ក្រុមហ៊ុនឯកជនពីរសហការគ្នាក្នុងផ្តល់គម្រោង​ហិរញ្ញប្បទានសាជីវកម្មនៅកម្ពុជា

ធនាគារ អេស៊ីលីដា និងក្រុមហ៊ុនផ្គត់ផ្គង់​ថាមពល​លើសកលលោក​ តូតាល់ អេនើជី  ​បាន​​​ចាប់​​​ដៃគ្នាលើការផ្តល់ហិរញ្ញប្បទានសាជីវកម្មដែលនឹងផ្តល់នូវដំណោះស្រាយហិរញ្ញវត្ថុ និងការទូទាត់ឌីជីថលកាន់តែងាយស្រួល និងទូលំទូលាយដល់សាធារណជន។

ការសម្រេចបាននូវកិច្ចសហការនេះធ្វើឡើងតាមរយៈការចុះនូវអនុស្សរណៈនៃការយោគយល់គ្នា (MoU) កាលពីថ្ងៃទី១ខែមេសានៅទីស្នាក់ការកណ្តាលរបស់អេស៊ីលីដា។

លោកស្រី សុខ សោភា គណៈប្រធាន​នាយិកា​ប្រតិបត្តិ​ប្រតិបត្តិការ ធនាគារ អេស៊ីលីដា បានថ្លែងនៅក្នុងកម្មវិធីនោះថា​  ការចុះហត្ថលេខាលើអនុស្សរណៈ នៃការយោគយល់គ្នានេះ មិនមែនជាលើកទី១នោះទេ កន្លងមក ធនាគារ អេស៊ីលីដា និងក្រុមហ៊ុនតូតាល់ បានចុះកិច្ចព្រមព្រៀង និង   MoU មួយចំនួន និងបានរៀបចំកម្មវិធីចុះហត្ថលេខាលើអនុស្សរណៈនៃការយោគយល់គ្នាលើកទី១កាលពីឆ្នាំ២០២១។ 

«ដើម្បីពង្រឹង និងជំរុញការអនុវត្តកិច្ចព្រមព្រៀង និងអនុស្សរណៈ នៃការយោគយល់គ្នាកន្លងមក ឲ្យកាន់តែមានប្រសិទ្ធភាព និងផ្តល់សេវាកម្មហិរញ្ញវត្ថុបន្ថែមទៀត ទើប ធនាគារ អេស៊ីលីដា និងក្រុមហ៊ុនតូតាល់ ឈានដល់ការចុះហត្ថលេខាលើអនុស្សរណៈ នៃការយោគយល់គ្នាលើកទី២​​នាពេលនេះ ដើម្បីផ្តល់នូវ​ផ្តល់​ជម្រើស              ​ហិរញ្ញប្បទាន​គ្រប់ប្រភេទជូនដល់​អតិថិជន សម្រាប់ប្រើប្រាស់ក្នុងដំណើរការអាជីវកម្ម​»។ នេះបើយោងតាមលោកស្រី សោភា។

លោកស្រីបានមានប្រសាសន៍បន្ថែមទៀតថាតាមរយៈកិច្ចសហការនេះ សាធារណជនអាចធ្វើការ​ទូទាត់​តាមបែប​ឌីជីថល ម៉ាស៊ីន POS និងការបញ្ចូលទឹកប្រាក់ទៅក្នុងប័ណ្ណសមាជិករបស់ក្រុមហ៊ុនតូតាល់ ព្រមទាំងការទូទាត់វិក័យបត្ររបស់​ស្ថានីយប្រេងឥន្ធនៈតូតាល់ លក់ដុំ និង​លក់រាយ​ទាំងអស់ ​នៅតាម​បញ្ជរធនាគារ អេស៊ីលីដា ការទូទាត់ប្រាក់​តាមរយៈ​អេស៊ី ស៊ូភើអេប និង​ការទូទាត់ប្រាក់​តាមរយៈ​អេស៊ីលីដា អ៊ីនធើណែត ប្រកប​ដោយទំនុកចិត្ត ​សុវត្ថិភាព និង​​ប្រសិទ្ធភាពខ្ពស់។ ​

លោកស្រី ​សោភាថា៖« ភាពជាដៃគូនេះក៏បានផ្តល់អត្ថប្រយោជន៍ជាច្រើនដល់ម្ចាស់ស្ថានីយចែកចាយប្រេងឥន្ធនៈរបស់ ក្រុមហ៊ុនតូតាល់ជាមួយនឹង សេវាឥណទានអេស៊ីលីដា រួមមាន ប័ណ្ណឥណទាន (វីសា/ម៉ាស្ទ័រ) ឥណទានសម្រាប់ពាណិជ្ជករ អេស៊ីលីដា ឥណទានសម្រាប់អ្នកចែកចាយ និងសេវាហិរញ្ញប្បទានពាណិជ្ជកម្ម ជាមួយនឹងអត្រាការប្រាក់ពិសេស និងលក្ខខណ្ឌងាយស្រួល។ ​ តាមរយៈនៃការចុះអនុស្សរណៈ នៃការយោគយល់គ្នានេះ យើងខ្ញុំប្តេជ្ញាផ្តល់នូវសេវាកម្មដ៏ល្អប្រសើរ និងមធ្យោបាយហិរញ្ញវត្ថុប្រកបដោយនវានុវត្តន៍ សម្រាប់បំពេញតម្រូវការរបស់អតិថិជន និងសាធារណជន»។

គិតត្រឹមដំណាច់ខែធ្នូ ឆ្នាំ២០២៤ នេះ ធនាគារ អេស៊ីលីដា មានទ្រព្យសកម្មសរុបចំនួនជាង ១០,៨៣ប៊ីលានដុល្លារអាមេរិក ប្រាក់បញ្ញើសន្សំសរុបចំនួន ៨,៣៦ប៊ីលានដុល្លារអាមេរិក និងមានអតិថិជនប្រមាណជាង ៥,៥២លាននាក់។ ធនាគារ អេស៊ីលីដា មានដៃគូអាជីវកម្ម សរុបច្រើងជាង ០,៥៤លានដៃគូ និងមានអ្នកប្រើប្រាស់អេស៊ីស៊ូភើអេបសរុបចំនួនជាង ៤,៥៣ លាននាក់៕