ទុនវិនិយោគក្នុងវិស័យទេសចរណ៍កម្ពុជាមានកំណើនខ្ពស់

រដ្ឋលេខាធិការក្រសួងទេសចរណ៍ លោក នី ផល្លី មានប្រសាសន៍ថា ក្រោយការពង្រឹងនូវការដាក់ចេញយុទ្ធសាស្ត្ររបស់រដ្ឋាភិបាល មានគម្រោងវិនិយោគជាច្រើនកើតឡើង មានទាំងខ្នាតតូច ធំ និងខ្នាតមធ្យម។

«ក្នុងនោះបងប្អូនរបស់យើងមួយចំនួន មានការប្រើប្រាស់ទុនក្នុងស្រុក​ ហើយមួយចំនួនទៀតក៏ចាប់ផ្ដើមចាប់យកដៃគូបរទេស»។​ លោក​ថា វិស័យទេសចរណ៍កម្ពុជាមានកំណើនវិជ្ជមានទាំងបរិមាណ និងគុណភាព ដែលមានការវិនិយោគលើទេសចរណ៍បែបគុណភាព កម្រិតបង្គួរ ឬកម្រិតខ្ពស់។ នេះបើយោងតាមការថ្លែងបញ្ជាក់របស់លោក នី ផល្លីនៅក្នុងសន្និសីទសារព័ត៌មានមួយនៅរាជធានីភ្នំពេញ កាលពីថ្ងៃទី២៤​កន្លងទៅនេះ។

លោកបានថ្លែងបញ្ជាក់បន្ថែមថា៖ «ជាក់ស្ដែងនៅខេត្តសៀមរាប យើងសង្កេតឃើញថា ការវិនិយោគ​ទៅលើសេវាកម្មស្នាក់នៅ ម្ហូបអាហារកម្រិតបង្គួរ ទោះបីក្នុងរដូវកាលបៃតង ក៏មានភ្ញៀវពេញៗ អ្នកដែលធ្វើការផ្លាស់ប្ដូរទាន់ពេលវេលា ឆ្លើយ​តបទៅនឹងតម្រូវការភ្ញៀវទេសចរគាត់អាចរស់បាន នេះគឺជាឱកាសមួយដែលគាត់ត្រូវតែធ្វើការផ្លាស់ប្ដូរ»។

លោក នី ផល្លី បន្តថា ការវិនិយោគនៅក្នុងវិស័យទេសចណ៍នៅដើមឆ្នាំ ២០២៥ មានកំណើនខ្ពស់ ដោយលោកបានលើក​ឧទារហណ៍ពីកម្មវិធីពិសេសនៅខេត្តព្រះសីហនុ មានទុនសរុបជាង ១ ពាន់លានដុល្លារ ចាក់បញ្ចូលទៅក្នុងវិស័យទេសចរណ៍ ដែលកំពុងដំណើរការ។

យោងតាមក្រុមប្រឹក្សាអភិវឌ្ឍន៍កម្ពុជា នៅក្នុងឆ្នាំ ២០២៤ រដ្ឋាភិបាលអនុម័តគម្រោងវិនិយោគក្នុងវិស័យទេសចរណ៍ មានទំហំទឹកប្រាក់ប្រមាណជិត ៧៣៩ លានដុល្លារ កើនឡើង ១១% ធៀបនឹងឆ្នាំ ២០២៣។

យោងតាមក្រសួងទេសចរណ៍ នៅក្នុងត្រីមាសទី១ ឆ្នាំ ២០២៥ កម្ពុជាទទួលបានភ្ញៀវ​ទេចរអន្តរជាតិជាង​ ១,៨៣ លាននាក់ កើនឡើង១៦,១% ធៀបនឹងរយៈពេល​ដូច​គ្នា​កាលពីឆ្នាំមុន។

កម្ពុជារំពឹងស្វាគមន៍ភ្ញៀវ​ទេចរអន្តជាតិប្រមាណ ​៧,៥ លាននាក់​នៅឆ្នាំ២០២៥ ដែលនឹង​បង្កើតចំណូល​ចូល​សេដ្ឋកិច្ច​​ជាង​៥ពាន់លានដុល្លារ​។

នៅក្នុងឆ្នាំ ២០២៤ កម្ពុជា​ទទួលបានភ្ញៀវទេសចរណ៍​អន្តរជាតិ​ជាង ៦,៧ លាន​នាក់ ​កើន​ឡើង​ជិត ២៣ ភាគរយ ដោយទទួលបានប្រាក់ចំណូលសរុបជាង ៣,៦៣ ពាន់លានដុល្លារ កើនឡើង​ប្រមាណ​ជាង ១៧% ធៀបនឹងឆ្នាំ ២០២៣។

ក្នុងចំណោមភ្ញៀវទេសចរជាង ៦,៧ លាន​នាក់ ទេសចរណ៍ថៃឈរនៅ​លំដាប់​លេខរៀងទី ១ មាន​ចំនួន ២,១៤ លាននាក់ កើនជិត ១៨% វៀតណាមចំនួន ១,៣៤ លាននាក់ កើន ៣១,៥% ចិនជាង ៨៤ ម៉ឺននាក់ កើន ៥៥% ភ្ញៀវទេស​ចរ​ឡាវចំនួនជាង ៣៣ ម៉ឺននាក់ ធ្លាក់ចុះ ១០% និងភ្ញៀវទេសចរអាមេរិកជាង ២១ ម៉ឺននាក់ កើនឡើង ១៦%៕

អត្ថបទ៖ ឡេង ដេត

អត្ថបទ៖ ឡេង ដេត