ព័ត៌មានអន្ដរជាតិ

សេវាកម្មបញ្ចុះបញ្ចូលរីកចម្រើនឡើងនៅអាមេរិក ជុំវិញ «ការលើកលែងទោស» របស់ ត្រាំ

បានផុស

២ ខែ មុន

នៅ

ថ្ងៃចន្ទ ២ មិថុនា ២០២៥

ដោយ

ការស្នើសុំឱ្យមានការលើកលែងទោសពីប្រធានាធិបតីសហរដ្ឋអាមេរិក ដូណាល់ ត្រាំ បានក្លាយជាឱកាសរកលុយដ៏ធំមួយសម្រាប់ក្រុមអ្នកផ្ដល់សេវាកម្មបញ្ចុះបញ្ចូល និងក្រុមហ៊ុនប្រឹក្សាយោបល់ ដោយអ្នកមានៗអាចចំណាយប្រាក់រាប់លាន ធ្វើយ៉ាងណាដើម្បីឱ្យសំណុំរឿងរបស់ពួកគេបានទៅដល់មនុស្សដែលនៅក្បែរលោក ត្រាំ ឬរដ្ឋបាលរបស់លោក។ នេះបើតាមការចុះផ្សាយរបស់បណ្ដាញទូរទស្សន៍ CNBC។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកបញ្ចុះបញ្ចូល ឬគេហៅថា ឡបប៊ី (Lobby) ម្នាក់ ពីក្រុមហ៊ុនមួយដែលមានគេទាក់ទងឱ្យធ្វើរឿងបែបនេះ បាននិយាយថា៖ «មើលពីទស្សនៈរបស់អ្នកបញ្ចុះបញ្ចូល ការលើកលែងទោសបានក្លាយជាអាចរកប្រាក់ចំណេញបាន»។

CNBC ផ្សាយថា មិនមានអត្រាតម្លៃកំណត់សម្រាប់ជំនួយឱ្យមានការលើកលែងទោសនោះទេ។ ប៉ុន្តែប្រភព ២ រូប ដែលដឹងពីសំណើជំនួយបែបនេះទៅកាន់ក្រុមហ៊ុនបញ្ចុះបញ្ចូល បានអះអាងជាអនាមិកថា មានអតិថិជនម្នាក់ ហ៊ានផ្ដល់លុយរហូតដល់ទៅ ៥ លានដុល្លារ ដើម្បីឱ្យសំណុំរឿងក្ដីរបស់ខ្លួន បានទៅដល់លោក ត្រាំ។ ទោះបីជាតម្លៃនេះមិនមែនស្ដង់ដារក្ដី ប៉ុន្តែវាបង្ហាញពីទំហំដ៏ធំផ្នែកអាជីវកម្ម ពាក់ព័ន្ធនឹងអំណាចលើកលែងទោសរបស់ប្រធានាធិបតី។

ការជួលអ្នកបញ្ចុះបញ្ចូល ឬចូលទៅជិតបក្សពួកសម្ព័ន្ធមិត្តរបស់ប្រធានាធិបតី ដើម្បីសុំការលើកលែងទោស មិនមែនជារឿងថ្មីទេ។ ប៉ុន្តែអ្វីដែលគួរឱ្យកត់សម្គាល់នៅពេលនេះគឺថា លោក ត្រាំ កំពុងផ្តល់ការលើកលែងទោសកាន់តែញឹកញាប់ជាងមុននៅអាណត្តិទី២នេះ ដោយមិនដូចនៅអាណត្តិមុន ដែលលោកផ្ដល់ការលើកលែងទោសច្រើននៅចុងអាណត្តិនោះទេ។

ការណ៍នេះបង្កបារម្ភថា លុយ និងទំនាក់ទំនងនយោបាយមានសារៈសំខាន់ជាងភាពយុត្តិធម៌ ដែលអាចប៉ះពាល់ដល់ការជឿទុកចិត្តលើប្រព័ន្ធយុត្តិធម៌របស់សហរដ្ឋអាមេរិក។

យ៉ាងណាមិញ អ្នកនាំពាក្យសេតវិមាន លោកស្រី Taylor Rogers បាននិយាយថា៖ «រាល់ការសម្រេចចិត្តលើកលែងទោស ធ្វើឡើងផ្ដាច់មុខដោយប្រធានាធិបតី ត្រាំ ដែលតែងតែមានឆន្ទៈក្នុងការផ្តល់ឱកាសទី២ដល់ប្រជាជនអាមេរិក ជាពិសេសអ្នកដែលត្រូវបានគេកំណត់គោលដៅយ៉ាងអយុត្តិធម៌ពីប្រព័ន្ធយុត្តិធម៌ដ៏ពុករលួយ»។

រាប់តាំងពីចូលកាន់អំណាចនៅខែមករាមក លោក ត្រាំ បានផ្តល់ការលើកលែងទោសដល់មនុស្សជាង ១ ៥០០ នាក់ ដែលភាគច្រើនពាក់ព័ន្ធនឹងករណីវាយប្រហារវិមានកាពីតូលថ្ងៃ ៦ មករា ឆ្នាំ ២០២១។ នេះបង្ហាញពីកំណើនខ្លាំងនៃការសម្រេចចិត្តបែបនេះ ធៀបនឹងអាណត្តិទី១។ ការមិនលើកលែងទោសអ្នកមិនពាក់ព័ន្ធនឹងព្រឹត្តិការណ៍ ៦ មករា មានរហូតដល់ ៥៨ នាក់ ដែលជាកំណើនខ្ពស់ដូចគ្នា។

មនុស្សភាគច្រើនដែលទទួលបានការលើកលែងទោស មានលុយ ឬទំនាក់ទំនង ដូចជាសម្ព័ន្ធមិត្តនយោបាយ ម្ចាស់ជំនួយ តារាល្បី ឬអតីតអ្នកនយោបាយជាដើម ដើម្បីជួយឱ្យសំណុំរឿងរបស់ពួកគេបានដឹងឮ។

គិតត្រឹមសប្តាហ៍នេះ មានសំណើចំនួន ៦ ៣៩៤ ករណី សម្រាប់បន្ថយការកាត់ទោស និង ១ ៥២៩ ករណី សម្រាប់សុំការលើកលែងទោស។

បើតាម CNBC ប្រភពនិយាយថា មិនមែនអ្នកផ្ដល់សេវាកម្មបញ្ចុះបញ្ចូលទាំងអស់ដែលមានទំនាក់ទំនងជាមួយ ត្រាំ ចង់ធ្វើការឱ្យអ្នកដែលទាក់ទងទៅពួកគេនោះទេ។ អ្នកខ្លះបានបដិសេធ ប៉ុន្តែបញ្ជូនសំណុំរឿងបែបនេះ ទៅឱ្យក្រុមហ៊ុនផ្សេងទៀតធ្វើវិញ ហើយក្នុងករណីខ្លះ ពួកគេនៅតែទទួលបានប្រាក់កម្រៃចំពោះសេវាកម្មបញ្ជូនបែបនេះ៕