វៀតណាមរំពឹងវ៉ាដាច់ថៃ ក្លាយជា​មហាអំណាចសេដ្ឋកិច្ច​ទី២នៅអាស៊ាន ១ ទសវត្សរ៍ទៅមុខ

​របាយការណ៍ថ្មីពីមជ្ឈមណ្ឌលស្រាវជ្រាវសេដ្ឋកិច្ច និងធុរកិច្ច (CEBR) ​បានព្យាករថា វៀតណាម​នឹងវ៉ាដាច់ថៃនៅឆ្នាំ ២០៣៦ ក្លាយជាមហាអំណាចសេដ្ឋកិច្ចទី ២ របស់អាស៊ីអាគ្នេយ៍​ ដោយ​នៅតែពីក្រោយឥណ្ឌូណេស៊ីប៉ុណ្ណោះ។ នេះបើតាមការចុះផ្សាយរបស់កាសែត VnExpress កាលពីសប្ដាហ៍មុន។

ក្នុងរយៈពេល ១ ទសវត្សរ៍ទៅមុខដដែល វៀតណាម​អាចនឹង​ក្លាយជាប្រទេសមានសេដ្ឋកិច្ចធំជាងគេទី ២០ លើពិភពលោក។

របាយការណ៍តារាងសម្ព័ន្ធសេដ្ឋកិច្ចពិភពលោករបស់ CEBR បង្ហាញពីផែនការរយៈពេល ៥ ឆ្នាំបច្ចុប្បន្នរបស់វៀតណាម (២០២១-២០២៥) ដែលរំពឹងថា​ពី​អត្រាកំណើនសេដ្ឋកិច្ចប្រចាំឆ្នាំ ជាមធ្យម ៦,៥ ភាគរយ ក្នុង១ទសវត្សរ៍ទៅមុខ។​ កំណើននេះ រំពឹងថានឹងត្រូវបានជួយជំរុញដោយវិស័យផលិតកម្មដ៏រឹងមាំរបស់វៀតណាម ដែល​កាន់តែរួមបញ្ចូលទៅ​ក្នុងខ្សែ​ច្រវ៉ាក់ផ្គត់ផ្គង់អន្តរជាតិតាមរយៈកិច្ចព្រមព្រៀងពាណិជ្ជកម្ម និងការនាំចេញចម្រុះ​។

វៀតណាមក៏មានមហិច្ឆិតាក្លាយជាប្រទេសមានប្រាក់ចំណូលខ្ពស់នៅឆ្នាំ ២០៤៥ ដែលគោលដៅនេះ​ ទាមទារឱ្យ​​​ផលិតផលក្នុងស្រុកវៀតណាមជាមធ្យមសម្រាប់មនុស្សម្នាក់ ​កើនឡើង ៥ ភាគរយ/ឆ្នាំ។

​

​យ៉ាងណាមិញ របាយការណ៍បានកត់សម្គាល់ថា វៀតណាមប្រឈមមុខនឹងឧបសគ្គយ៉ាងច្រើនក្នុងការសម្រេចគោលដៅនេះ រួមទាំងការធ្លាក់ចុះនៃពាណិជ្ជកម្មពិភពលោក និងកំណើននៃចំនួនប្រជាជនវ័យចំណាស់​ជាដើម។

បើតាមទិន្នន័យដាច់ដោយឡែកពីមូលនិធិរូបិយវត្ថុអន្តរជាតិ (IMF) ​ត្រឹមឆ្នាំ ២០២៥ វៀតណាមរំពឹងថានឹងក្លាយជាប្រទេសមានសេដ្ឋកិច្ចធំជាងគេទី៣នៅអាស៊ីអាគ្នេយ៍ ​​ជាមួយនឹងផលិតផលក្នុងស្រុកសរុបចំនួន ៥៧១ ​ប៊ីលានដុល្លារ ដោយឈរនៅពីក្រោយឥណ្ឌូណេស៊ី និង​ថៃ ប៉ុន្តែនាំមុខម៉ាឡេស៊ី ហ្វីលីពីន និងសិង្ហបុរី។

ប្រសិនបើការព្យាករ​របស់ CEBR ​នឹងកើតឡើងពិត នៅឆ្នាំ ២០៣៦ សេដ្ឋកិច្ចរបស់វៀតណាមនឹងកើន​លើស​ប្រទេសប៉ូឡូញ ស្វីស ស៊ុយអែត បែលហ្សិក និងអូស្ត្រាលី៕