ព័ត៌មានអន្ដរជាតិ

ចិនអាចទិញយន្តហោះ Airbus រាប់រយគ្រឿង ខណៈភាពតានតឹងជាមួយអាមេរិកបន្ត

បានផុស

១៥ ម៉ោង មុន

នៅ

ថ្ងៃព្រហស្បតិ៍ ៥ មិថុនា ២០២៥

ដោយ

សារព័ត៌មាន Bloomberg បានរាយការណ៍កាលពីថ្ងៃពុធថា ប្រទេសចិនកំពុងពិចារណាលើការបញ្ជាទិញយន្តហោះ Airbus រាប់រយគ្រឿងយ៉ាងឆាប់បំផុតនៅខែក្រោយ នៅពេលក្រុមមេដឹកនាំអឺរ៉ុបនឹងធ្វើដំណើរទៅកាន់ចិន ដើម្បីអបអរសាទរចំណងមិត្តភាពរយៈពេលវែងរវាងភាគីទាំង២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Bloomberg បានស្រង់សម្ដីប្រភពមិនបញ្ចេញឈ្មោះផ្សេងៗគ្នា ដែលនិយាយថា ការពិភាក្សាកំពុងដំណើរការជាមួយក្រុមហ៊ុនអាកាសចរណ៍ចិន អំពីទំហំនៃលទ្ធភាពនៃការបញ្ជាទិញ។ កិច្ចព្រមព្រៀង អាចពាក់ព័ន្ធនឹងការទិញយន្តហោះ ៣០០ គ្រឿង ទាំងប្រភេទយន្តហោះមួយតួដើរតូចចង្អៀត និងតួធំទូលាយ។ ប៉ុន្តែប្រភពមួយរូបក្នុងចំណោមនោះ បាននិយាយថា ការបញ្ជាទិញអាចមានចន្លោះពី ២០០ គ្រឿង ទៅ ៥០០ គ្រឿង ច្រើនបំផុត។

យ៉ាងណាមិញ ក្រុមប្រភពដដែលបានលើកឡើងថា ការចរចាកំពុងបន្ត ហើយអាចនឹងមិនត្រូវគ្នា ឬប្រើពេលយូរមុនពេលសម្រេចបានការព្រមព្រៀងគ្នា។

ជុំវិញបញ្ហានេះ ក្រុមហ៊ុនផលិតយន្តហោះបារាំង Airbus បានបដិសេធមិនធ្វើអត្ថាធិប្បាយនោះទេ ខណៈតំណាងរដ្ឋបាលអាកាសចរណ៍ស៊ីវិលចិន ក៏មិនបាននិយាយយ៉ាងណាដែរ។

គួរគូសបញ្ជាក់ថា ប្រធានាធិបតីបារាំង លោក អេម៉ានុយអែល ម៉ាក្រុង និងអធិការបតីអាល្លឺម៉ង់ លោក Friedrich Merz អាចនឹងធ្វើទស្សនកិច្ចនៅទីក្រុងប៉េកាំងក្នុងខែកក្កដា ដើម្បីប្រារព្ធខួប ៥០ ឆ្នាំនៃទំនាក់ទំនងការទូតរវាងចិន និងសហភាពអឺរ៉ុប។

បារាំង និងអាល្លឺម៉ង់ គឺជាម្ចាស់ភាគហ៊ុនធំបំផុតនៅក្នុងក្រុមហ៊ុន Airbus ហើយកិច្ចព្រមព្រៀងដ៏ធំណាមួយរវាងចិន និងក្រុមហ៊ុននេះ អាចជាសារទៅកាន់សហរដ្ឋអាមេរិក ដែលកំពុងបន្តមានភាពតានតឹងពាណិជ្ជកម្មជាមួយចិន ជាពិសេសជុំវិញសង្រ្គាមពន្ធគយ។

សហរដ្ឋអាមេរិកអាមេរិក មានក្រុមហ៊ុន Boeing ដែលជាគូប្រជែងរបស់ Airbus។ ប្រសិនបើកិច្ចព្រមព្រៀង Airbus និងចិន សម្រេចឡើង នោះនឹងផ្ដល់ប្រយោជន៍កាន់តែខ្លាំងសម្រាប់ក្រុមហ៊ុនអឺរ៉ុបមួយនេះ ចំពេលដែល Boeing ប្រឈមមុខនឹងបញ្ហាផ្សេងៗនៅចិនរួចទៅហើយ។

កាលពីឆ្នាំ ២០១៩ ចិនបានផ្អាកការហោះហើរយន្តហោះ Boeing ម៉ាក 737 Max បន្ទាប់ពីមានឧបទ្ទវហេតុគ្រោះថ្នាក់ចំនួន២ ខណៈបញ្ហាមួយទៀត គឺពាក់ព័ន្ធនឹងជម្លោះពាណិជ្ជកម្មដែលកំពុងបន្ត ទាំងជាមួយរដ្ឋបាលរបស់អតីតប្រធានាធិបតី ចូ បៃដិន និងរដ្ឋបាល ត្រាំ។ ការណ៍នេះ កាន់តែជំរុញឱ្យចិន ងាកទៅរកការផ្គត់ផ្គង់យន្តហោះពី Airbus៕