លោក ស៊ូ សុជាតិ៖ ការអប់រំវិជ្ជាជីវៈដល់គ្រប់តួអង្គក្នុងវិស័យមូលបត្រ ជាមូលដ្ឋានគ្រឹះមួយដ៏សំខាន់

ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា (ន.ម.ក.) លោក ស៊ូ សុជាតិ​ បាន​អះអាង​ថា វិស័យមូលបត្របាន និងកំពុងរីកចម្រើនយ៉ាងឆាប់រហ័ស ការណ៍នេះ ការអប់រំវិជ្ជាជីវៈ​ដល់គ្រប់​តួអង្គ​ក្នុង​វិស័យ​មូលបត្រ គឺជា​មូលដ្ឋាន​គ្រឹះមួយ​ដ៏សំខាន់។

អញ្ជើញជាអធិបតីបើកវគ្គបណ្តុះបណ្តាលនិងការប្រឡង និងកម្មវិធីអប់រំវិជ្ជាជីវៈបន្តក្នុងវិស័យមូលបត្រ លើកទី២៩ កាល​ពី​ថ្ងៃ​ទី​២៣ ខែ​មេសា លោក ស៊ូ សុជាតិ បាន​លើក​ឡើង​ថា​ ការអប់រំវិជ្ជាជីវៈ​ដល់គ្រប់តួអង្គក្នុងវិស័យមូលបត្រ គឺជាមូលដ្ឋានគ្រឹះមួយដ៏សំខាន់។

ជាក់ស្តែង ការប្រឡងក្នុងវិស័យមូលបត្រនេះ មិនត្រឹមតែជាលក្ខខណ្ឌតម្រូវនោះទេ វាជាឱកាស​ដើម្បីបង្ហាញ​ពីភាពរីកចម្រើននៃសមត្ថភាព និង​រក្សាបាននូវស្ដង់ដាវិជ្ជាជីវៈខ្ពស់ក្នុងការផ្ដល់សេវាកម្មជូនអតិថិជនរបស់ខ្លួន ប្រកបដោយក្រមសីលធម៌ និងទំនុកចិត្ត។

លោក ស៊ូ សុជាតិ បាន​សង្កត់ធ្ងន់​ថា បុគ្គលដែលបម្រើការងារឱ្យក្រុមហ៊ុនក្នុងវិស័យមូលបត្រ គួរតែចាប់យកនូវឱកាសរៀនសូត្រដោយខ្លួនឯងបន្តទៀត ដើម្បីភាពរីកចម្រើនរបស់ខ្លួននាពេលអនាគត និងរួមចំណែកដល់ភាពរីកចម្រើនរបស់ក្រុមហ៊ុន វិស័យមូលបត្រទាំងមូល ក៏ដូចជាសេដ្ឋកិច្ចជាតិ។

វគ្គបណ្តុះបណ្តាលនេះ ត្រូវបានរៀបចំឡើងដើម្បីពង្រឹងបន្ថែមនូវវិជ្ជាជីវៈជំនាញរបស់អ្នកចូលរួមក្នុងទីផ្សារ ជាពិសេសថ្នាក់ដឹកនាំ និងបុគ្គលិកជាន់ខ្ពស់របស់ក្រុមហ៊ុន ដែលទទួលបានអាជ្ញាបណ្ណ ការអនុញ្ញាត និង/ឬ ការទទួលស្គាល់ពី ន.ម.ក. ដើម្បីធ្វើអាជីវកម្មមូលបត្រ អាជីវកម្មគម្រោងវិនិយោគរួម អាជីវកម្មឧបករណ៍និស្សន្ទ ក្រុមហ៊ុនបោះផ្សាយ និងក្រុមហ៊ុនផ្តល់សេវាក្នុងវិស័យមូលបត្រ៕