សកម្មភាពរោងចក្រចិន​ ធ្លាក់ចុះនៅខែមេសា ជុំវិញពន្ធគយ

សកម្មភាពរោងចក្រផលិតកម្មរបស់ប្រទេសចិន បាន​ធ្លាក់ចុះនៅខែមេសា ​ដោយបញ្ច្រាស់​កំណើន​ក្នុងរយៈពេល២​កន្លងទៅ ​ដោយសារតែ​សង្រ្គាមពាណិជ្ជកម្ម ដែល​សហរដ្ឋអាមេរិកដាក់ពន្ធ ១៤៥ ភាគរយ លើទំនិញចិន។ នេះបើតាមការចុះផ្សាយរបស់​បណ្ដាញទូរទស្សន៍ CNBC។ ​

​​ទិន្នន័យ​ពី​ការិយាល័យ​ស្ថិតិ​ជាតិ​ចិន ចេញផ្សាយនៅថ្ងៃពុធនេះ បានបង្ហាញថា ​សន្ទស្សន៍អ្នកគ្រប់គ្រងការបញ្ជាទិញ​ (PMI) បានធ្លាក់ចុះដល់ ៤៩,០ ពិន្ទុ នៅខែមេសា ធៀប​នឹង ៥០,៥ នៅខែមីនា។ ជាទូទៅ ពិន្ទុក្រោម ៥០ បង្ហាញពីការធ្លាក់ចុះ។​ វាធ្លាក់ចុះទាបជាងការរំពឹងទុករបស់សេដ្ឋវិទូ ៤៩,៨ ពិន្ទុ ក្នុងការស្ទង់មតិរបស់ទីភ្នាក់ងារសារព័ត៌មាន​រ៉យទ័រ និងទាបបំផុតក្នុងរយៈពេលជិត ២ ឆ្នាំ។

ចំណែកឯ PMI សម្រាប់សកម្មភាព​ក្រៅផលិតកម្ម​ ដែលគ្របដណ្តប់សេវាកម្ម និងសំណង់ វិញ បានធ្លាក់ចុះតិចតួចមកត្រឹម ៥០,៤ ពិន្ទុ ក្នុងខែមេសា ពី ៥០,៨ ពិន្ទុ នៅខែមីនា។ ​

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកជំនាញមើលឃើញថា កម្សោយនៃសកម្មភាពរោងចក្ររបស់ប្រទេស​ចិន បណ្ដាលមកពីការរំខានធ្ងន់ធ្ងរ​ផ្នែកពាណិជ្ជកម្មដែល​បណ្ដាលមកពីគោលនយោបាយពន្ធគយ។ សហរដ្ឋអាមេរិកបានបង្កើនពន្ធលើទំនិញចិនជាបន្តបន្ទាប់នៅខែមេសានេះ ដល់ ១៤៥ ភាគរយ ដែលធ្វើឱ្យអត្រាពន្ធលើចិន​កើនដល់ ២៤៥ ភាគរយ សម្រាប់មុខទំនិញមួយចំនួន។ ចិនឆ្លើយតបវិញ​ ដោយដាក់ពន្ធ ១២៥ ភាគរយ លើទំនិញអាមេរិក។

ការណ៍នេះបង្ហាញថា ចិនត្រូវការគោលនយោបាយជំរុញសេដ្ឋកិច្ចបន្ថែម ដើម្បីឆ្លើយតបទៅនឹងផលប៉ះពាល់នៃពន្ធ ខណៈមាន​សេចក្ដីរាយការណ៍ថា រោងចក្រនៅចិន​ខ្លះបាន​ផ្អាកប្រតិបត្តិការ និងបញ្ឈប់បុគ្គលិកបណ្ដោះអាសន្នចិន ដើម្បីរកទីផ្សារជំនួសសហរដ្ឋអាមេរិក៕