ព័ត៌មានជាតិ

អ្នកហាលម្រេចខ្មៅលក់ឆ្នាំនេះ មានទីផ្សារល្អជាងឆ្នាំមុន

បានផុស

២ ថ្ងៃ មុន

នៅ

ថ្ងៃចន្ទ ២៨ មេសា ២០២៥

ដោយ

ម្រេចខ្មៅដែលប្រជាកសិករធ្វើការដាំដុះ និងហាល សម្ងួត កំពុងមានទីផ្សារល្អ បើប្រៀបធៀបតម្លៃទៅនឹងឆ្នាំកន្លងទៅ គឺខុសគ្នាជិតពាក់កណ្ដាល ធ្វើឲ្យកសិករដែលប្រកបមុខរបរដាំម្រេចសប្បាយរីករាយ និងទទួលយកបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សឿម សុវណ្ណ ជាប្រជាកសិកររស់នៅភូមិស៊ុង១ ឃុំស៊ុង ស្រុកសំឡូត ខេត្តបាត់ដំបង បានរៀបរាប់ថា លោកមានផ្ទៃដីចម្ការមួយចំនួន ដែលអាចដាំដុះផលដំណាំដើម្បីចិញ្ចឹមជីវភាពគ្រួសារបាន ប៉ុន្តែសម្រាប់អ្នករស់នៅឃុំស៊ុង ភាគច្រើនតែងប្រកបមុខរបរដាំដើមម្រេច។

លោកថា មុខរបរដាំម្រេចនេះក៏ត្រូវការការថែទាំយ៉ាងយកចិត្តទុកដាក់ ដើម្បីឲ្យទទួលបានផលល្អ ព្រោះម្រេចនៅពេលចាប់ផ្ដើមឲ្យផល គឺអាចប្រមូលផលម្រេចខ្ចី ផ្លែណាអន់ៗយើងអាចកាត់លក់បាន ដែលម្រេចខ្ចីនេះគេទិញយកទៅធ្វើជាម្ហូបអាហារជាដើម។

លោកសុវណ្ណ បានបន្ថែមថា លុះដល់ដំណាក់កាលម្រេចចាស់ល្អ គឺចាប់ផ្ដើមកាត់ប្រមូលផល យកមកហាល ដើម្បីធ្វើឲ្យក្លាយទៅជាម្រេចខ្មៅ ក្នុងនោះគេត្រូវបញ្ចូលទៅក្នុងម៉ាស៊ីនកិនដើម្បីឲ្យម្រេចរបេះទង និងបក់រែងយកគ្រាប់ម្រេចសុទ្ធល្អដោយមិនមានកម្ទេចរបស់ទងម្រេចឡើយ ហើយរយៈពេលនៃការហាលគឺប្រមាណបីថ្ងៃប៉ុណ្ណោះ លុះម្រេចក្រៀមស្ងួតល្អអាចលក់ទៅលើទីផ្សារបាន។

ចុងក្រោយ លោកបានបន្ថែមថា សម្រាប់ម្រេចខ្ចីមួយតោន អាចហាលស្ងួតទៅជាម្រេចខ្មៅបានជិត ៣០០ គីឡូក្រាម ហើយកាលពីឆ្នាំកន្លងទៅ ម្រេចខ្មៅលក់បានត្រឹមតែ ១៦.០០០ រៀល ក្នុងមួយគីឡូក្រាម លុះនៅឆ្នាំនេះម្រេចខ្មៅអាចឡើងរហូតដល់ ២៥.០០០ រៀល ក្នុងមួយគីឡូក្រាម ដែលខុសតម្លៃពីឆ្នាំមុនច្រើន និងអាចទទួលយកបាន ដោយមានអ្នកចុះមកទិញដល់ផ្ទះតែម្ដងបើទោះបីជាតំបន់ដែលលោករស់នៅគឺក្បែរនឹងព្រំដែនថៃក៏ដោយ។

ជាក់ស្តែង ចំពោះឈ្មួញដែលចុះមកប្រមូលទិញម្រេចនោះ លោកមិនដឹងថា ឈ្មួញដែលប្រមូលទិញម្រេចខ្មៅទាំងនេះយកទៅលក់ឱ្យប្រទេសជិតខាង ឬក៏លក់ក្នុងស្រុកនោះឡើយ៕

អត្ថបទ : សោ និយមរ័ត្ន