CMA ប្តេជ្ញាពង្រឹងកិច្ចការពារអតិថិជន ក្រោមកិច្ចសហការជាមួយដៃគូអភិវឌ្ឍន៍ជាតិ និងអន្តរជាតិ

សមាគមមីក្រូហិរញ្ញវត្ថុកម្ពុជា (CMA) បញ្ជាក់ជាថ្មីនូវការប្តេជ្ញាចិត្តរយៈពេលយូរអង្វែងរបស់ខ្លួន ក្នុង​ការការពារ​អតិថិជន​នៅទូទាំង​ប្រទេស​តាមរយៈការពង្រឹងប្រព័ន្ធនានារបស់ខ្លួន ស្តង់ដាររបស់ស្ថាប័ន ព្រមទាំងការ​អនុវត្ត​ដែល​ពង្រឹង​ភាពស្មើភាព តម្លាភាព និងការគោរពអតិថិជន ក្រោមកិច្ចសហការជាមួយដៃគូអភិវឌ្ឍន៍ជាតិ និងអន្តរជាតិ។

អំឡុងកិច្ចប្រជុំក្លឹបអគ្គនាយក (CEO Club) កាល​ពី​ថ្ងៃទី៤ ខែកក្កដា ឆ្នាំ២០២៥ កន្លង​ទៅ​នេះ​ សមាគម​មីក្រូហិរញ្ញវត្ថុ បានគូសបញ្ជាក់ថា កិច្ចការពារអតិថិជនគឺ ជាកាតព្វកិច្ចរួមដែលមានសារៈ​សំខាន់​​ចំពោះ​ទំនុកចិត្ត​សាធារណៈ និងស្ថិរភាពវិស័យរយៈពេលវែង។ សមាគម​ បន្តធ្វើកិច្ចការ​ដើម្បី​សម្រេច​បាន​កំណើន​ប្រកប​ដោយ​ការ​ទទួល​ខុសត្រូវក្នុងវិស័យមីក្រូហិរញ្ញវត្ថុនៅកម្ពុជា ហើយសមាជិកទាំងអស់របស់សមាគមប្រកាន់ខ្ជាប់នូវក្រមសីលធម៌វិជ្ជាជីវៈ ដែល​មាន​ចែង​អំពីប្រតិបត្តិការឥណទានប្រកបដោយការទទួលខុសត្រូវ និងការការពារអតិថិជន។

ក្នុង​នោះ សមាគមមីក្រូហិរញ្ញវត្ថុកម្ពុជា រក្សាភាពមិនអត់អោនដាច់ខាតចំពោះការបង្ខិតបង្ខំ ការគំរាមកំហែង ឬការដាក់សម្ពាធលើអ្នកខ្ចី។ អតិថិជនគ្រប់រូបមានសិទ្ធិទទួលបានការគោរពដោយសេចក្តីថ្លៃថ្នូរ រួមទាំងក្នុងអំឡុងពេលបង់សងត្រលប់យឺត ឬក្នុងពេលជួបការលំបាកផ្នែកហិរញ្ញវត្ថុផងដែរ។

សមាគមមីក្រូហិរញ្ញវត្ថុកម្ពុជា បន្តផ្តោតលើអាទិភាពសំខាន់ៗដើម្បីការពារអតិថិជន និងពង្រឹង​ការផ្តល់​ប្រាក់​កម្ចីប្រកប​ដោយ​ការទទួលខុសត្រូវ ក្រោមកិច្ចសហប្រតិបត្តិការជាមួយធនាគារជាតិនៃកម្ពុជា និង​អង្គការ​សហប្រជាជាតិ សមាគម​កំពុង​គាំទ្រកំណែទម្រង់ផ្សេងៗដែលធានាថា ប្រាក់កម្ចីត្រូវផ្តល់​ដោយ​ផ្អែកលើ​សមត្ថភាព​សង​របស់អ្នកខ្ចី ជា​ជាងផ្អែកលើទ្រព្យ​បញ្ចាំតែមួយមុខ។

វិធានការសំខាន់មួយគឺ ហាមឃាត់ការ​ប្រើប្រាស់​ប័ណ្ណកម្មសិទ្ធិ​ដីធ្លី​របស់​សហគមន៍​ជនជាតិ​ដើម​ភាគតិច​យក​មក​ធ្វើ​ជា​ទ្រព្យ​បញ្ចាំ​សម្រាប់​កម្ចី ដែល​នឹងជួយការពារសហគមន៍ដែលងាយរងគ្រោះពីហានិភ័យនៃការបាត់បង់ដីធ្លី។

