WB៖ ​ថៃដើរយឺតជាងគេលើនវានុវត្តន៍​អាជីវកម្ម ​ធៀបនឹងដៃគូសំខាន់ៗនៅអាស៊ាន​

របាយការណ៍របស់ធនាគារពិភពលោក (WB) បាន​បង្ហាញថា ​ប្រទេសថៃដើរយឺតជាងគេ ធៀបនឹងគូប្រជែងសំខាន់ៗនៅសមាគមប្រជាជាតិអាស៊ីអាគ្នេយ៍ (អាស៊ាន) លើផ្នែកនវានុវត្តន៍​ និងការស្រាវជ្រាវ និងអភិវឌ្ឍន៍ (R&D) សម្រាប់អាជីវកម្ម ដែលបង្កបញ្ហាប្រឈមសម្រាប់ការប្រកួតប្រជែង និងកំណើនសហគ្រាសធុនតូច និងមធ្យម (SMEs)។ នេះបើតាមការចុះផ្សាយរបស់កាសែត The Nation។

​របាយការណ៍ «​តាមដានសេដ្ឋកិច្ចថៃ» របស់ធនាគារពិភពលោក បាន​និយាយថា ខែកុម្ភៈ ឆ្នាំ ២០២៥ អាជីវកម្មថៃ​ប្រើប្រាស់នវានុវត្តន៍ ឬការបង្កើតថ្មី ​សម្រាប់ប្រតិបត្តិការរបស់ខ្លួន​ ​ក្នុងអត្រាទាបជាងដៃគូក្នុងតំបន់។ មានតែក្រុមហ៊ុនថៃ ១១,៩ ភាគរយ ប៉ុណ្ណោះ ដែលបញ្ជូល​នវានុវត្តន៍ទៅក្នុងដំណើរការផលិតរបស់​ខ្លួន ធៀបនឹង ៤០,៩ ភាគរយ ​នៅហ្វីលីពីន ៣៧,៩ ភាគរយ នៅវៀតណាម និង ៣៧,៣ ភាគរយ នៅម៉ាឡេស៊ី។ ​មែនទែនទៅ ហ្វីលីពីន និងវៀតណាមនាំមុខគេក្នុងតំបន់ទាក់ទងនឹងការចូលរួមក្នុងការបង្កើតថ្មីសម្រាប់អាជីវកម្ម​ ដោយបានវ៉ាដាច់​ថៃ ឥណ្ឌូណេស៊ី និងម៉ាឡេស៊ី យ៉ាងខ្លាំង។

របាយ​ការណ៍​​ដដែល ក៏​បាន​បង្ហាញ​ផងដែរ​ពី​ការ​វិនិយោគ​ទាប​នៅប្រទេសថៃ ផ្នែក R&D ដែល​បង្ក​ជា​ឧបសគ្គ​រចនាសម្ព័ន្ធ​ដល់​ការ​ប្រកួត​ប្រជែង​អាជីវកម្ម។ របាយការណ៍គូសបញ្ជាក់ទៀត​ថា គម្លាតនៃការបង្កើតថ្មី​ អាចរួមចំណែក​ដ៏សំខាន់ ដែលបង្កការបិទអាជីវកម្មនៅថៃក្នុងឆ្នាំ ២០២៤ ដែលនៅពេលនោះ មាន​ SMEs ជិត ២៤ ០០០ បាន​លុបឈ្មោះចេញពីបញ្ចី ហើយរោងចក្រជាង ១ ២៣៤ កន្លែង ​ត្រូវបានបិទ។

ការបិទទាំង​នោះ បានប៉ះពាល់ដល់កម្មករជាង ៣៥ ០០០ នាក់ ​ដោយរោងចក្របិទទ្វារភាគច្រើនស្ថិតនៅក្នុងវិស័យផលិតកម្ម ដែលការប្រកួតប្រជែងនៅតែជាកង្វល់ដ៏ធ្ងន់ធ្ងរ។

ទីផ្សារការងាររបស់ប្រទេសថៃ ជាពិសេសក្នុងចំណោម SMEs នៅតែបន្តប្រឈមមុខនឹងកំណើន​ហានិភ័យ​ទាំងក្នុងស្រុក និងអន្តរជាតិ ជាពិសេសផលប៉ះពាល់នៃរលកថ្មីនៃសង្គ្រាមពាណិជ្ជកម្មពិភពលោក។ សម្ពាធទាំងនេះ កំពុងរំខានដល់ការលក់ និងការបន្តផលិតកម្មរបស់ថៃ។

ក្នុងពេលដំណាលគ្នានោះ​ វិស័យផលិតកម្ម​ថៃ មិនទាន់មានការរីកចម្រើនគួរឱ្យកត់សម្គាល់ក្នុងការបង្កើតថ្មី ឬនវានុវត្តន៍​នៅឡើយទេ ដែលធ្វើឱ្យវាមិនអាចឆ្លើយតបនឹងតម្រូវការអតិថិជន ដែលកំពុងវិវត្តនៅគ្រប់កម្រិត​។

ការណ៍នេះហើយ​ រួម​ចំណែកដល់ការធ្លាក់ចុះនៃការលក់ ការកាត់បន្ថយទិន្នផលផលិតកម្ម និងការធ្លាក់ចុះនៃកម្រិតការងារ ដែលបណ្តាលឱ្យមានការបិទអាជីវកម្មទ្រង់ទ្រាយធំកាលពីឆ្នាំមុន និងរហូតដល់ដើមឆ្នាំ ២០២៥។

អគ្គលេខាធិការក្រុមប្រឹក្សាជាតិអភិវឌ្ឍន៍សេដ្ឋកិច្ច និងសង្គមថៃ (NESDC) លោក Danucha Pichayanan បានសង្កត់ធ្ងន់ថា បញ្ហាសំខាន់មួយនៅក្នុងទីផ្សារការងារ គឺតម្រូវការសម្រាប់​នវានុវត្តន៍ និងការ​ប្រើប្រាស់បច្ចេកវិទ្យា ដើម្បីធានាដល់ការបន្តជីវិតរបស់ SMEs ដែលបច្ចុប្បន្ន ផ្ដល់ការងារជាង ១២,៩ លាន កន្លែង នៅទូទាំងប្រទេសថៃ៕ ​

​