AMRO៖ កំណើនសេដ្ឋកិច្ចកម្ពុជានឹងកើនឡើងក្នុងអត្រា៦%ក្នុងឆ្នាំនេះ ប៉ុន្តែទាមទារឱ្យមានការកសាងភាពធន់នៃសេដ្ឋកិច្ច​

ស្ថាប័នស្រាវជ្រាវសេដ្ឋកិច្ច ASEAN+3 (AMRO) ដែលមានមូលដ្ឋានៅ​ប្រទេសសិង្ហបុរី បានព្យាករណ៍ថាកំណើនសេដ្ឋកិច្ចកម្ពុជានៅក្នុងឆ្នាំ២០២៥ និង២០២៦ នឹងមានកំណើនក្នុងអត្រា៦% ដោយសារតែការជះឥទ្ធិពលនៃពន្ធបដិការរបស់អាមេរិក កម្សោយនៃសកម្មភាពក្នុងវិស័យអចលទ្រព្យ បើទោះបីជាភាពប្រសើរឡើងក្នុងវិស័យសេវាកម្ម និងបញ្ហាប្រឈមសកល។

យោងតាមរបាយការណ៍ចុងក្រោយចេញថ្ងៃទី៥ ខែសីហាបន្ទាប់ពីខ្លួនបានធ្វើការការទស្សនកិច្ច និងពិភាក្សាការងារជាមួយកម្ពុជាកាលពីចន្លោះថ្ងៃទី ២១ ដល់៣០ ខែមេសសាកន្លងទៅនេះថា ​ ស្របពេល​ដែលមានភាពតានតឹងពាណិជ្ជកម្មសកលកើនឡើង ការឆ្លើយតបគោលនយោបាយសម្របសម្រួល និងពហុភាគីនិយម រួមទាំងការគាំទ្រសារពើពន្ធគោលដៅ និងការធ្វើពិពិធកម្មទីផ្សារ និងឧស្សាហកម្មគឺចាំបាច់ដើម្បីបង្កើនភាពធន់នឹងសេដ្ឋកិច្ច។

​​«សេដ្ឋកិច្ចកម្ពុជាប្រឈមនឹងភាពមិនប្រាកដប្រជាកើនឡើង ដែលភាគច្រើនត្រូវបានជំរុញដោយកត្តាខាងក្រៅ រួមជាមួយនឹងបញ្ហាប្រឈមដែលកំពុងកើតមាននៅក្នុងវិស័យហិរញ្ញវត្ថុក្នុងស្រុក។ មុនពេល​ការប្រកាស​ពន្ធ​បដិការរបស់អាមេរិកនៅ​ខែមេសា សេដ្ឋកិច្ច​របស់​ប្រទេស​កម្ពុជា​បាន​បង្ហាញ​ពី​កំណើន​ដ៏​រឹងមាំ​ពី​មួយ​ក្នុងអត្រា ៦ ភាគរយ​ក្នុង​ឆ្នាំ ២០២៤ កើនឡើង​ពី ៥ ភាគរយ​នៅក្នុង​ឆ្នាំ ២០២៣»។ នេះបើយោងតាមស្ថាប័នដដេល។

AMRO ក៏បានគូសរំលេចផងដែរថា សម្រាប់ទស្សនវិស័យកំណើនរបស់កម្ពុជាគឺនៅមានភាពរសើបខ្លាំងចំពោះទំហំនៃពន្ធគយបដិការ ភាពយឺតនៃតម្លៃទំនិញប្រើប្រាស់ និងផលប៉ះពាល់ជាយថាហេតុ ដោយសារការនាំចេញដ៏សំខាន់របស់កម្ពុជាទៅកាន់សហរដ្ឋអាមេរិក។

«ប្រសិនបើពន្ធពីមុនចំនួន ៣៦ ភាគរយ​ចូលជាធរមានក្នុងខែសីហា ឆ្នាំ ២០២៥ ដូចដែលបានគ្រោងទុក ​កំណើនត្រូវបានគេរំពឹងថានឹងថយចុះមកត្រឹម ៥,២ ភាគរយនៅឆ្នាំ ២០២៥ និង ៤,៧ភាគរយនៅឆ្នាំ ២០២៦។ នៅក្រោមសេណារីយ៉ូដ៏អាក្រក់ជាងនេះ ដែលតម្រូវការបង្ហាញភាពយឺតខ្លាំង ឬពន្ធអាមេរិកលើសពីអត្រា ៣៦ភាគរយ កំណើនអាចធ្លាក់ចុះក្នុងរយៈពេលប្រហែល ៤ភាគរយតែប៉ុណ្ណោះសម្រាប់ឆ្នាំទាំងពីរ»។ នេះបើយោងតាម ASEAN+3។

ពាក់ព័ន្ធទៅនឹងពន្ធបដិការ​ កាលពីថ្ងៃទី១ ខែសីហា សហរដ្ឋអាមេរិកបានបន្ថយពីអត្រា៣៦% នៃការប្រកាសកាលពីដើមខែកក្កដា មកត្រឹមតែ១៩%ប៉ុណ្ណោះដែលចូលជាធរមានចាប់តាំងពីថ្ងៃប្រកាសតទៅ។

យោងតាម AMRO សម្រាប់អត្រាអតិផរណាមានទំនោរធ្លាក់ចុះ ប៉ុន្តែនៅតែមិនប្រាកដប្រជា ភាគច្រើនដោយសារការប្រែប្រួលតម្លៃម្ហូបអាហារ។ អតិផរណានៃសន្ទស្សន៍តម្លៃអ្នកប្រើប្រាស់ (CPI) ត្រូវបានគេរំពឹងថានឹងកើនឡើងដល់ ២,៥ភាគរយនៅឆ្នាំ ២០២៥ ដោយសារតែឥទ្ធិពលមូលដ្ឋាន មុនថយទៅដល់ ២,៣ភាគរយនៅឆ្នាំ ២០២៦ ដែលស្របតាមនិន្នាការមុនជំងឺរាតត្បាត។ ទោះជាយ៉ាងណាក៏ដោយ ដោយសារផ្លូវអតិផរណាមិនច្បាស់លាស់ និងការឆ្លងកាត់យ៉ាងលឿនពីតម្លៃទំនិញ ការកើនឡើងនៃតម្លៃទំនិញសកលអាចបង្កើនសម្ពាធអតិផរណា។

សម្រាប់ជំហរខាងក្រៅរបស់កម្ពុជាត្រូវបានគេរំពឹងថានឹងទទួលរងនូវឱនភាព ដែលភាគច្រើនដោយសារតែការរីកធំនៃឱនភាពពាណិជ្ជកម្ម។ នៅឆ្នាំ ២០២៤ សមតុល្យគណនីចរន្តបានទទួលរងនូវអតិរេក ០,៥ ភាគរយនៃ GDP ខណៈពេលដែលលំហូរ FDI នៅតែរឹងមាំនៅ ៩,២ភាគរយនៃ GDP​ ។ ទៅថ្ងៃអនាគត គណនីចរន្តត្រូវបានព្យាករណ៍ថានឹងកត់ត្រាឱនភាព ៣,៥ភាគរយនៃផលិតផលក្នុងស្រុកសរុបក្នុងឆ្នាំ ២០២៥និង ៥,៤ ភាគរយនៅឆ្នាំ ២០២៦៕

​