អាស៊ានព្រមានពីហានិភ័យអស្ថិរភាពសេដ្ឋកិច្ចសកល ជុំវិញពន្ធ​បដិការអាមេរិក

សមាគមប្រជាជាតិអាស៊ីអាគ្នេយ៍ (អាស៊ាន) បានព្រមានថា យុទ្ធសាស្ត្រពន្ធគយបដិការឯកតោភាគី​របស់​សហរដ្ឋអាមេរិក បង្កហានិភ័យដល់ស្ថិរភាពសេដ្ឋកិច្ចពិភពលោក និងរំខានដល់ខ្សែសង្វាក់ផ្គត់ផ្គង់អន្តរជាតិ។

ការព្រមាននេះ ធ្វើឡើងក្រោយ​រដ្ឋមន្រ្តីក្រសួងសេដ្ឋកិច្ច និងពាណិជ្ជកម្មពីបណ្ដាប្រទេសអាស៊ានទាំង ១០ រួម​ជាមួយ​នឹង​រដ្ឋមន្រ្តីពីប្រទេសទីម័រខាងកើត បាន​ជួបប្រជុំគ្នាពិសេសតាមអនឡាញកាលពីថ្ងៃព្រហស្បតិ៍ម្សិលមិញ ដើម្បីពិភាក្សាគ្នាពីការឆ្លើយតបទៅនឹង​គោលនយោបាយពន្ធគយរបស់ប្រធានាធិបតីអាមេរិក លោក ដូណាល់ ត្រាំ។

ខណៈប្រកាន់ខ្ជាប់ថាខ្លួននឹង​មិនសងសឹកអាមេរិក ប្លុកអាស៊ានបាន​និយាយក្នុងសេចក្ដីថ្លែងការណ៍ក្រោយកិច្ចប្រជុំយ៉ាងដូច្នេះថា៖ «អាស៊ាន ដែលជា​ប្លុកសេដ្ឋកិច្ចធំជាងគេទី៥​លើ​ពិភពលោក មានការព្រួយបារម្ភយ៉ាងខ្លាំង ចំពោះការដាក់បញ្ចូលពន្ធឯកតោភាគីនាពេលថ្មីៗនេះ ដោយសហរដ្ឋអាមេរិក។ កត្តានេះបានបង្កឱ្យមានភាពមិនច្បាស់លាស់ ហើយនឹងនាំមកនូវបញ្ហាប្រឈមសំខាន់ៗដល់អាជីវកម្ម ជាពិសេសសហគ្រាសមីក្រូ ខ្នាតតូច និងមធ្យម (MSMEs) ក៏ដូចជាសក្ដានុពលពាណិជ្ជកម្មសកល»។

អាស៊ានបន្តថា៖ «ការដាក់ពន្ធដែលមិនធ្លាប់មានពីមុនមកដោយសហរដ្ឋអាមេរិក នឹងរំខានដល់លំហូរពាណិជ្ជកម្ម និងការវិនិយោគក្នុងតំបន់ និងពិភពលោក ក៏ដូចជាខ្សែ​ច្រវ៉ាក់ផ្គត់ផ្គង់ ប៉ះពាល់ដល់អាជីវកម្ម និងអ្នកប្រើប្រាស់ទូទាំងពិភពលោក រួមទាំងសហរដ្ឋអាមេរិកផងដែរ»។

ខណៈលើកឡើងថា សហរដ្ឋអាមេរិកបានដើរតួនាទីយ៉ាងសំខាន់ក្នុងការលើកកម្ពស់សន្តិភាព ស្ថិរភាព កំណើនសេដ្ឋកិច្ច ការវិនិយោគ និងពាណិជ្ជកម្មនៅក្នុងតំបន់អាស៊ាន សេចក្ដីថ្លែងការណ៍របស់​អាស៊ាន​បាន​គូសបញ្ជាក់ថា ពន្ធរបស់លោក ត្រាំ ក៏នឹង​ «ជះឥទ្ធិពលផងដែរ​ដល់សន្តិសុខ និងស្ថិរភាពសេដ្ឋកិច្ច ប៉ះពាល់ដល់ជីវភាពរស់នៅរបស់ប្រជាជនរាប់លាននាក់នៅក្នុងតំបន់ និងរារាំងដល់វឌ្ឍនភាពសេដ្ឋកិច្ចក្នុងអាស៊ាន ជាពិសេសប្រទេស​មាន​សេដ្ឋកិច្ចមិនសូវអភិវឌ្ឍន៍ ​ក៏ដូចជាប៉ះពាល់ដល់​ទំនាក់ទំនងយូរអង្វែងនៃសេដ្ឋកិច្ច និងពាណិជ្ជកម្មអាស៊ាន-អាមេរិក»។ ​

ទោះបីជាយ៉ាងណាក៏ដោយ សេចក្ដីថ្លែងការណ៍ដដែលបាន​គូសបញ្ជាក់ថា អាស៊ាន​មានបំណងចូលរួមក្នុងកិច្ចសន្ទនាដោយស្មោះត្រង់ និងស្ថាបនាជាមួយសហរដ្ឋអាមេរិក ដើម្បីដោះស្រាយពាក់ព័ន្ធនឹងកង្វល់ពាណិជ្ជកម្ម ហើយប្លុក​នៅតែប្តេជ្ញាពង្រឹងសមាហរណកម្មសេដ្ឋកិច្ចក្នុងតំបន់ ពង្រីកកិច្ចសហប្រតិបត្តិការជាមួយដៃគូខាងក្រៅ និងរួមគ្នាធានាស្ថិរភាពពាណិជ្ជកម្មក្នុងតំបន់៕
​