វៀតណាមគ្រោងបង្កើនផលិតកម្មទឹកដោះគោ ដើម្បីបំពេញតម្រូវការក្នុងស្រុក

វៀតណាមគ្រោងនឹងបង្កើនផលិតកម្មទឹកដោះគោក្នុងស្រុក និងបង្កើនការប្រើប្រាស់សម្រាប់មនុស្សម្នាក់ៗ ដើម្បីកាត់បន្ថយការពឹងផ្អែកលើការនាំចូល។

តាមការចុះផ្សាយរបស់កាសែត Tuổi Trẻ ការសិក្សាពីបញ្ហា​ត្រូវបាន​លើកយកទៅពិភាក្សា​ក្នុងសន្និសីទឧស្សាហកម្មមួយ​ស្ដីពីគោលដៅអភិវឌ្ឍន៍រហូតដល់ឆ្នាំ ២០៤៥ កាលពីថ្ងៃអង្គារ​។ ក្រសួងឧស្សាហកម្ម និងពាណិជ្ជកម្ម បាននិយាយថា ឧស្សាហកម្មទឹកដោះគោមានគោលបំណងបង្កើនការប្រើប្រាស់ទឹកដោះគោសម្រាប់មនុស្សម្នាក់ប្រចាំឆ្នាំដល់ ៤០ លីត្រ នៅឆ្នាំ ២០៣០ និង ៧០ លីត្រនៅឆ្នាំ ២០៤៥ ពី​អត្រាមធ្យម​នាពេល​បច្ចុប្បន្ន ត្រឹម ២៦-២៨ លីត្រ។ ​

នៅក្រោមយុទ្ធសាស្ត្រដដែល​ ទិន្នផលទឹកដោះគោរាវ​កែច្នៃ ​នឹងត្រូវបង្កើន​ដល់ ​៤,២ ប៊ីលាន​លីត្រ នៅឆ្នាំ ២០៣០ និង ៧,៥ ប៊ីលាន​ លីត្រ នៅឆ្នាំ ២០៤៥។ ​លើសពីនោះ ផលិតកម្មទឹកដោះគោឆៅ ត្រូវបាន​កំណត់គោលដៅ ៣ ប៊ីលាន​លីត្រ នៅឆ្នាំ ២០៣០ ដែល​អាច​បំពេញតម្រូវការកែច្នៃចន្លោះពី ៧០-៧២ ភាគរយ និង ៦,២ ប៊ីលាន​លីត្រ ​​នៅឆ្នាំ ២០៤៥ លីត្រ ដែលអាចបំពេញតម្រូវការកែច្នៃ ៨០ ភាគរយ។

ប្រធានសមាគមទឹកដោះគោវៀតណាម លោក Tran Quang Trung បាន​និយាយថា៖ «សក្តានុពលទីផ្សារនៅតែសំខាន់»។ លោក​បន្តថា ការប្រើប្រាស់ទឹកដោះគោរបស់វៀតណាមនៅតែមានកម្រិតទាបបើប្រៀបធៀបទៅនឹងតំបន់ ​ដូចជា ថៃ (៣៥ លីត្រក្នុងមនុស្សម្នាក់​) និង ៤៥ លីត្រ/ម្នាក់ នៅសិង្ហបុរី។ នៅអឺរ៉ុបឯណោះវិញ ការប្រើប្រាស់ជាមធ្យមប្រចាំឆ្នាំសម្រាប់មនុស្សម្នាក់ មាន​រហូតដល់ ៨០-១០០ លីត្រ។ ​

​យោងតាមសមាគម បច្ចុប្បន្ន​ ទឹកដោះគោស្រស់ក្នុងស្រុកអាច​ផ្គត់ផ្គង់ត្រឹមតែ ៤០ ភាគរយ​ នៃតម្រូវការក្នុងស្រុកប៉ុណ្ណោះ ​ខណៈក្នុងមួយឆ្នាំៗ វៀតណាមបាននាំចូលគ្រឿងផ្សំទឹកដោះគោ និងផលិតផលអាហាររូបត្ថម្ភឯកទេស​ជិត ១ ​ប៊ីលានដុល្លារអាមេរិក​។

នៅក្រោមយុទ្ធសាស្ត្របសុសត្វជាតិ វៀតណាមមានគោលបំណងផលិតទឹកដោះគោឆៅ ១,៧-១,៨ លាន​តោន នៅឆ្នាំ ២០២៥ និងបង្កើនដល់ ២,៦ លាន​តោន នៅឆ្នាំ ២០៣០។ ចំនួនសត្វគោរំពឹងថានឹង​កើនដល់ ៦៥០ ០០០-៧០០ ០០០ ក្បាល ដោយ​ ៦០ ភាគរយ ក្នុងនោះ ចិញ្ចឹមនៅចម្ការ៕ ​