ការការពារបន្ថែមផ្សេងទៀតគឺ ការពង្រឹង​មជ្ឈមណ្ឌលអតិថិជនក្នុងវិស័យធនាគារនិងហិរញ្ញវត្ថុ (FCC) ដែល​បច្ចុប្បន្ន​កំពុង​ដំណើរ​ការ​ក្នុង​នាម​ជា​អង្គភាពឯករាជ្យ ដោយមានការ​គ្រប់គ្រង​ផ្ទាល់​របស់ខ្លួន​ដាច់ដោយ​ឡែកពី​សមាគម​ធនាគារ​នៅកម្ពុជា និង​សមាគម​មីក្រូហិរញ្ញវត្ថុកម្ពុជា។ មជ្ឈមណ្ឌល FCC ផ្តល់សេវា​ដោះ​ស្រាយ​បណ្តឹង​សម្រាប់​សមាគមទាំងពីរ ដែល​ជួយពង្រឹងតម្លាភាព គណនេយ្យភាព និងការ​ប្តេជ្ញាចិត្ត​ទូទាំង​វិស័យឆ្ពោះ​ទៅរក​ការ​អនុវត្ត​ប្រកប​ដោយ​យុត្តិធម៌ និងការឆ្លើយតប។

ទន្ទឹមនេះសមាគមមីក្រូហិរញ្ញវត្ថុកម្ពុជា ក៏កំពុងពង្រឹងកិច្ចខិតខំប្រឹងប្រែងរបស់ខ្លួន ក្នុងការលើកកម្ពស់​ចំណេះ​ដឹង​ផ្នែក​ហិរញ្ញវត្ថុ​ផងដែរ ជា​ពិសេស​តាមរយៈ​គម្រោង​សុវត្ថិភាព​ហិរញ្ញវត្ថុ​សហគមន៍ (Safe Finance in Community Project) ដើម្បី​ជួយ​អតិថិជន​ឱ្យធ្វើការសម្រេចចិត្តប្រកបដោយការយល់ដឹង និងកាត់​បន្ថយ​ហានិភ័យនៃ​ការ​ជំពាក់​បំណុល​ច្រើន​លើសលុប។

គម្រោងនេះធ្វើឡើង​ក្នុង​ខេត្តមួយចំនួន ហើយខេត្តរតនគីរីក៏ស្ថិតក្នុងការផ្តោតពិសេសផងដែរ ពោលគឺ ជាខេត្ត​ដែល​ការ​ពង្រឹង​ទំនាក់ទំនង​ជាមួយ​អតិថិជន និងកិច្ចការពារអតិថិជនមានភាពចាំបាច់ជាពិសេស ដើម្បីធានាថា អតិថិជន​ទាំងអស់ មានឧបករណ៍ និងចំណេះដឹងចាំបាច់ក្នុងការសម្រេចចិត្តផ្នែកហិរញ្ញវត្ថុប្រកបដោយទំនុកចិត្ត និងភាពច្បាស់លាស់។

កិច្ចការពារអតិថិជនគឺ ជាការទទួលខុសត្រូវរួមនៅទូទាំងវិស័យរបស់យើងទាំងមូល។ ការប្តេជ្ញាចិត្តរបស់សមាគមមានភាពច្បាស់លាស់៖ រាល់អតិថិជនទាំងអស់នៅគ្រប់សហគមន៍ ត្រូវតែទទួលបានការប្រព្រឹត្តដោយសមភាព ការគោរព និងសេចក្តីថ្លៃថ្នូរ។

កិច្ចខិតខំប្រឹងប្រែងទាំងនេះ ឆ្លុះ​បញ្ចាំង​ពី​ការ​បន្តការ​យក​ចិត្តទុកដាក់​របស់​សមាគម​មីក្រូហិរញ្ញវត្ថុ​កម្ពុជា​ចំពោះ​វិស័យ​ដែល​អ្នកខ្ចីមិនត្រឹមតែជាអតិថិជនប៉ុណ្ណោះទេ ប៉ុន្តែជាដៃគូដ៏មានតម្លៃក្នុងការអភិវឌ្ឍប្រទេសកម្ពុជា។ សមាគម​នឹង​បន្ត​ធ្វើការជាមួយនិយតករ សង្គមស៊ីវិល និងដៃគូអន្តរជាតិ ដើម្បីធានាថា វិស័យ​មីក្រូហិរញ្ញវត្ថុ​របស់​កម្ពុជា​នៅតែ​ជា​គំរូ​នៃ​ហិរញ្ញវត្ថុ​ប្រកប​ដោយ​បរិយាបន្ន និងក្រមសីលធម៌ ដែល​បម្រើ​អតិថិជន​ប្រកប​ដោយ​សុចរិតភាព និង​គាំពារអតិថិជនគ្រប់ពេលវេលា។