ប្រតិភូវិនិយោគផ្នែកអំបោះ និងក្រណាត់ឥណ្ឌាសិក្សាអំពីសក្តានុពលនៅកម្ពុជា

លោក Albert Tan អនុប្រធាន សមាគមវាយនភណ្ឌ សម្លៀកបំពាក់ ស្បែកជើង និងផលិផលធ្វើដំណើរនៅកម្ពុជា (TAFTAC) នៅថ្ងៃទី ០៧ ខែមេសា ឆ្នាំ ២០២៥បាន ទទួលដំណើរទស្សនកិច្ចរបស់គណៈប្រតិភូរដ្ឋាភិបាលនៃរដ្ឋ Tamil Nadu និងសហភាព​ឧស្សាហកម្ម កម្មន្តសាល និងផ្គត់ផ្គង់អំបោះ ក្រណាត់ និងវាយនភណ្ឌឥណ្ឌា។

លោក Albert Tan បានលើកឡើងថា បច្ចុប្បន្ន វិនិយោគិនវិស័យកាត់ដេររបស់កម្ពុជា​បាននាំចូលប្រហែល ៦៥% នៃវត្ថុធាតុដើមពីប្រទេសចិន ១៥% ពីប្រទេសវៀតណាម និងពីប្រទេសផ្សេងៗទៀត។

គណៈប្រតិភូយល់ឃើញថា ប្រទេសកម្ពុជា ជាទីផ្សារសក្តានុពលថ្មីមួយសម្រាប់អាជីវកម្ម និងការវិនិយោគ ហើយនឹងធ្វើការយ៉ាងជិតស្និទ្ធជាមួយ TAFTAC ដើម្បីលើកកម្ពស់​ពាណិជ្ជកម្ម​រវាងប្រទេសទាំងពីរ ដោយសារមានគុណសម្បត្តិប្រកួតប្រជែងមួយចំនួន។

អនុប្រធានសមាគមវាយនភណ្ឌ បានជម្រាបគណៈប្រតិភូថា ពេលវេលា បញ្ជូនទំនិញ ខ្លីជាងមុនក្នុងការទិញគឺចាំបាច់ ដើម្បីឱ្យមានសក្តានុពលក្នុងការវិនិយោគ​លើវត្ថុធាតុ​ដើមដល់រោងចក្រនៅកម្ពុជា ជាពិសេស​នៅក្នុងពេលត្រៀមចាកចេញ ពីស្ថានភាពជា​ប្រទេសអភិវឌ្ឍន៍តិចតួចនៅឆ្នាំ២០២៩ ដែលតម្រូវឱ្យប្រទេសកម្ពុជាធ្វើដំណើរការ​បរិវត្តកម្មទ្វេដើម្បីទទួលបានការអនុគ្រោះ។

TAFTAC ក៏បានជម្រាបគណៈប្រតិភូថា ការកសាងសមត្ថភាព និងការអភិវឌ្ឍជំនាញ គឺជាការវិនិយោគរបស់យើងលើធនធានមនុស្ស ហើយយើងអាចធ្វើការជាមួយគ្នាដើម្បីបង្កើន​ជំនាញបន្ថែមទៀតនៅក្នុងវិស័យពាក់ព័ន្ធ។ គណៈប្រតិភូបានទស្សនកិច្ចវិទ្យាស្ថានបណ្តុះបណ្តាលវិស័យកាត់ដេរនៅកម្ពុជា(CGTI) ជួបជាមួយសិស្ស និងសិក្ខាកាម។

កាតព្វកិច្ចត្រួតពិនិត្យគ្រប់ជ្រុងជ្រោយផ្នែកបរិស្ថាន និរន្តរភាព តម្រូវដោយប្រទេសផ្សេងៗ ក៏ស្ថិតនៅក្នុងការយកចិត្តទុកដាក់ និងសកម្មភាពរបស់យើងផងដែរ។

ស្ថានទូតឥណ្ឌា និង TAFTAC បន្តទំនាក់ទំនងកាន់តែរឹងមាំ លើកកម្ពស់ពាណិជ្ជកម្ម និងកិច្ចសហប្រតិបត្តិការក្នុងសកម្មភាពពាណិជ្ជកម្មផ្សេងៗ៕