ព័ត៌មានអន្ដរជាតិ

ស្លាប់៣១នាក់ របួស១៧០នាក់ ក្នុងការវាយប្រហារនៅកន្លែងចែកស្បៀងតំបន់ហ្គាហ្សា

បានផុស

២ ខែ មុន

នៅ

ថ្ងៃចន្ទ ២ មិថុនា ២០២៥

ដោយ

Chheang

យ៉ាងហោចណាស់ ជនជាតិប៉ាឡេស្ទីនចំនួន ៣១នាក់ត្រូវបានសម្លាប់ និងជាង ១៧០នាក់បានរងរបួសនៅជិតកន្លែងចែកចាយស្បៀងអាហារក្នុងទីក្រុង Rafah ភាគខាងត្បូងតំបន់ហ្គាហ្សា កាលពីថ្ងៃអាទិត្យទី១ ខែមិថុនា ឆ្នាំ២០២៥។ នេះបើយោងតាមក្រសួងសុខាភិបាលដែលគ្រប់គ្រងដោយក្រុមសកម្មប្រយុទ្ធប៉ាឡេស្ទីនហាម៉ាស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សាក្សី និងបុគ្គលិកពេទ្យ បានរាយការណ៍ថា កងកម្លាំងអ៊ីស្រាអែលបានបើកការបាញ់ប្រហារទៅលើជនស៊ីវិលដែលប្រមូលផ្តុំគ្នាទទួលជំនួយមនុស្សធម៌។ បន្ថែមពីនោះ រថក្រោះអ៊ីស្រាអែលក៏បានបើកការបាញ់ប្រហារលើក្រុមមនុស្សរាប់ពាន់នាក់ផងដែរ ដែលកំពុងធ្វើដំណើរទៅកាន់ទីក្រុង Rafah ដែលជាកន្លែងចែកជំនួយ។

យ៉ាងណាមិញ កងកម្លាំងការពារអ៊ីស្រាអែល (IDF) បានបដិសេធថា ខ្លួនមិនបានកំណត់គោលដៅលើជនស៊ីវិលនោះទេ ដោយបញ្ជាក់ថា មានតែការបាញ់ព្រមានប៉ុណ្ណោះដែលធ្វើឡើង ដើម្បីរារាំងការចូលទៅកាន់កន្លែងផ្តល់ជំនួយដោយគ្មានការអនុញ្ញាត។

គណៈកម្មាធិការអន្តរជាតិនៃកាកបាទក្រហម (ICRC) បានរាយការណ៍ថាបានទទួលអ្នកស្លាប់ និងរបួសចំនួន ១៧៩នាក់ ដែលភាគច្រើនមានរបួសដោយគ្រាប់កាំភ្លើង ឬកម្ទេចគ្រាប់។

ICRC បាននិយាយថា «អ្នកជំងឺទាំងអស់បាននិយាយថា ពួកគេបានព្យាយាមទៅដល់កន្លែងចែកចាយជំនួយ។ នេះគឺជាចំនួនខ្ពស់បំផុតនៃអ្នករបួសដោយអាវុធនៅក្នុងឧប្បត្តិហេតុតែមួយ ចាប់តាំងពីការបង្កើតមន្ទីរពេទ្យបានជាងមួយឆ្នាំមុនមក»។

សាក្សីដែលបានឃើញផ្ទាល់ភ្នែកបានពិពណ៌នាអំពីទិដ្ឋភាពដ៏ច្របូកច្របល់ នៅពេលដែលប្រជាជនប៉ាឡេស្ទីនរាប់ពាន់នាក់បានប្រញាប់ប្រញាល់ទៅកាន់កន្លែងផ្តល់ជំនួយ ចំពេលមានការខ្វះខាតស្បៀងអាហារយ៉ាងខ្លាំង។ ខ្លះត្រូវបានគេរាយការណ៍ថាត្រូវបានបាញ់ចេញពីទិសដៅជាច្រើន រួមទាំងពីរថក្រោះ និងយន្តហោះគ្មានមនុស្សបើក។

អង្គការសហប្រជាជាតិ បាននិយាយថា ប្រជាជនភាគច្រើននៃតំបន់ហ្គាហ្សាសរុប ២លាននាក់កំពុងប្រឈមនឹងគ្រោះទុរ្ភិក្សបន្ទាប់ពីការបិទផ្លូវជំនួយរបស់អ៊ីស្រាអែលអស់រយៈពេល ១១សប្តាហ៍។

ក្រុមហាម៉ាស បានអំពាវនាវឲ្យមានបទឈប់បាញ់ជាអចិន្ត្រៃយ៍ និងការដកទ័ពអ៊ីស្រាអែលពេញលេញ ជាលក្ខខណ្ឌដែលអ៊ីស្រាអែលបានច្រានចោល។ អ៊ីស្រាអែល ចង់បានបទឈប់បាញ់បណ្ដោះអាសន្នដែលស្នើឡើងដោយបេសកជនអាមេរិក Steve Witkoff រួមមាន ការបញ្ឈប់អរិភាពរយៈពេល ៦០ថ្ងៃ ការដោះលែងចំណាប់ខ្មាំងជនជាតិអ៊ីស្រាអែលចំនួន ១០នាក់ និងសាកសព ១៨នាក់ ជាថ្នូរនឹងការរំដោះអ្នកទោសប៉ាឡេស្ទីនចំនួន ១ ២៣៦នាក់ និងសាកសពចំនួន ១៨០នាក់។

សូមជម្រាបថា មនុស្សជិត ៤ ០០០នាក់ត្រូវបានសម្លាប់នៅក្នុងតំបន់ហ្គាហ្សាក្នុងរយៈពេល ១០សប្តាហ៍កន្លងមកនេះ។ អង្គការសហប្រជាជាតិ និយាយថា មនុស្ស ៦០ម៉ឺននាក់ផ្សេងទៀតត្រូវបានផ្លាស់ទីលំនៅសាជាថ្មី ដោយប្រតិបត្តិការជើងគោកនិងបញ្ជាជម្លៀសរបស់អ៊ីស្រាអែល ហើយរបាយការណ៍របស់ IPC គាំទ្រដោយអង្គការសហប្រជាជាតិ បានព្រមានថា មនុស្សប្រហែល ៥០ម៉ឺននាក់ប្រឈមមុខនឹងកម្រិតនៃភាពអត់ឃ្លានដ៏មហន្តរាយ នាប៉ុន្មានខែខាងមុខនេះ៕

ដោយ៖ ឈាង

ចុចអាន៖ អ៊ីស្រាអែលគំរាមឲ្យទទួលយកបទឈប់បាញ់ បើមិនចង់វិនាសខ្លួន