កម្ពុជាលើកទឹកចិត្តដល់ធុរជនហ្វីលីពីនចាប់ឱកាសវិនិយោគនៅវិស័យសក្តានុពល

លោកស្រី អេង សុវណ្ណជីតា អនុព័ន្ធពាណិជ្ជកម្មអមស្ថានឯកអគ្គរាជទូតកម្ពុជាប្រចាំសាធារណរដ្ឋហ្វីលីពីន បានជំរុញឱ្យធុរជននៃ​ទីក្រុងម៉ាកាទី ប្រទេសហ្វីលីពីនមកស្វែករកឱកាសវិនិយោគនៅវិស័យសក្តានុពលនៅកម្ពុជា។

ការលើកឡើងរបស់លោកស្រី សុវណ្ណជីតា ធ្វើឡើងកាលពីថ្ងៃទី៣១ ខែកក្កដា ឆ្នាំ២០២៥ ក្នុងជំនួបពិភាក្សាការងារជាមួយ លោក RAFAEL A.S.G ONGPIN នាយកប្រតិបត្តិក្លិបធុរកិច្ចម៉ាកាទី (Makati Business Club) នៅទីក្រុងម៉ាកាទី ប្រទេសហ្វីលីពីន។

​លោកស្រីអនុព័ន្ធពាណិជ្ជកម្ម បានលើកឡើងអំពីកិច្ចខិតខំប្រឹងប្រែងរបស់រាជរដ្ឋាភិលបាលកម្ពុជា ក្នុងការលើកកម្ពស់ និងធ្វើឱ្យប្រសើនឡើងនូវបរិយាកាសធុរកិច្ចវិនិយោគ កិច្ចសម្រួលពាណិជ្ជកម្ម ស្ថានភាពម៉ាក្រូសេដ្ឋកិច្ចដែលមានលំនឹង និងរបបវិនិយោគដែលមានភាពទាក់ទាញនិងអនុគ្រោះ ព្រមទាំងហេដ្ឋារចនាសម្ព័ន្ធដែលកំពុងអភិវឌ្ឍនឱ្យកាន់តែមានភាពតភ្ជាប់ និងប្រទាក់ក្រឡា។

​លោកស្រីអនុព័ន្ធពាណិជ្ជកម្ម ក៏បានស្នើសុំឱ្យមានកិច្ចសហការជាមួយក្លិបធុរកិច្ចម៉ាកាទី ក្នុងការជំរុញពាណិជ្ជកម្ម និងវិនិយោគ រវាងកម្ពុជានិងហ្វីលីពីន តាមរយៈការរៀបចំវេទិកាផ្គូរផ្គងធុរជននិងធុរជន ជាពិសេសនៅពេលដែលហ្វីលីពីននឹងធ្វើជាម្ចាស់ផ្ទះរៀបចំកិច្ចប្រជុំអាស៊ាន ឆ្នាំ២០២៦។

លោក RAFAEL A.S.G ONGPIN បានបង្ហាញនូវការតាំងចិត្តក្នុងការជំរុញពាណិជ្ជកម្ម និងវិនិយោគ រវាងប្រទេសទាំងពីរឱ្យរីកចម្រើនបន្ថែមទៀត ជាពិសេសនៅពេលដែលហ្វីលីពីធ្វើជាប្រធានម្ចាស់ផ្ទះអាស៊ាន។

ក្លិបធុរកិច្ចម៉ាកាទីជាត្រូវបានបង្កើតឡើងក្នុងឆ្នាំ ១៩៨១ ក្នុងគោលបំណងបង្កើតភាពប្រកួតប្រជែងរបស់ហ្វីលីពីន បង្កើតបរិយាកាសធុរកិច្ចល្អសម្រាប់បង្កើតការងារកាន់តែច្រើនសម្រាប់ប្រជាជនហ្វីលីពីន ដោយធ្វើការជាមួយអាជីវកម្ម រដ្ឋាភិបាល និងដៃគូផ្សេងទៀត៕