ព័ត៌មានអន្ដរជាតិ

ឥណ្ឌូណេស៊ី៖ កម្មករ ៥០ ០០០ នាក់ អាចបាត់បង់ការងារដោយសារពន្ធ ត្រាំ

បានផុស

១ year មុន

នៅ

ថ្ងៃចន្ទ ២១ មេសា ២០២៥

ដោយ

ប្រធានសហព័ន្ធសហជីពការងារឥណ្ឌូណេស៊ី (KPSI) លោក Said Iqbal បានព្រមានកាលពីសប្ដាហ៍មុនថា កម្មករឥណ្ឌូណេស៊ី ប្រហែល ៥០ ០០០ អាចបាត់បង់ការងាររបស់ខ្លួន ដោយសារតែផលប៉ះពាល់នៃពន្ធគយថ្មីរបស់សហរដ្ឋអាមេរិក។ នេះបើតាមការចុះផ្សាយរបស់បណ្ដាញព័ត៌មាន VNA។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយការព្រមាន ប្រធានាធិបតីឥណ្ឌូណេស៊ី លោក ប្រាបូវូ ស៊ូប៊ីយ៉ានតូ បានណែនាំសមាជិកគណៈរដ្ឋមន្ត្រី ឱ្យស្វែងរកវិធានការការងារជាបន្ទាន់ ដើម្បីដោះស្រាយបញ្ហានេះ។

រដ្ឋាភិបាលឥណ្ឌូណេស៊ីកំពុងវាយតម្លៃលទ្ធភាពនៃផលប៉ះពាល់ពន្ធរបស់សហរដ្ឋអាមេរិក លើឧស្សាហកម្មដែលពឹងផ្អែកលើកម្លាំងពលកម្មក្នុងស្រុក ជាពិសេសវិស័យវាយនភណ្ឌ និងការកែច្នៃបង្គា។

អនុប្រធានក្រុមប្រឹក្សាសេដ្ឋកិច្ចជាតិរបស់ឥណ្ឌូណេស៊ី (DEN) លោកស្រី Mari Elka Pangestu បាននិយាយកាលពីថ្ងៃសុក្រថា វានៅតែមិនច្បាស់លាស់នូវអ្វីដែលនឹងកើតឡើងក្នុងរយៈពេល ៣០-៦០ ថ្ងៃខាងមុខ ខណៈការចរចាជាមួយសហរដ្ឋអាមេរិកនៅតែកំពុងដំណើរការ។

យោងតាមលោកស្រី Pangestu រដ្ឋាភិបាលបានបង្កើតគំនិតផ្តួចផ្តើមជាច្រើនដើម្បីកាត់បន្ថយផលប៉ះពាល់អវិជ្ជមាននៃពន្ធ ៣២ ភាគរយ លើការនាំចេញរបស់ឥណ្ឌូណេស៊ី។

ទាំងនេះរួមបញ្ចូលទាំងការបង្កើតក្រុមការងារដើម្បីដោះស្រាយបញ្ហាពាក់ព័ន្ធនឹងការបញ្ឈប់ការងារ។ លើសពីនេះ រដ្ឋាភិបាលឥណ្ឌូណេស៊ីគ្រោងនឹងសម្រួលបទប្បញ្ញត្តិ ដើម្បីទាក់ទាញការវិនិយោគបរទេសបន្ថែមទៀត រួមទាំងពីអាជីវកម្មរបស់សហរដ្ឋអាមេរិកផងដែរ។

គួររំឭកថា កាលពីថ្ងៃទី ២ ខែមេសា ប្រធានាធិបតីអាមេរិក លោក ដូណាល់ ត្រាំ បានប្រកាសពន្ធគយបដិការ ដែលមានអត្រាខ្ពស់ៗលើបណ្ដាប្រទេសនៅអាស៊ីអាគ្នេយ៍ រួមទាំងឥណ្ឌូណេស៊ី។ យ៉ាងណាមិញ ១ សប្ដាហ៍ក្រោយមក លោកបានប្រកាសពន្យារពេល ៩០ ថ្ងៃ សម្រាប់ប្រទេសភាគច្រើន រួមទាំងឥណ្ឌូណេស៊ីផងដែរ ដើម្បីបើកការចរចា៕