ប្រធានសមាគម​ អំពាវនាវកុំឱ្យអាជីវករលក់សាច់ជ្រូក ដំឡើងថ្លៃ ក្នុងឱកាសបុណ្យចូលឆ្នាំ

លោក​ ស្រ៊ុន ពៅ ប្រធានសមាគមអ្នកចិញ្ចឹមសត្វនៅកម្ពុជា សំណូមពរកុំឱ្យអាជីវករលក់សាច់ជ្រូកតម្លើងថ្លៃ នៅក្នុងឱកាសបុណ្យចូលឆ្នាំប្រពៃណីខ្មែរ ដែលនឹងឈានចូលមកដល់នៅថ្ងៃទី១៤-១៦ ខែមេសា ឆ្នាំ២០២៥ ខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងកិច្ចសម្ភាសន៍ជាមួយសារព័ត៌មានកម្ពុជាថ្មី លោក ស្រ៊ុន ពៅ បានមានប្រសាសន៍ថា៖ «ក្នុងនាមខ្ញុំជាប្រធានសមាគមអ្នកចិញ្ចឹមសត្វនៅកម្ពុជា សូមសំណូមពរដល់អ្នកចិញ្ចឹមជ្រូក និងអាជីវករលក់សាច់ជ្រូកតាមផ្សារទូទាំងប្រទេស សូមកុំលក់តម្លើងថ្លៃ ដោយលក់ក្នុងតម្លៃថេរ ដើម្បីឱ្យអ្នកទិញ ក៏ដូចជាប្រជាជនខ្មែរទាំងអស់ អាចរីករាយនឹងទទួលយកតម្លៃមួយដែលចាត់ទុកថាសមរម្យ ក្នុងឱកាសបុណ្យចូលឆ្នាំប្រពៃណីខ្មែរ ខាងមុខនេះ»។

ប្រធានស​មាគមរូបនេះ បានបញ្ជាក់ដែរថា ចំពោះអាជីវករលក់សាច់ជ្រូកនៅតាមផ្សារវិញ ប្រសិនបើចង់ឡើងថ្លៃ ក៏អាចឡើងត្រឹមតែបន្ដិចបន្ដួចទៅបានហើយ នេះក៏ព្រោះតែស្ថានភាពសេដ្ឋកិច្ចសព្វថ្ងៃកំពុងតែលំបាក បើបងប្អូនគិតតែចំណេញដូចរៀងរាល់ឆ្នាំ គឺមិនបាននោះទេ។

សម្រាប់តម្លៃជ្រូករស់ នៅពេលបច្ចុប្បន្ននេះ លោក ស្រ៊ុន ពៅ ក៏បានបញ្ជាក់ផងដែរថា ជ្រូករស់នៅលើទីផ្សារមានតម្លៃចាប់ពី ១ ម៉ឺនរៀល ដល់ ១ ម៉ឺន ៥​ រយរៀល ក្នុងមួយគីឡូក្រាម។ ចំណែក សាច់ជ្រូកនៅលើទីផ្សារមានតម្លៃចាប់ពី ១ ម៉ឺន ៨ ពាន់រៀល ទៅ ២ ម៉ឺនរៀល ក្នុងមួយគីឡូក្រាម។

យោងតាមសមាគមអ្នកចិញ្ចឹមសត្វ កម្ពុជាមានតម្រូវការសាច់ជ្រូកប្រមាណ ៩ ពាន់ក្បាល ក្នុងមួយថ្ងៃនៅទូទាំងប្រទេស៕

អត្ថបទ ៖ សួស សិត