធំៗជាច្រើនដូចជាក្រុមហ៊ុន Apple, Pfizer, Mastercard, Cargill និងក្រុមហ៊ុនដទៃទៀតកាលពីថ្ងៃអាទិត្យ ដើម្បីផ្ដល់ការធានាទំនុកចិត្តពួកគេឡើងវិញអំពីសក្តានុពលអាជីវកម្មរបស់ប្រទេស ចំពេលភាពតានតឹងពាណិជ្ជកម្មសកលកើនឡើង។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

លោកថ្លែងយ៉ាងដូច្នេះថា៖ «ចិននឹងបន្តកែលម្អបរិយាកាសធុរកិច្ច និងស្វាគមការវិនិយោគកាន់តែច្រើនឡើងដោយ ក្រុមហ៊ុនពហុជាតិក្នុងប្រទេសចិន ចែករំលែកឱកាសសម្រាប់ការអភិវឌ្ឍ»។ លោកបន្ថែមពីលើនេះ ដោយពិពណ៌នាអំពីសេដ្ឋកិច្ចរបស់ប្រទេសចិនថា «មានភាពធន់ខ្ពស់» និង «ពោរពេញដោយភាពរឹងមាំ»។ នេះបើតាមសម្រង់សម្ដីមានផ្សាយក្នុងសេចក្ដីថ្លែងការណ៍របស់ក្រសួងពាណិជ្ជកម្មចិន។

គួរគូសបញ្ជាក់ថា នាយកប្រតិបត្តិបរទេសជាច្រើនកំពុងនៅទីក្រុងប៉េកាំង ដើម្បីចូលរួមវេទិកាធុរកិច្ចនៅថ្ងៃអាទិត្យ និងថ្ងៃចន្ទនេះ ដោយអ្នកខ្លះរំពឹងថានឹងជួបជាមួយប្រធានាធិបតី ស៊ី ជិនពីង នៅថ្ងៃសុក្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចិនចង់ទាក់ទាញការវិនិយោគបរទេសចំពេលភាពតានតឹងផ្នែកភូមិសាស្ត្រនយោបាយកាន់តែខ្លាំងឡើង ខណៈអ្នកបង្កើតគោលនយោបាយចិន ព្យាយាមជំរុញការប្រើប្រាស់ក្នុងស្រុក ដើម្បីប៉ះប៉ូវនូវផលប៉ះពាល់ដែលបណ្ដាលមកពីគោលនយោបាយពន្ធគយរបស់ប្រធានាធិបតីអាមេរិក លោក ដូណាល់ ត្រាំ ដែលជំរុញភាពតានតឹងពាណិជ្ជកម្មសកល។

នៅឯវេទិកាអភិវឌ្ឍន៍ចិនកាលពីថ្ងៃអាទិត្យដូចគ្នា នាយករដ្ឋមន្ត្រីចិន លោក លី ឈាំង បានជំរុញឱ្យប្រទេសនានាបើកទីផ្សាររបស់ពួកគេដើម្បីប្រយុទ្ធប្រឆាំងនឹង «ការកើនឡើងអស្ថិរភាព និងភាពមិនច្បាស់លាស់» ហើយបានសន្យាដាក់ចេញនូវគោលនយោបាយម៉ាក្រូសេដ្ឋកិច្ចសកម្មបន្ថែមទៀត៕