ព័ត៌មានអន្ដរជាតិ

ត្រាំ ពន្យារពេលពន្ធ ៥០% លើ EU ដល់ដើមខែកក្កដា ដើម្បីបន្តចរចា

បានផុស

១ សប្តាហ៍ មុន

នៅ

ថ្ងៃចន្ទ ២៦ ឧសភា ២០២៥

ដោយ

ប្រធានាធិបតីសហរដ្ឋអាមេរិក លោក ដូណាល់ ត្រាំ បានឱ្យដឹងកាលពីថ្ងៃអាទិត្យថា លោកបានព្រមព្រៀងពន្យារពេលដំឡើងពន្ធដល់ ៥០ ភាគរយ លើសហភាពអឺរ៉ុប (EU) ដល់ថ្ងៃទី ៩ កក្កដា ក្រោយគំរាមកំហែងអនុវត្តវាចាប់ពីថ្ងៃទី ១ មិថុនា ប៉ុន្មានថ្ងៃមុននោះ។ នេះបើតាមការចុះផ្សាយរបស់បណ្ដាញទូរទស្សន៍ CNBC។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ បានសរសេរនៅលើបណ្ដាញសង្គម Truth Social ថា៖ «ខ្ញុំបានទទួលទូរស័ព្ទនៅថ្ងៃនេះ ពីលោកស្រី Ursula von der Leyen ប្រធានគណៈកម្មាការអឺរ៉ុប ដែលស្នើសុំការពន្យារពេលនៅថ្ងៃទី ១ ខែមិថុនា លើពន្ធ ៥០ ភាគរយ ពាក់ព័ន្ធនឹងពាណិជ្ជកម្ម និងសហភាពអឺរ៉ុប»។ លោកបានបន្ថែមថា៖ «ខ្ញុំបានយល់ព្រមលើការពន្យារពេល – ថ្ងៃទី ៩ កក្កដា ២០២៥ – វាជាឯកសិទ្ធិរបស់ខ្ញុំក្នុងការធ្វើដូច្នេះ»។

គួរគូសបញ្ជាក់ថា លោក ត្រាំ បានបង្កើនភាពតានតឹងពាណិជ្ជកម្មសកលជាថ្មីកាលពីថ្ងៃសុក្រ ចំពោះការគំរាមកំហែងដំឡើងពន្ធចុងក្រោយលើ EU ដោយសារមិនសប្បាយចិត្តនឹងវឌ្ឍនភាពយឹតយ៉ាវនៃការចរចា ហើយថាប្លុកនេះពិបាក «និយាយ» គ្នា។

ការប្រកាសពន្យាររបស់ ត្រាំ ធ្វើឡើងបន្ទាប់ពីលោកស្រី Von der Leyen បានសរសេរនៅលើបណ្ដាញសង្គម X ថា កិច្ចសន្ទនាទូរស័ព្ទជាមួយលោក ត្រាំ ធ្វើទៅយ៉ាងល្អ ប៉ុន្តែត្រូវការពេលរហូតដល់ថ្ងៃទី ០៩ ខែកក្កដា ដើម្បី «ឈានដល់កិច្ចព្រមព្រៀងដ៏ល្អ»។ លោកស្រីបានបន្តថា៖ «អឺរ៉ុបត្រៀមខ្លួនជាស្រេចដើម្បីជំរុញការចរចាឱ្យបានរហ័ស»។

គួរគូសបញ្ជាក់ថា ត្រាំ ដែលទទូចថា EU ធ្វើអាក្រក់ដាក់សហរដ្ឋអាមេរិក បានដាក់ពន្ធគយបដិការ ២០ ភាគរយ លើប្លុកនេះ មុនពេលទម្លាក់មកត្រឹម ១០ ភាគរយ ដើម្បីពន្យារពេលចរចា ៩០ ថ្ងៃ រហូតដល់ថ្ងៃ ៩ កក្កដា ដូចប្រទេសដទៃទៀត ដែលជាប់ពន្ធគយបដិការអាមេរិកដែរ៕